Read new_tumbuka_bible Yobe 36 Bible Online

Yobe 36 - new_tumbuka_bible bible

Yobe 36

¹Ndipo Elihu wakarutilira kuyowoya kuti,

²“Uzike pachoko waka pakuti ine nditi ndiyowoye, pali vinandi vyakuti ndikuyowoyera, mu malo mwa Chiuta.

³Ine nkhusanga mahara ghane kufuma kutali, nditi ndiphare urunji wa Chiuta Mlengi wane.

⁴Nadi mazgu agho nkhuyowoya nga utesi chara, uyo ngwa kufikapo mu mahara wali pamoza nawe.

⁵“Chiuta ngwa nkhongono, ndipo wakuyuyura munthu chara, ngwa kuruska mu nkhongono za kumanya.

⁶Ŵaheni kuti wakuŵasungilira kuŵa na umoyo chara, kweni awo ŵakusuzgika wakuŵachitira mu urunji.

⁷Chiuta kuti wakureka kuŵawona ŵarunji chara, kweni wakuŵakharika pa chizumbe nga mbakaronga, ndipo ŵakuchindikika kwa muyirayira.

⁸Usange ŵanthu ŵakakika na maunyoro, ndipo ŵakusuzgika chifukwa cha ivyo wakachita,

⁹penepapo Chiuta wakuŵarongora milimo yawo yiheni iyo ŵakachita mu kujikuzga.

¹⁰Wakuŵajula makutu kuti wategherezge ku visambizgo, ndipo wakuŵalangula kuti ŵawereko ku uheni wawo.

¹¹Usange ŵakumupulikira na kumuteŵetera, ŵati ŵamarizgenge mazuŵa gha umoyo wawo mu usambazi, ndipo virimika vyawo mu kufwasa.

¹²Kweni usange ŵakureka kupulikira, ŵati ŵambuke mronga wa nyifwa, ŵafwenge kwambula kumanya kalikose.

¹³“Munthu wambula kopa Chiuta mu mtima, wakusungilira ukari. Para ŵakuŵakaka na maunyoro, iwo kuti ŵakuromba wovwiri chara.

¹⁴Ŵakufwa ŵachali ŵawukirano, ndipo umoyo wawo ukuyuyuka na ŵanthu wose.

¹⁵Kweni Chiuta wakuthaska ŵanthu ŵakusuzgika, kwizira mu visuzgo vyawo, ndipo wakujula makutu ghawo pakuŵapa visuzgo.

¹⁶“Nanga ndiwe mphanji wakuwuskamo mu visuzgo, mphanji wakutorera pa malo ghasani, apo palije na kufinyirizgika, ndipo mphanji wakukusangiska vyakurya viweme.

¹⁷Kweni sono wakunyekezga na weruzgi chifukwa cha uheni, weruzgi wakunyoroka wa Chiuta ndiwo wakusanga.

¹⁸Uchenjere mzire usambazi ukupusike, ndipo ureke kupuruskika na vimbundi vinandinandi.

¹⁹Kasi kulira kwako kungakovwira kuti ufumemo mu visuzgo? Kasi nkhongono zako, zingakuthaska ku visuzgo vyako?

²⁰Ureke kunwekera kuti usiku wize, pakuti ndi nyengo iyo ŵanthu ŵakumalira.

²¹Uchenjere, ureke kuzgokera kukuchita uheni, chifukwa kukuchita uheni, ndiko kukwiza na visuzgo ivi.

²²“Manya kuti Chiuta ngwa kukwezgeka mu nkhongono, kasi ndi musambazi nju uyo wakuyana na iyo?

²³Kasi ndi njani wali kumunozgera Chiuta nthowa zakhe, panji kumususka kuti, Iwe wananga?”

²⁴Kumbuka kurumba milimo ya Chiuta, iyo ŵanthu ŵayirumba mu sumu.

²⁵Ŵanthu wose ŵakuyiwona milimo iyi, kweni wakuyiwonera kufuma kutali.

²⁶Nadi, Chiuta ndi mukuru chomene, ise kuti tikumumanya chara. Unandi wa virimika vyakhe ngwambula mapendeko.

²⁷“Chiuta ndiyo wakukwezga manthonyezi gha maji, ndipo wakusongonora maŵingu kuŵa vura.

²⁸Maŵingu ghakurokweska vura, ndipo yikurokwera pa ŵanthu yinandi chomene.

²⁹Kasi walipo uyo wangamanya, umo maŵingu ghakutandazgikira, panji kududumira kwa ŵaleza uko wakukhara Chiuta?

³⁰Chiuta wakutandazga ŵaleza kuchanya kose, mpaka ŵakuŵara pasi pa nyanja.

³¹Pakuti mwa ntheura ndimo wakuwusira mafuko, na kupereka vyakurya mu unandi waka.

³²Chiuta wakukora ŵaleza na kuŵalangula kuti ŵawe apo wakukhumba.

³³Kududumira kukurongora kuti kukwiza chimphupuru, ndipo vyakuŵeta navyo vikumanya kuti chikwiza nadi.