Read new_tumbuka_bible Yobe 33 Bible Online

Yobe 33 - new_tumbuka_bible bible

Yobe 33

¹“Kweni sono, iwe Yobe, pulika mazgu ghane, tegherezga chomene ku icho nditi ndiphare.

²Ine sono nditi ndiyambe kuyowoya, mazgu ghane ghali mu mlomo wane.

³Mazgu ghane ghakuphara urunji wa mtima wane, icho nkhuchimanya ndicho ndiyowoye mu unenesko.

⁴Mzimu wa Chiuta ukandilenga, muvuchi wa Mwenenkhongono zose ukandipa umoyo.

⁵Undizgore usange ungakwaniska, nozgeka makora fundo zako na kundisuska.

⁶Ine nane ndili nga ndiwe panthazi pa Chiuta, ine nane nkhawumbika kufuma mu dongo.

⁷Iwe ukwenera kopa ine chara, nkhongono yane yireke kukofya.

⁸“Nadi uli kuyowoyapo ine nkhupulika, mazgu ghako nkhaghapulika nadi.

⁹Iwe uti, ‘Ine ndine wakuphotoka na wambula kwananga, ndine muweme, ndipo mulije ubendezi mwa ine.

¹⁰Ndipouli Chiuta wakusanga vifukwa mwa ine, wakundipima ine kuŵa murwani wakhe.

¹¹Iyo wakukaka malundi ghane na magwede, ndipo wakuŵanika nthowa zane zose.’

¹²“Pa ichi, nkhukuphalira kuti, ukayowoya icho nchiweme chara, pakuti Chiuta ndi mukuru kuruska munthu.

¹³Kasi nchifukwa uli ukusinginika kwa iyo, kuti iyo wazgorengepo mazgu ghako chara?

¹⁴Chiuta wakuyowoya mu nthowa zakupambanapambana, kweni munthu kuti wakuzipanikizga chara.

¹⁵Chiuta wakuyowoya mu maloto, mu mboniwoni ya usiku, para ŵanthu ŵali mu tulo tuzitu, para ŵakusiwa pa vitara vyawo.

¹⁶Penepapo Chiuta wakuŵajula makutu ghawo, ndipo wakuŵawofya na kuŵachenjezga,

¹⁷kuti wamuwezgeko munthu ku kuchita uheni, na kumukanizga kuti wareke kujikuzga.

¹⁸Wakumuwezgako munthu ku dindi, na kuti wareke kwambuka mronga wa nyifwa.

¹⁹Chiuta wakumulanga munthu na vyakuŵinya, ivyo vikukhalirira mu viwangwa vyakhe.

²⁰Ntheura umoyo wakhe ukutinkha chakurya, ndipo wakunyanyara na chakurya chakunowa wuwo.

²¹Thupi lakhe likughanda na kumara, ndipo viwangwa vyakhe ivyo vikawonekanga chara vikufumira kuwaro.

²²Mzimu wakhe ukusenderera ku dindi, ndipo umoyo wakhe ku awo ŵakumutorera ku nyifwa.

²³“Ndipouli para pangaŵa mungelo, kuchiri kwakhe, nga ndi mphemaniski, yumoza wa ŵangelo chikwi chimoza, kuti wamuphalire munthu icho nchiweme kwa iyo,

²⁴ndipo para mungelo yura wamulengera lusungu, na kuyowoya kuti, ‘Muthaskeni kuti wareke kuruta ku dindi, chakuwombolera umoyo wakhe ndachisanga,’

²⁵penepapo thupi lakhe liwereremoso nga nda mwana, iyo waŵeso na nkhongono nga za mu mazuŵa gha mu uwukirano wakhe.

²⁶Penepapo wakuromba kwa Chiuta, ndipo wakumupulika. Wakwiza panthazi pa Chiuta na kwimba na chimwemwe, ndipo Chiuta wakuwezgerapo urunji wakhe wa pakudanga.

²⁷Ntheura wakuyowoya panthazi pa ŵanthu, wakuti, ‘Ine nkhananga, na kubendezga icho chikaŵa chiweme, kweni Chiuta wali kundigowokera.

²⁸Iyo wandiwombola kuti ndireke kuruta ku dindi, ndipo ine nditi ndiwonengeso ungweru.’

²⁹“Chiuta wakuchita kaŵirikaŵiri vinthu vyose ivi kwa munthu.

³⁰Iyo wakuchita ntheura kuti wamuwezgeko ku dindi, mwakuti wawone ungweru wa umoyo.

³¹“Iwe Yobe tegherezga kwa ine, khazga kuti upulike, ukhare chete, ine nditi ndiyowoye.

³²Iwe undizgore, usange uli na kanthu kakuyowoya, yowoya, pakuti nkhukhumba kukudapizga.

³³Usange ulije chakuyowoya, tegherezga kwa ine, ukhare chete, ine ndikusambizge umo mahara ghaliri.”