Read new_tumbuka_bible Yobe 40 Bible Online

Yobe 40 - new_tumbuka_bible bible

Yobe 40

¹FUMU yikarutilira kumufumba Yobe, yikati,

²“Kasi munthu uyo wakupenjerezga vifukwa wangapindana na Mwenenkhongono zose? Munthu uyo wakususkana na Chiuta ndiyo wazgore.”

³Penepapo Yobe wakazgora FUMU wakati,

⁴“Ine ndine munthu wa kuzirwa chara, kasi ndingamuzgorani vichi? Ine ndilije chakuyowoyapo.

⁵Nkhayowoyapo kamoza, kuti ndizgorengeso chara, Ndingayowoya kaŵiri, kweni kuti ndirutilirenge chara.”

⁶Penepapo FUMU yikamuzgora Yobe kufumira mu kavuruvuru yikati,

⁷“Vwara zikhore nga ndi mwanarume. Ine nditi ndikufumbe, ndipo iwe uti undizgore.

⁸Kasi ukupima kuti ine ndananga? Kasi undisuskenge kuti iwe uŵe murunji?

⁹Kasi uli na nkhongono nga ndi Chiuta? Kasi mazgu ghako ghangadudumira nga ghakhe?

¹⁰Ipo ujitozge na ufumunkhuru na nchindi, ujivwarike uchindami na utozi.

¹¹Fumiska ukari wako wakufuruka, laŵiska pa uyo ngwa kujikuzga, ndipo umuyuyure.

¹²Laŵiska pa uyo ngwa kujikuzga, ndipo umukhizgire pasi, ŵakwananga uŵakandirizgire pasi apo ŵimilira.

¹³Wose pamoza uŵawundire pasi mu fuvu, uŵakake na kuŵajalira mu dindi.

¹⁴Usange ungachita ntheura ine nditi ndizomerezge, kuti nkhongono zako zingamanya kukuponoska.

¹⁵“Ughanaghane na za chigwere, uyo nkhamulenga nga ndi umo nkhalengera iwe, iyo wakurya utheka nga ndi ng'ombe.

¹⁶Nkhongono za chigwere nzikuru chomene, thupi lakhe ndakukhwima mu nkhongono.

¹⁷Wakunonopeska muchira wakhe nga ndi khuni la milanje. Misipa ya vigha vyakhe njakurukana pamoza.

¹⁸Viwangwa vyakhe nvinonono nga ndi mkuŵa, malundi ghakhe ghali nga ndi mphingirizgo za chisulo.

¹⁹“Chigwere ndi mukuru mu vilengiwa vya Chiuta, ndipouli Mlengi wakhe wangiza pafupi na lupanga.

²⁰Iyo wakusanga chakurya chakhe kufuma ku mtunda, uko nyama zose za mu thengere zikusoŵera.

²¹Wakugona kusi ku makuni, wakugona mu matete na mu visapa.

²²Makuni ndigho ghakubenekerera kuŵa mufwiri wakhe, makuni gha katope mu kamronga ndigho ghakumuzingirizga.

²³Para maji ghakupoma, kuti wakopa chara. Nanga mronga wa Yorodani ungatura mpaka mu singo, iyo wakujikhalira mwakufwasa.

²⁴Kasi waliko uyo wangakora chigwere na mbeja, panji kumukora pa chipingo na kugwaza mphuno yakhe?