Read new_tumbuka_bible Yobe 34 Bible Online

Yobe 34 - new_tumbuka_bible bible

Yobe 34

¹Elihu wakarutilira ukuyowoya wakati,

²“Pulikani mazgu ghane, imwe mwa ŵanthu ŵamahara. Tegherezgani kwa ine, imwe mukumanya vinthu.

³Pakuti khutu likuyezga mazgu, nga ndi umo lulimi lukuchetera chakurya.

⁴Tiyeni tighanaghane kusankha icho nchakunyoroka, na kudumula pamoza icho nchiweme.

⁵“Pakuti Yobe wakuti, ‘Ine ndilije kalema, kweni Chiuta wakukana kunderuzga mu urunji.

⁶Nangauli ndine murunji, nkhupimika kuŵa mutesi. Nangauli ndine wambula kwananga, nkhupwetekeka mu vilonda vyambula kupora.’

⁷Kasi ndi njani uyo wakuyana na Yobe, mweneuyo wakumwa muyuyuro nga ndi maji?

⁸Iyo wakwenda pamoza na ŵanthu ŵakuchita uheni, na kutorerako mendero gha ŵakwananga.

⁹Pakuti iyo wakuti, ‘Munthu kuti chikumwandulira kanthu chara, para wakukhumba kuŵa mubwezi wa Chiuta.’

¹⁰“Ntheura pulikani kwa ine, imwe mwa ŵanthu ŵamahara, Chiuta kuti wakwananga chara, Mwenenkhongono zose kuti wakupuvya chara.

¹¹Chiuta wakupereka njombe ku munthu, kwakuyana na ivyo wakuchita. Chiuta wakumupa malipiro munthu, kwakuyana na nthowa zakhe.

¹²Nadi, Chiuta kuti wangachita chiheni chara, Mwenenkhongono zose, wakubendezga weruzgi wakunyoroka chara.

¹³Kasi ndi njani uyo wali kumupako Chiuta, mazaza ghakuwusira charu? Kasi ndi njani wakaŵika charu chose cha pasi, kuŵa pasi pa iyo?

¹⁴Usange Chiuta wangatoraso mzimu wa munthu, kuwezgeraso muvuchi wakhe kwa iyomwene,

¹⁵vyamoyo vyose vingafwira pamoza, ndipo munthu wangawereraso ku fuvu.

¹⁶“Usange muli na mahara, pulikani ichi, tegherezgani icho nkhuyowoya.

¹⁷Kasi uyo wakutinkha ŵeruzgi wakunyoroka, wangawusa charu? Kasi ungamususka Chiuta Murunji, Mwenenkhongono zose?

¹⁸Asi ndi Chiuta uyo wakususka ŵakaronga kuti, ‘Imwe ndimwe ŵawakawaka.’ Ndipo na ŵarongozgi ŵakhe kuti, ‘Ndimwe ŵanthu ŵakwananga.’

¹⁹Chiuta kuti wakutemwera awo mbararaŵarara chara, nesi ŵasambazi kuruska ŵakavu chara, pakuti wose ndi awo wakaŵalenga na mawoko ghakhe.

²⁰Mu kanyengo kachoko waka ŵakufwa, na usiku pakati, ŵakutoreka na kuruta ku nyifwa. Ndipo vinkhara navyo vikutoreka, kwambula na yumoza wakuvipokeska.

²¹“Pakuti Chiuta wakulaŵiska mendero gha ŵanthu, wakuwona vyose ivyo wakuchita.

²²Kulije mdima panji munkhorwe, uko ŵakuchita uheni ŵangabisamako.

²³Chiuta kuti wali kumwimikira munthu nyengo chara, yakuti wangarutira panthazi pa Chiuta na kweruzgika.

²⁴Wakubwangandulankhongono za vinkhara, kwambula kufumba munthu, ndipo wakwimika ŵanyakhe mu malo ghawo.

²⁵Chifukwa wakumanya ivyo wakuchita, wakuŵagadabulira pasi na usiku, ndipo ŵakuphwanyika.

²⁶Wakuŵalanga chifukwa cha uheni wawo, ndipo ŵanthu wose wakuŵawona,

²⁷chifukwa ŵapatukako kureka kurondezga Chiuta, ndipo ŵakupwererako nthowa zakhe chara.

²⁸Iwo ŵakuchitiska ŵakavu ŵalirire kwa Chiuta, ndipo iyo wakapulika kulira kwa ŵakusuzgika ŵara.

²⁹Usange Chiuta wakhara waka chete, kasi ndi njani uyo wangamususka. Usange Chiuta wangajibisa, kasi ndi njani uyo wangamuwona? Ndipouli ndiyo wakuwusa munthu na mafuko wuwo,

³⁰mwakuti munthu wambula kopa Chiuta wareke kuwusa, kuti wareke kupuruska waka ŵanthu.

³¹“Kasi walipo uyo wali kuyowoyapo kwa Chiuta kuti, ‘Ine nkhulanguruka kuti ndinangengeso chara.

³²Mundirongore icho nkhutondeka kuchiwona, usange ndili kwanangapo, kuti ndizamkwanangaso chara.’

³³Kasi Chiuta wakugowokera umo iwe ukukhumbira, apo iwe ukukana kurapa? Iwe ndiwe ukwenera kusankha kuti ndine chara, sono ndiphalire icho ukughanaghana.

³⁴“Ŵanthu awo ŵakumanya ŵizamkuti kwa ine, ŵamahara awo ŵakundipulika ŵizamkuti kwa ine,

³⁵‘Yobe wakuyowoya kwambula kumanya, mazgu ghakhe nga mahara chara.’

³⁶Kwanguŵa kuweme kuti Yobe, mphanyi wanguyezgeka chomene, pakuti wakuzgora nga ndi ŵanthu ŵaheni.

³⁷Pakuti ku uheni wakhe wakusazgirako uchigaruka, wakujikuzga na ivyo wakuyowoya, wakwandaniska mazgu ghakwimikana na Chiuta.”