Read new_tumbuka_bible Yobe 3 Bible Online

Yobe 3 - new_tumbuka_bible bible

Yobe 3

¹Pamanyuma pa cheneichi, Yobe wakamba kuyowoya na kutemba zuŵa ilo wakababiwira.

³“Limare nkhanira zuŵa ilo ine nkhababiwira. Umare nkhanira usiku uwo amama ŵakatorera nthumbo pa ine.

⁴Zuŵa leneilo lizgoke la mdima. Chiuta wa kuchanya wareke kulighanaghanaso, ungweru nawo ureke kuŵalira pa zuŵa leneilo.

⁵Zuŵa ili liŵe la mdima na la chisi chikuru. Maŵingu ghalibenekerere, ndipo mdima wa zuŵa ili uliwofye.

⁶Mdima wa bii uwubenekerere usiku wenewura, usiku ura ureke kupendekera, pamoza na mazuŵa gha mu chirimika. Ureke kupendekera, pamoza na mazuŵa gha pa mwezi.

⁷Inya usiku wenewura uŵe nga nchumba, kureke kupulikikwaso chiwawa cha chikondwerero.

⁸Ŵawutembe usiku uwu, awo ŵakumanya kutemba zuŵa, awo ŵakumanya kuwuska chikoko chakofya cha mu nyanja chira.

⁹Nyenyezi za ku matandakucha zireke kuŵala, usiku uwu ulindilire ungweru, kweni kuti uŵengeko chara, nanga nkhuwonaso marazi gha mulenje.

¹⁰Usiku uwu utembeke, pakuti ukareka kujara nthumbo ya amama, nanga nkhubisa visuzgo kwa ine.

¹¹“Kasi nkharekerachi kufwa apo nkhababikiranga, panji kufwa apo nkhati babike waka?

¹²Kasi nchifukwa uli amama ŵakandikumbatira? Ŵakandipirachi bere kuti ndonkhe?

¹³Ndifwenge pa nyengo yira, mphanyi ndagona pasi mu mutende, mphanyi ndili mu tulo na kupumula waka,

¹⁴mphanyi nkhupumula, pamoza na ŵakaronga na nduna za mu charu, awo ŵakazengaso pa mahami gha kale,

¹⁵mphanyi nkhupumula pamoza na nduna izo zikaŵa na golide, izo zikazuzga nyumba zawo na siliva.

¹⁶Panji nkharekerachi kuŵa nga ndi nthayo, iyo yikuŵikika waka, nga nkhabonda kambula kuwonapo ungweru.

¹⁷Ku dindi ŵaheni kuti ŵakusuzgaso chara, kwenekura ŵanthu ŵakuvuka ŵakupumula.

¹⁸Kwenekura ŵakayidi ŵakukhara pamoza mu mutende, ŵakupulikaso mazgu gha ukari gha kapitawe chara.

¹⁹Kwenekura kukusangika ŵapasi na ŵapachanya wuwo, ndipo muzga ndi mwanangwa ku sekuru wakhe.

²⁰“Chifukwa uli ungweru ukuŵalira ŵanthu awo mbakusuzgika, ndipo umoyo ukuperekeka kwa awo mtima ukuŵinya?

²¹Iwo ŵakuyinwekera nyifwa, kweni kuti ŵakufwa chara, ŵakuyipenjisiska kuruska usambazi wakubisika.

²²Iwo ŵakusekerera chomene, ndipo ŵakukondwa para ŵakuŵikika mu dindi.

²³Chifukwa uli umoyo ukupika kwa munthu, uyo nthowa yakhe yabisika, uyo Chiuta wamuzingirizga na visuzgo kosekose?

²⁴Mu malo mwakuti ndirye chakurya, nkhulira waka, mitampho yikurekezga chara nga ndi maji.

²⁵Chinthu icho nkhopa, ndicho chikwiza pa ine, icho nkhutenthema nacho, ndicho chikundiwira.

²⁶Ine kuti ndili mu mutende chara, nanga ndi kuŵa wakufwasa. Ine kuti nkhupumula chara, kweni suzgo pera ndiyo yikundizira.”