Read new_tumbuka_bible Yobe 4 Bible Online

Yobe 4 - new_tumbuka_bible bible

Yobe 4

¹Penepapo Elifazi wa ku Temani wakazgora wakati,

²“Kasi iwe Yobe ungakaripa, usange yunji wangayowoya nawe? Kweni ndi njani wangajikora kuti wareke kuyowoyapo?

³Kumbuka kuti iwe wasambizga ŵanthu ŵanandi, ndipo wasanguruska awo mbakutomboroka.

⁴Mazgu ghako ghakakhwimiska awo ŵakakhuŵara kuti ŵawe, ndipo ulikukhozga awo mbambula nkhongono.

⁵Kweni sono visuzgo vyakusanga, ndipo wataya mtima, visuzgo vyakukhwaska ndipo wathika lusoko.

⁶Asi kopa Chiuta kwako ndicho chipulikano chako, ndipo kwenda mu kunyoroka kwako ndicho chigomezgo chako?”

⁷“Ghanaghana makora, kasi walipo wambula kafukwa, uyo wali kufwapo? Kasi ndi nkhu uko ŵarunji ŵali kumarapo?

⁸Umo ine ndawonera, awo ŵakuchita uheni, na awo ŵakwambiska visuzgo ŵakuvuna vyenevivi.

⁹Chiuta wakuŵamara petu na muvuchi wakhe, wakuŵamyangura na ukari wakhe ukuru.

¹⁰Ŵaheni ŵakubangura na kulira, nga ndi nkharamu yakofya, kweni Chiuta wakuŵaphyora mino ghawo.

¹¹Nkharamu ya nkhongono yikufwa, chifukwa chakusoŵerwa nyama, ndipo twana twa nkharamu yanakazi tukumbininika.”

¹²“Mazgu ghakandika ine mu udesi, makutu ghane ghakapulika kuphwepwerezga kwakhe.

¹³Ivi nkhaviwona na usiku mu mboniwoni, nyengo iyo ŵanthu ŵakugona tulo tuzitu.

¹⁴Nyengo iyo nkhopa na kumbwambwantha, ndipo thupi lane lose likatenthema na wofi.

¹⁵Kamphepo ka zizizi kakujumpha ku maso kwane, ndipo sisi la thupi lane likati yiliyili.

¹⁶Chinthu chira chikimilira waka chete, kweni kuti nkhachimanya makora kaŵiro kakhe chara. Chimuzgezge chikawoneka panthazi pane, pakaŵa waka yii ndipo nkhapulika mazgu ghakuti,

¹⁷‘Kasi munthu wa wangaŵa murunji panthazi pa Chiuta? Kasi wangaŵa wakunyoroka panthazi pa Mlengi wakhe?

¹⁸Nanga ndi ŵateŵeti ŵakhe Chiuta kuti wakuŵagomezga chara. Ŵangelo ŵakhe nawo wakuŵasanga na vifukwa.

¹⁹Kasi kwakuruska kuli uli na ŵanthu, awo ŵakukhara mu nyumba za dongo, izo lufura luri mu dongo, izo zikuteketeka na fufuzi.

²⁰Na mulenje ŵakuŵa ŵamoyo, kweni na mise ŵakufwa. Iwo ŵakumara kwa muyirayira kwambula na yumoza wakupwerererako.

²¹Usange ivyo ŵanthu ŵakukhorerako vikumara, asi iwo nawo ŵakufwa waka kwambula mahara?’ ”