Read new_tumbuka_bible Yobe 37 Bible Online

Yobe 37 - new_tumbuka_bible bible

Yobe 37

¹“Pa ichi, mtima wane ukumbwambwantha, ukuduka na kufumapo pa malo ghakhe.

²Tegherezgani ku kududumira kwa mazgu gha Chiuta, na ku kududumira uko kukufuma mu mlomo wakhe.

³Wakwendeska kududumira uku kuchanya kose, ndipo leza wakhe mpaka ku mphererekezgo za charu.

⁴Pamanyuma pakhe lizgu la Chiuta likundindima, ndipo wakududumira na mazgu ghakhe ghakuru. Iyo wakurekeska ŵaleza chara, para mazgu ghakhe ghakupulikikwa.

⁵Chiuta wakududumira mwakuzizwiska na mazgu ghakhe, wakuchita vinthu vikuru ivyo tingavipulikiska chara.

⁶Wakulangula chiwuvi wakuti, ‘Khilira pa charu,’ ndipo ku vura yakurokwa wakuti, ‘Urokwe pa charu na nkhongono.’

⁷Penepapo wakurekeska munthu waliyose kugwira nchito, mwakuti ŵanthu wose ŵamanye kuti Chiuta wali pa mlimo wakhe.

⁸Vinyama navyo vikuya ku malo ghawo ghakubisamamo, kuya kakhara mu michembo yawo.

⁹Kavuruvuru wakuputa kufuma ku chipinda chakhe, mphepo yakwendendeka yikwiza na kuzizima.

¹⁰Muvuchi wa Chiuta ukufumiska chiwuvi, ndipo maji gha mu zinyanja ghakukhoma gwa.

¹¹Maŵingu wakughazuzga na maji gha vura, ndipo ghakumwetuska ŵaleza ŵakhe kosekose.

¹²Chiuta wakurongozga maŵingu mwakuzingilirazingirira, kuti ghachite vyose ivyo iyo wakughalangula, pa charu chose cha pasi.

¹³Wakughalangula kulanga ŵanthu, panji kurokweska vura pa charu, panjiso kurongora chisungusungu pa ŵanthu.

¹⁴“Iwe Yobe, pulika ichi, uti waka chete, ghanaghana na milimo yakuzizwiska ya Chiuta.

¹⁵Kasi ukumanya umo Chiuta wakulangulira maŵingu, na umo wakumwetuskira ŵaleza?

¹⁶Kasi ukumanya umo maŵingu, ghakukhalira mu mlengalenga, milimo yakuzizwiska ya Chiuta, mweneuyo ngwa kufikapo mu mahara,

¹⁷iwe wa mweneiwe ukufoma mu vyakuvwara vyako, para mphepo ya ku mwera yikuputa.

¹⁸Kasi iwe Yobe ungatandaula mlengalenga nga ndi Chiuta uwo ukuŵa gwa nga ndi chisulo?

¹⁹Utisambizge icho tingamanya kumuyowoyera. Ise tilije kumanya kurongosora mrandu withu, pakuti tili mu mdima.

²⁰Kasi kukukhumbika kumumanyiska Chiuta, kuti nkhukhumba kuyowoya nayo? Asi kuchita ntheura kukuŵa nga nkhumuphalira kuti ndikomeke?

²¹Ŵanthu kuti ŵangalaŵiska ku ungweru chara, para kukuŵara chomene mu mlengalenga, para mphepo yaputa na kuwuskapo maŵingu.

²²Kung'azima kwa Chiuta nga ndi golide kukwiza kufuma ku mpoto. Chiuta wakurongora ufumunkhuru wakhe wakofya.

²³Tingafika pafupi na Mwenenkhongono zose chara. Iyo ndi mukuru mu nkhongono, na mu weruzgi wakunyoroka. Iyo ndi murunji chomene, kuti wakutindiŵizgira pasi munthu chara.

²⁴Ntheura ŵanthu ŵakumopa Chiuta. Iyo kuti wakupwererako na waliyose chara, uyo wakujipusika kuti ngwa mahara.”