Read new_tumbuka_bible Yobe 41 Bible Online

Yobe 41 - new_tumbuka_bible bible

Yobe 41

¹“Kasi chikoko chakofya cha mu nyanja ungachiguzira kuwaro kwa maji na chimbeja, panji kukaka lulimi lwakhe na chingwe?

²Kasi unganjizga chingwe mu mphuno yakhe, panji kudorora njegheyeghe yakhe na chimbeja?

³Kasi chikoko ichi chingakuŵeyerera kuti uchigowokere? Kasi chingakuyowoyera mazgu ghaweme?

⁴Kasi chingachita phangano na iwe lakuti, ‘Nditi ndikuteŵetere iwe pa umoyo wane wose.’

⁵Kasi ungasoŵera nacho nga ndi kayuni? Panji, kasi ungachikaka na unyoro, kuti ŵateŵeti-kazi ŵako ŵasoŵerenge nacho?

⁶Kasi ŵamalonda ŵangalimbana pakuchisaska? Kasi ŵangagaŵana nyama yakhe kuti wayiguliske?

⁷Kasi ungagwaza chikumba chakhe na mukondo, panji mutu wakhe na misompho yakugwazira somba?

⁸Usange wachiyavya, umanye kuti pali nkhondo, kuti uwerezgengeso chara.

⁹Chigomezgo chakuti ungachitonda chikuŵa chawaka. Kuchilaŵiska waka pera kukumara nkhongono.

¹⁰Palije munthu wachikanga uyo wangachiwuska. Ntheura kasi ndi njani uyo wangimikana nane?

¹¹Ndi njani uyo wangimikana nayo na kumutonda? Kulije nanga njumoza kusi ku mtambo.

¹²“Sono kuti ndingareka chara kuphara za malundi gha chikoko ichi, za nkhongono zakhe na kawonekero ka thupi lakhe.

¹³Kasi ndi njani uyo wangafuŵa chikumba chakhe? Kasi ndi njani wadorora chikumba chakhe icho chili paŵiri?

¹⁴Kasi ndi njani uyo wangajula mlomo wakhe? Mino ghakhe ngakofya umo ghali kukhalira mu mizere.

¹⁵Muwongo wakhe uli na makankhanimbwa, ghakuŵa nga ndi nguru, ghakukorana pamoza nga ndi chiliŵa cha mawe.

¹⁶Makankhanimbwa agha ngakukorana pamoza, nanga ndi mphepo kuti yingaporotamo chara.

¹⁷Ngakurungana yimoza na yinyakhe, ghali kukorana pamoza mwakuti ghangapatukana chara.

¹⁸Kuyethyemura kwakhe kukufumiska ungweru, maso ghakhe ghakung'azima, nga ndi marazi gha ku matandakucha.

¹⁹Mu mlomo wakhe mukufuma vyenje vya moto, ndipo mukupantha mbaliŵali za moto.

²⁰Mu mphuno zakhe mukufuma josi, nga ndi la chiŵiya cha maji ghakugaduka, pachanya pa moto wa utheka.

²¹Muvuchi wakhe ukugorezga na makara wuwo, dimi la moto likufuma mu mlomo wakhe.

²²Mu singo yakhe ndimo muli nkhongono, chofyo chikuwoneka panthazi pakhe.

²³Tuviŵaruka twa nyama yakhe nthwakukorana pamoza, nthwakukhora na twambula kusunkhunyika nga ndi chisulo.

²⁴Mtima wakhe ngunonono nga ndi libwe, ngunonono nga ndi lwara.

²⁵Para chikuwukira muchanya, vinkhara vikutenthema, para chikusunkhunyika vikutimbanizgika na wofi.

²⁶Lupanga ulo lwachigwaza kuti lukunjira chara, nanga ndi mukondo, muvwi, panji ndema, kuti vingachigwaza chara.

²⁷Visulo chikuviwona nga ndi utheka, visulo vya mkuŵa nga ndi khuni lakuvunda.

²⁸Muvwi kuti ukuchichimbizga chara, mawe gha fyata ghakuchinyenyenkha waka.

²⁹Kwa icho nthonga likuyana waka na phekese, ndipo chikuseka waka para misompho yikurakatika pa iyo.

³⁰Ku nthumbo kwakhe kuli nga madengere ghakuthwa. Pa mathipa apo chenda pakuŵa pakweru nga penda chileyi cha kubulira tirigu.

³¹Chikusewuska ndimba ya maji nga nchiŵiya, chikuyizgora nyanja kuŵa nga nchiŵiya cha mafuta ghakuphakara.

³²Umo chenda mukuŵa mzere wakung'azima, munthu wangapima kuti ndimba yili na mbuha.

³³Pa charu palije chinyama chakukozgana nacho. Nchilengiwa chambula wofi.

³⁴Chikuderera vinyama vyose ivyo vikujikuzga, ndi karonga pa vinyama vyose ivyo vikujitemwa.”