Read new_tumbuka_bible Yobe 38 Bible Online

Yobe 38 - new_tumbuka_bible bible

Yobe 38

¹Penepapo FUMU yikamuzgora Yobe kufumira mu kavuruvuru yikati,

²“Ndi njani uyo wakufipiska urongozgi wane, pakuyowoya mazgu ghambula mahara?

³Vwara zikhore nga ndi mwanarume. Ine nditi ndikufumbe, ndipo iwe uti undizgore.

⁴Kasi iwe ukaŵa nkhu, para ine nkhaŵikanga lufura lwa charu? Undiphalire usange uli na mahara.

⁵Kasi ndi njani uyo wakaŵika mphaka zakhe? Asi iwe ndiwe ukumanya? Panji, ndi njani uyo wakapima na chingwe chakupimira pa charu?

⁶Kasi mizati yakhe wakayijintha pa vichi? Panji, kasi ndi njani uyo wakaŵikapo libwe la nkhorezgero ya chingodya?

⁷Pa nyengo iyo nyenyezi za mulenje zikimbanga sumu, ndipo ŵana ŵa Chiuta wose ŵakachemerezganga na chimwemwe.

⁸“Panji kasi ndi njani uyo wakujalira nyanja, para yikuti yiphumuke kufuma kusi ku charu?

⁹Nkhapanga maŵingu kuŵa chakuvwara cha nyanja, ndipo mdima wa bii kuŵa mbereko yakhe.

¹⁰Ine ndine nkhimika mphaka za nyanja, ndine nkhaŵika mphingirizgo zakhe na vijaro vyakhe.

¹¹Ine ndine nkhayowoya ku nyanja kuti, ‘Ugote apa, kurutilira chara, peneapa ndipo majigha ghako ghakujikuzga ghagotenge.’

¹²“Iwe Yobe, umo uli kuwilako, kasi uli kuwulangulapo mulenje, na kughazgora matandakucha, ghaŵeko pa nyengo yakhe,

¹³mwakuti ghakore charu chose cha pasi, na kuti ŵaheni ŵafumiskikepo pa charu?

¹⁴Kuŵala kwa matandakucha, mapiri na vidika vikuwoneka makora ndipo charu chikuroŵeka nga ndi chakuvwara.

¹⁵Ŵaheni ŵakutinkha ungweru, ndipo milimo yawo yiheni kuti ŵakuchitaso chara.

¹⁶“Kasi uli kurutako uko kuli mbwiwi za nyanja, panji kwendendeka pasi pa ndimba?

¹⁷Kasi iwe uli kurongorekapo vipata vya nyifwa? Kasi vipata vya ku malo gha ŵakufwa uli kuviwona?

¹⁸Kasi usani wa charu cha pasi iwe ukuwumanya? Undiphalire usange ukuchimanya chose ichi.

¹⁹“Kasi nthowa yakuya ku ungweru yilinkhu? Kasi uko kukukhara mdima ndi nkhu?

²⁰Kasi iwe ukumanya kutorera ivi ku malo ghawo? Kasi nthowa yakuya uko vikukhara ukuyimanya?

²¹Iwe nawe ukumanya pakuti ukaŵa wababika kale, virimika vyako navyo ndi vinandi chomene.

²²“Kasi uli kunjiramo mu nyumba umo mukusungika chiwuvi, panji mu nyumba umo mukusungika matalala?

²³Malo gheneagha ndaghasungira nyengo ya visuzgo, nyengo ya zimphindano na nkhondo.

²⁴Kasi nthowa ndi nji ya ku malo uko leza wakufuma, na kumbininikira kosekose, panji ya kweneuko mphepo ya kumafumiro gha dazi yikumbininikira kosekose mu charu cha pasi?

²⁵Kasi ndi njani uyo wali kujima mifwerenje ya vura, kasi ndi njani uyo wali kwata nthowa ya chidudumira?

²⁶Kasi ndi njani uyo wakurokweska vura, pa charu chambula ŵanthu, pa chiparamba apo munthu palije?

²⁷Kasi ndi njani uyo wakuthilira charu cha mapopa na cha mayiyi, kuchizgora kuti chimezge vyakumera?

²⁸Kasi vura yili nayo wiske? Kasi ndi njani uyo wali kubaba manthonyezi gha jumi?

²⁹Kasi nyina wa chiwuvi chakukhoma ndi njani? Kasi ndi njani uyo wakubaba chiwuvi chakufuma kuchanya?

³⁰Kasi ndi njani uyo wakuzgora maji gha kuchanya para ghakukhoma nga ndi libwe, para pachanya pa ndimba pakukhoma gwa?

³¹“Kasi nyenyezi za chilimira, ungazikaka pamoza na unyoro, kasi nyenyezi za mauta ungasutula mafindo ghakhe?

³²Kasi ungarongozga nyenyezi ya mulenje nyengo na nyengo, panji kurongozga nyenyezi ya chipinga usiku, nthowa iyo yikwenera kwendamo pamoza na ŵana ŵakhe?

³³Kasi ukughamanya marango ghakwendeskera vya kuchanya? Kasi ungaghakhozga kuti ghendeske charu cha pasi?

³⁴“Kasi iwe ungachemerezga ku maŵingu, mwakuti ghakuzumbwiske iwe na maji gha vura.

³⁵Kasi iwe ungatuma ŵaleza kuti ŵarute, kasi ŵakuphara kwa iwe kuti, ‘Ise tili pano.’

³⁶Kasi ndi njani wakutandika makora maŵingu kuchanya, kasi ndi njani wakurongozga vura kurokwa apa na apo?

³⁷Wa mahara ndi njani uyo wangapenda maŵingu? Ndi njani wangasendamiska viŵiya vya maji vya kuchanya,

³⁸kuti fuvu lizgoke thope ndipo dongo likorane pamoza nganganga?

³⁹“Kasi nkharamu ungayipenjera nyama, kasi ungakhutiska twana twa nkharamu,

⁴⁰para twati waka gone mu michembo yakhe, panji para twati waka khare mu chivwati kubisamira nyama?

⁴¹Kasi uyo wakupereka chakurya ku ŵachihoŵe ndi njani, para twana twakhe tukulirira kwa Chiuta, na kuyingayinga waka kupenja chakurya?