Read new_tumbuka_bible Yobe 30 Bible Online

Yobe 30 - new_tumbuka_bible bible

Yobe 30

¹“Kweni sono ŵakundiseka waka, ŵanthu awo mbana kwa ine. Ŵawiskewokuru ŵakaŵa ŵakuyuyuka, mwakuti ŵakaŵa pamoza na ncheŵe, zakusungilira mberere na mbuzi zane.

²Ŵanthu aŵa mbambula chandulo kwa ine, pakuti nkhongono zawo zili kumara kale.

³Ŵakaŵa ŵakumalirathu na kughanda na njara, ndipo ŵakaryanga misisi ya makuni, iyo ŵakajimanga mu viparamba na usiku.

⁴Ŵakayaŵanga derere na mahamba gha vivwati, ŵakaryanga misisi ya makuni gha vyeyo.

⁵Ŵakachimbizgika kufumamo mukati mu ŵanthu, ŵakaŵapomeranga nga ndi para mbankhungu.

⁶Ŵakakharanga mu mabuwu gha tumironga, mu zimphanji na mu michembo.

⁷Ŵakaliranga nga ndi vikoko vya ku thengere, ndipo ŵakawungananga musi mu makuni gha minga.

⁸Ŵakaŵa ŵakupusa, ŵanthu ŵambula mazina, ndipo wakaŵafumiskamo mu charu.

⁹“Ndipo sono ine ndazgoka sumu yawo waka, ndazgoka kuŵa chinthanguni kwa iwo.

¹⁰Ŵakundinyanyara na kuŵa kutali na ine, kundifunyira mata ku maso, kuti ŵakuchedwa chara.

¹¹Pakuti Chiuta wagowozga lukuzi lwa uta wane na kundiyuyura, ŵakujikora chara mu kayowoyero kawo.

¹²Ŵanthu ŵawakawaka ŵakundiwukira ku woko lane la maryero. Ŵakuchita kuti ine ndichimbire, ndipo ŵakunozgekera nthowa umo wangandiparanyira.

¹³Ŵakujanda nthowa yane, ŵakukhumba kuti ŵandiparanye. Palije na yumoza wakuŵakanizga.

¹⁴Ŵakunjira mwa ine nga ndi para wakuporota, ŵakwiza na kuvindinyekezga nda munthu wakumara.

¹⁵Wofi wandiwira ine. Nchindi zane zafumako nga ndi mphepo, usambazi wane wazgeŵerekera nga ndi bingu.

¹⁶“Ndipo sono ndakweŵezuka chomene, mazuŵa gha visuzgo ghandikora.

¹⁷Viwangwa vyane vikuŵinya usiku, kuŵinya kwa kuchita kugwaza kuti kukureka chara.

¹⁸Nkhongono gha matenda ghananga malaya ghane, ghakundijara nga ndi singo ya malaya.

¹⁹Chiuta wali kunditaya ine mu mathipa, ndipo ndazgoka nga ndi fuvu na vyoto.

²⁰Ine nkhulirira kwa imwe, mwe Chiuta, kweni kuti mukundizgora chara, nkhwimilira na kuŵeyerera, kweni kuti mukulorako chara.

²¹Mwazgoka kuŵa ŵankhaza kwa ine, mwandisuzga na woko linu lankhongono.

²²Mwandinyamulira muchanya na kundiŵika pa mphepo, mukundiponya uku na uku mu chimphupuru.

²³Nadi, nkhumanya kuti munditorere ku nyifwa, ku malo uko kuli kunozgekera ŵamoyo wose.

²⁴“Ndipouli munthu uyo wali mu visuzgo asi wakuwuska woko lakhe, ndipo para wali mu viphyo, asi wakulira kuti wovwirike?

²⁵Asi ine nkhalira nawo awo ŵakaŵa mu visuzgo? Asi ine nkhaŵa na chitima na awo ŵakaŵa ŵakavu?

²⁶Kweni apo nkhakhazganga uweme, uheni ndiwo ukizanga. Apo nkhalindirilanga ungweru, mdima ndiwo ukiza.

²⁷Mtima wane ukukweŵezuka, kuti uli mu mutende chara. Mazuŵa ghose nkhuŵa mu visuzgo.

²⁸Nkhwendendeka waka mu mdima, kwambula na ungweru wuwo. Nkhwimilira mu maungano na kuromba wovwiri.

²⁹Ndili mwana munyakhe wa ŵakambwe, na mubwezi wa ŵaphururu.

³⁰Chikumba chane chikuzgoka chifipa ndipo chikususuwuka, ndipo viwangwa vyane vikuphya na chithukivu.

³¹Chiding'indi chane chikutengera waka, ndipo fyoliro wane wazgoka mazgu gha awo ŵakutengera.