Read new_tumbuka_bible Yobe 35 Bible Online

Yobe 35 - new_tumbuka_bible bible

Yobe 35

¹Elihu wakarutilira kuyowoya wakati,

²“Iwe Yobe, kasi ukughanaghana kuti ukuyowoya makora, para ukuti, ‘Ine ndine murunji panthazi pa Chiuta.’

³Ndipouli ukufumba Chiuta kuti, ‘Kasi ichi chili na chandulo uli kwa ine? Kasi ine nkhwandurapochi para nkhureka kwananga.’

⁴“Ine nkhukhumba kukuzgora iwe Yobe, na kuzgoraso na ŵabwezi ŵako wuwo.

⁵Iwe Yobe, laŵiska ku mtambo, kuti uwone, laŵiska ku maŵingu agho ghali pachanya pa iwe.

⁶Usange wananga, kasi ichi chikumukhwaska uli Chiuta? Usange ubendezi wako wandana, kasi ichi nchinthu uli kwa iyo?

⁷Usange ndiwe murunji, kasi Chiuta ukumupa vichi? Panji kasi wakupokerera kanthu uli, kufuma mu mawoko ghako?

⁸Uheni wako ukukhwaska munthu nga ndi iwe, ndipo urunji wako ukukhwaska mwana wa munthu.

⁹“Ŵanthu ŵakulira chifukwa chakunyekezgeka. Iwo ŵakuchemerezga kuti wovwirike, chifukwa cha nkhongono ya ŵamazaza.

¹⁰Kweni palije na yumoza wakufumba kuti, ‘Kasi Chiuta, Mlengi wane wali nkhu, uyo wakutovwira nanga mungaŵa mu mdima wa visuzgo,

¹¹uyo wakusambizga ise vinthu vinandi, kuruska vikoko vya mu charu, uyo wakutizgora ise kuŵa ŵamahara kuruska viyuni vya mudera?’

¹²Ŵanthu ŵakulira kweni kuti wakuŵazgora chara, chifukwa cha kujikuzga kwa ŵanthu ŵaheni.

¹³Nadi, Chiuta kuti wakupulika kulira kwa waka chara, Mwenenkhongono zose kuti wakupwererako chara.

¹⁴Kasi sono wangakupulika uli, apo ukuyowoya kuti ukumuwona chara? Ndipouli mrandu wako uli panthazi pakhe, ndipo iwe ukulindirira kuti wawudumure.

¹⁵Ipo sono, pakuti ukari wakhe kuti ukulanga chara, ndipo kuti wakupwererako viŵi chara na ubendezi wa ŵanthu,

¹⁶iwe Yobe, ukuyowoya mazgu ghawakawaka, ukuyowoya mazgu ghanandi ghambula mahara.”