Read new_tumbuka_bible Yobe 32 Bible Online

Yobe 32 - new_tumbuka_bible bible

Yobe 32

¹Pa umaliro, ŵabwezi ŵatatu ŵara ŵakareka kumuzgora Yobe chifukwa wakajipima kuŵa murunji.

²Pamanyuma Elihu, mwana wa Barakele, wa fuko la Buzi, wa mbumba ya Ramu wakamukwiyira Yobe pakujipima kuŵa murunji, Chiuta chara.

³Iyo wakaŵakwiyiraso ŵabwezi ŵatatu ŵa Yobe ŵara chifukwa ŵakatondeka kumususka pakumupa zgoro liweme, kweni kumuphalira kuti ngwakwananga.

⁴Elihu wakakhara chete apo ŵakayowoyanga ŵabwezi ŵatatu ŵara ŵa Yobe chifukwa ŵakaŵa ŵarara kuruska iyo.

⁵Para Elihu wakawona kuti ŵabwezi ŵatatu ŵara ŵalije na chilichose icho ŵangamuzgora, ukari wakhe ukakwera chomene.

⁶Penepapo Elihu, mwana wa Barakele, wa fuko la Buzi wakati, “Ine ndine mwana muchoko, imwe ndimwe ŵarara. Ine nkhaŵavye chikanga ndipo nkhopanga, kuti ndiphare maghanoghano ghane kwa imwe.

⁷Ine nkhatenge ŵararaŵarara ndiwo ŵayowoyenge, ŵamwaka ndiwo ŵasambizgenge mahara.

⁸Kweni ndi mzimu uwo uli mu munthu, muvuchi wa Mwenenkhongono zose, ndiwo ukumupa munthu mahara.

⁹Kuti ndi ŵarara pera chara, awo ŵali na mahara. Kuti ndi awo ŵali na virimika vinandi pera chara, awo ŵakumanya icho nchiweme.

¹⁰“Ntheura ine nkhuti, ‘Tegherezgani kwa ine, rekani nane ndimuphalirani maghanoghano ghane.’

¹¹Ine nkhakhara chete apo mukayowoyanga, nkhategherezganga ku mazgu ghinu gha mahara, apo mukapenjereranga icho mungayowoya.

¹²Nkhamutegherezgani chomene, kweni pakaŵavye uyo wakasuska mazgu gha Yobe, nesi uyo wakamuzgorapo mazgu ghakhe.

¹³Chenjerani, mzire muyowoye kuti, ‘Mahara tili kughasanga.’ Uyo wangamususka Yobe ndi Chiuta, kuti ndi munthu chara.

¹⁴Yobe wandayowoyepo mazgu ghakwimikana nane, ndipo ine ndimuzgorenge chara, nga ndi umo mwamuzgolera imwe.

¹⁵“Ŵabwezi ŵako aŵa ŵatimbanizgika, ŵalije mazgu ghakuti ŵaphare.

¹⁶Kasi sono ndilindizge, pakuti ŵareka kuyowoya, pakuti ŵakhara chete, kwambula kuzgorapo kalikose?

¹⁷Ine nane nditi ndiyowoye maghanoghano ghane, nditi ndiphare icho nkhuchimanya.

¹⁸Pakuti ine nane ndili na mazgu ghanandi ghakuyowoya, mtima wane ukundipemberezga kuti mpaka ndiphare.

¹⁹Nadi, mtima wane wazura na maghanoghano, nga ndi vinyo lambula pakufumira. Uli nga ndi mathumba ghaphya gha vinyo, agho ghali pafupi kuphumuka.

²⁰Ine nkhwenera kuyowoya kuti mtima wane utune, nkhwenera kuzgorapo pa makani agha.

²¹Ine kuti nditemwerenge munthu yunji chara, nanga nkhumuyowoyera mazgu, gha kumyamyatika munthu yunji.

²²Ine kuti kuyowoya mazgu ghakumyamyatika chara, kopa kuti Mlengi wane wangandimara luŵiro.