Read new_tumbuka_bible Yobe 29 Bible Online

Yobe 29 - new_tumbuka_bible bible

Yobe 29

¹Penepapo Yobe wakarutilira kuyowoya wakati,

²“Mbaya mwe! Ndiŵenge nga ndi umo nkhaŵira mu nyengo ya kale, mu mazuŵa agho Chiuta wakaŵira mulinda wane.

³Apo nyali yakhe yikaŵaliranga pa ine, ndipo na ungweru wakhe nkhendanga mu mdima.

⁴Ndiŵenge umo nkhaŵira mu mazuŵa gha unyamata wane, apo wenenawene wane na Chiuta ukavikiriranga hema lane,

⁵para Mwenenkhongono zose wakaŵa wachali nane, ndipo ŵana ŵane ŵakakharanga kuzingirizga ine,

⁶apo ng'ombe na mbuzi zane zikaperekanga mkaka unandi, makuni gha maolive ghakameranga nanga ndi mu jarawe.

⁷“Para nkharutanga ku chipata cha mu msumba, na kukhara pamoza na ŵararaŵarara pa mphara,

⁸ŵanyamata ŵakandiwona na kupatuka, ndipo ŵararaŵarara ŵakawuka na kwimilira,

⁹nduna zikachetama waka, zikajara pa milomo yawo na mawoko ghawo,

¹⁰ŵarongozgi ŵakakhara waka chete, malulimi ghawo ghakademerera ku chavu.

¹¹“Yose uyo ŵakapulika vya ine, wakati ndine wakutumbikika, ndipo yose uyo wakandiwona, wakandirumbanga,

¹²chifukwa nkhathaskanga ŵakavu awo ŵakaliranga wovwiri, na kovwira ŵalanda awo ŵakaŵavye wakuŵawovwira.

¹³Munthu uyo ŵakaŵa pafupi kufwa wakanditumbikanga, vyokoro nkhavikondweskanga kuti vimbe sumu.

¹⁴Nkhuvwara urunji kuŵa nga ndi chakuvwara chane, weruzgi wakunyoroka kuŵa munjilira na chipewa chane.

¹⁵Ine nkhaŵa nga ndi maso ku ŵachiburumutira, ndipo nga ndi malundi ku ŵakupendera.

¹⁶Awo ŵakaŵa ŵakavu nkhaŵa nga ndi wiskewo, ndipo awo ŵakaŵa ŵalendo nkhaŵayimilira pa mirandu yawo.

¹⁷Nkhaswa vibwanyu vya ŵanthu ŵaheni, ndipo nkhaŵathaska ku mino gha awo ŵakaŵakora.

¹⁸“Ine nkhapima kuti ndifwirenge mu nyumba yane, kuti ndandanyiske mazuŵa gha umoyo wane nga ndi muchenga.

¹⁹Nkhaŵa nga ndi khuni ilo misisi yakhe yathazira ku maji, ilo minthavi yakhe yili na jumi usiku wose.

²⁰Nkhaŵa wakuchindikika nyengo yose, nkhaŵa na nkhongono nga ndi uta uphya nyengo zose.

²¹“Ŵanthu ŵakategherezga kwa ine, na kulindizga, iwo ŵakakhara chete kuti ŵapulike urongozgi wane.

²²Para ine ndayowoya, iwo ŵakayowoyangaso chara, mazgu ghane ghakaŵakhorweskanga.

²³Ŵakandilindizga ine nga ŵanthu ŵakulindizga vura, ŵakayasamula milomo yawo, nga ndi awo ŵakulindizga vura ya chifuku.

²⁴Nkhaŵamwemweterera para iwo ŵakaŵavye chigomezgo, kuŵala kwa chisko chane, kukaŵapanga nkhongono.

²⁵Ine nkhaŵasankhira nthowa yawo, ndipo nkhaŵa nga ndi sekuru wawo. Nkhakhara nga ndi karonga, pakati pa ŵasilikari ŵakhe. Nkhaŵa nga ndi msanguruski pakati pa ŵakulira.