Read new_tumbuka_bible Yobe 31 Bible Online

Yobe 31 - new_tumbuka_bible bible

Yobe 31

¹“Ine nkhachita phangano ku ndamwene, sono kasi ndingalaŵiska uli ku mwali wakulangwa?

²Kasi phande la munthu ndi vichi, kufumira kwa Chiuta kuchanya? Kasi chiharo cha munthu ndi vichi, kufumira kwa Mwenenkhongono zose kuchanya?

³Asi pharaniko likuwira awo ŵakwananga, asi soka likuwira awo ŵakuchita uheni?

⁴Asi Chiuta wakuwona nthowa zane, na kupenda mendero ghane ghose?

⁵“Usange ndendanga mu utesi, usange malundi ghane ghakuchimbilira ku upusikizgi.

⁶Rekani Chiuta wandipime ine, mu mweso wakuyana makora, ndipo wati wamanye kuti ndine wakunyoroka.

⁷Usange ndapatutako kufuma mu nthowa, usange mtima wane wadokerapo viheni, usange uheni wademerera ku mawoko ghane,

⁸penepapo munyakhe warye ivyo ndapanda ndipo mbewu izo ndili kupanda zizgurike.

⁹“Usange mtima wane uli kupusikikapo na mwanakazi, usange ndili kukhazgapo muwoli wa muzengezgani wane pa muryango,

¹⁰ipo muwoli wane waphikire mwanarume munyakhe, ndipo ŵanarume ŵanyakhe wagone nayo.

¹¹Pakuti cha ntheura ndi mrandu uheni chomene, ndi ubendezi wakulangika na ŵeruzgi.

¹²Pakuti cha ntheura ndi moto, wakumyangura mpaka ku malo gha pharaniko, ndipo ungamanya kocherathu vyose ivyo ndasakata mpaka na ku misisi wuwo.

¹³“Usange ndili kukanapo kweruzga makora mrandu wa muteŵeti wane mwanarume panji mwanakazi, para ŵakiza kadandaula kwa ine,

¹⁴kasi ine ndizamkuchitachi, para Chiuta wizamkwimikana nane? Kasi ndizamkuzgorachi, para iyo wizamkundifumba kuti ndandurepo?

¹⁵Asi uyo wakalenga ine mu nthumbo ya mama, ndi mweneuyo wakalengaso na iwo wuwo? Asi yumoza ndiyo wakalenga tose mu nthumbo za amama?

¹⁶“Ine ndindarekepo kupereka icho mukavu wakakhumbanga, nesi kugongoweskapo vyokoro ivyo vikakhumbanga wovwiri.

¹⁷Ine ndindaryepo ndekha chakurya chane, kwambula ŵalanda kuryako.

¹⁸Pakuti kufuma ku wanichi wane nkhamulera nga ndi wiske, ndipo kufuma apo nkhababikira kwa amama, nkharongozganga vyokoro.

¹⁹“Usange nkhawonapo yunji wakusuzgika na nkhule, panji mukavu wambula vyakuvwara,

²⁰usange iyo wakaŵavye chifukwa chakundiwongera, pakuti nkhamufundiska na malaya, gha maweya gha mberere zane,

²¹usange nkhawuskapo woko lane kwimikana na ŵalanda chifukwa nkhawona wovwiri ku mphara,

²²ipo mukhono wane uwukemo mu chiŵegha chane, woko lane nalo likhurike mu marunga ghakhe.

²³Pakuti ine nkhopanga suzgo kufuma kwa Chiuta, ndipo nkhatondeka kwima, panthazi pa ufumunkhuru wakhe.

²⁴“Usange ndazgora golide kuŵa chigomezgo chane, panji golide lakwengeka makora kuŵa chakweghamiramo chane,

²⁵usange ndakondwa pakuti usambazi wane ngukuru, panji pakuti nkhasakata vyuma vinandi,

²⁶usange ndili kulambirapo dazi mu kuŵala kwakhe, panji mwezi apo ukwenda mu uchindami wakhe,

²⁷ndipo mtima wane ukapusikika mu ubende kuti ndivilambire, ndiposo woko lane likafyofyontha woko lane pakuvichindika,

²⁸uwu nawo waŵanga ubendezi wakulangika na ŵeruzgi, pakuti mphanyi ndanguŵa mutesi kwa Chiuta kuchanya.

²⁹“Ine ndindasekererepo pa pharaniko la murwani wane, nanga nkhujitukumura para chiheni chamusanga.

³⁰Ine ndindanangepo na mlomo wane, pakutemba murwani wane kuti wafwe.

³¹Ŵa mu hema lane ŵandayowoyepo kuti, ‘Kasi ndi njani wandaryepo chakurya chakhe?’

³²Mulendo wandagonepo mu msewu, pakuti nkhajula miryango kwa uyo wakwenda mu nthowa.

³³Ine ndindabisepo majuvyo ghane ku ŵanthu, pakubisa zakwananga zane mu mtima wane,

³⁴pakuti nkhopanga chomene mzinda wa ŵanthu, ndipo muyuyuro wa ŵa mu mbumba yane ukandofya, mwakuti nkhakhara waka chete, ndipo kuti nkhafumira kuwaro kwa nyumba chara.

³⁵“Mbaya mwe, kuŵenge munthu wakundipulika! Nkhurapa nadi, kuti mbunenesko. Rekani Chiuta Mwenenkhongono zose, ndiyo wandizgore. Munthu uyo wakwimikana nane, walembe mrandu wakhe mu buku.

³⁶Nadi, mphanyi ndanguwuyegha pa chiŵegha chane, ndipo mphanyi ndanguwukakilira ku mutu nga ndi mphumphu.

³⁷Mphanyi ndangumwandulira Chiuta mendero ghane ghose. Nga ndi karonga, mphanyi ndangumufika.

³⁸“Usange charu chane chilirenge kwimikana nane, masara ghakhe ghose ghakusinginika kulira masozi,

³⁹usange ine nkharyapo chakurya kwambula kulipira, panji kukomeskapo ŵanji, awo ŵakalimanga mu munda,

⁴⁰ipo minga yimere mu malo mwa tirigu, lumamba lumere mu malo mwa nyauti.” Mazgu gha Yobe ghamalira apa.