Read new_tumbuka_bible Yobe 39 Bible Online

Yobe 39 - new_tumbuka_bible bible

Yobe 39

¹“Kasi ukumanya nyengo iyo ŵachinkhoma ŵakubabira ŵana? Kasi uli kuwonerapo mphoyo para zikubaba?

²Kasi ungapenda myezi iyo zikutora kuti zibabe? Kasi ukumanya nyengo iyo zikubabira ŵana,

³para zikusindama na kubaba twana twawo, na nyengo iyo vyakuŵinya vya pa kubaba vikumalira?

⁴Twana twawo tukukura na nkhongono mu thengere, tukuŵareka ŵa nyinawo na kuruta kutali.

⁵“Kasi ndi njani uyo wakamusutula boli kuti wendendekenge? Ndi njani wakusutula maunyoro gha boli wakuchimbira chomene?

⁶Nkhaŵapa mapopa kuŵa malo ghawo ghakukharamo, charu cha muchere kuti chiŵe chawo.

⁷Boli uyu wakukhara kutali na chiwawa cha mu msumba, wakupulika chara kuchemerezga kwa uyo wakwendeska.

⁸Wakwendendeka mu mapiri mose kupenja luhari, kupenjapenja kanthu kaŵisi kuti ŵarye.

⁹“Kasi njati yingazomerezga kuti yikuteŵetere iwe? Kasi yingagona mu chiŵaya chako?

¹⁰Kasi ungayikaka goliwoli kuti yilimenge? Kasi yingapopota mu munda mwako?

¹¹Kasi ungagomezga njati chifukwa cha nkhongono zakhe, ndipo kasi ungayirekera milimo yako?

¹²Kasi ukugomezga kuti njati yingakuyeghera vyakurya, na kukuwunjikira pa luwugha lwako?

¹³“Nthiŵatiŵa yikukupizga mapapindo ghakhe mwakujikuzga. Kweni mapapindo ghakhe na mahungwa ghakhe, kuti vikuyiwovwira chara kuwuruka nga ndi kakoŵa.[5]

¹⁴Nthiŵatiŵa yikutayira masumbi ghakhe pasi, ndipo yikughareka kuti ghathukirenge mu dongo.

¹⁵Yikuruwa kuti lundi lingaswa masumbi agha, kuti vikoko vya mu thengere vingakandapo na kughaswa.

¹⁶Nthiŵatiŵa yikuŵa na nkhaza ku masumbi ghakhe, nga ndi para ngakhe chara. Iyo kuti yikupwererako chara kuti mlimo wakhe wakutayira ungaŵa wa waka.

¹⁷Pakuti Chiuta wakayinora mahara, nanga nkhuyipako chigaŵa chakumanyira vinthu.

¹⁸Kweni para yawuska mapapindo ghakhe kuti yichimbire, yikuchimbira kuruska hachi na wakukwerapo wakhe.

¹⁹“Kasi ndiwe ukupa hachi nkhongono zakhe? Kasi ndiwe ukumuvwarika maweya pa singo yakhe?

²⁰Kasi ndiwe ukudukiska hachi nga ndi zombe? Kukonona kwakhe kukuru kukofya.

²¹Hachi likuparasura mu dambo mwakofya, ndipo likujitukumura na nkhongono zakhe, kuya kakumana na mahomwa.

²²Ilo kuti likopa chara nanga nkhuthika lusoko, likuwerera nyuma chara para lupanga lukwiza.

²³Phodo wakulira kuti kwechekweche pa ilo, ndiposo na mukondo wakugabuka na ndema.

²⁴Na kofya ndipo na mu ukari wakhe, likurya na dongo wuwo. Ilo likwima waka chete chara para lapulika kulira kwa mbata.

²⁵Para mbata yalira, ilo likuti, ‘Fwee!’ Likupungizga nkhondo yichali kutali, ndiposo likupulika kuchemerezga kwa ŵarongozgi ŵa nkhondo, na chiwawa chawo.

²⁶“Kasi luhera ukumusambizga ndiwe kuti wawurukenge, kuti watandaurenge mapapindo ghakhe kurazga ku mwera?

²⁷Kasi ndiwe ukulangula kuti nombo yiwurukire muchanya, kuti yikazenge chivimbo chakhe kura kuchanya?

²⁸Nombo yikukhara pa majarawe na kuzenga chivimbo chakhe pa malo ghakukhora.

²⁹Kufuma pachanya penepara, yikulaŵiskalaŵiska chakurya chakhe, maso ghakhe ghakuchiwonera kutali.

³⁰Ŵana ŵakhe ŵakumwa ndopa, ndipo kose uko kuli vitanda, ndiko wakusangika.”