Read new_tumbuka_bible Yobe 42 Bible Online

Yobe 42 - new_tumbuka_bible bible

Yobe 42

¹Penepapo Yobe wakazgora FUMU wakati,

²“Nkhumanya kuti mungachita vinthu vyose, ndipo icho mukukhumba kuchita, palije uyo wangachikanizga.”

³Imwe mukandifumba kuti, “Kasi ndiwe njani iwe ukujandizga urongozgi wane, na mazgu ghambula mahara. Nadi, ine nkhayowoya ivyo nkhavimanya chara, vinthu vyakuzukumiska ivyo nkhavimanya chara.

⁴Imwe mukati, ‘Tegherezga, ine nditi ndiyowoye, nditi ndikufumbe, ndipo iwe undizgore.’

⁵Ine nkhapulika vya imwe na makutu ghane, kweni sono nkhumuwonani na maso ghane.

⁶Ntheura nkhujinyumwa, ndipo nkhurapa pakujithira fuvu na vyoto kurongora chitima.”

⁷FUMU yikati yamara kuyowoya na Yobe, yikayowoya na Elifazi wa ku Temani wakati, “Ine ndine wakukwiya chomene na iwe pamoza na ŵabwezi ŵako ŵaŵiri. Imwe kuti mwayowoya unenesko pa vya ine chara nga ndi umo wayowoyera muteŵeti wane Yobe.

⁸Ntheura sono mutore nkhambako zinkhonde na ziŵiri ndiposo na mberere zanarume zinkhonde na ziŵiri. Murute nazo kwa muteŵeti wane Yobe na kupereka sembe yakocha. Sono muteŵeti wane Yobe wamkumuromberani pakuti lurombo lwakhe ndamkulupokerera kwambula kuchita kaheni kwa imwe chifukwa cha uchindere winu. Imwe kuti mukayowoya unenesko pa vya ine chara nga ndi umo wakayowoyera Yobe muteŵeti wane.”

⁹Ntheura Elifazi wa ku Temani, Bilidadi wa ku Shuwa, na Zofara wa ku Naama ŵakachita ivyo FUMU yikaŵalangula ndipo wakaruta kwa Yobe. Ndipo FUMU yikapokererera lurombo lwa Yobe.

¹⁰Yobe wakati waŵarombera ŵabwezi ŵakhe ŵara, FUMU yikamuwezgera Yobe usambazi wakhe wose ndipo yikasazgirako mwa kaŵiri pa vinthu ivyo wakaŵa navyo pakudanga.

¹¹Penepapo ŵana ŵanyakhe wose na ŵadumbu ŵakhe ndiposo na wose awo ŵakamumanyanga kale ŵakiza ku nyumba yakhe na kurya nayo chakurya. Wakamukhuza na kumusanguruska pa visuzgo vyose ivyo FUMU yikamutumira. Ndipo waliyose wa iwo wakamupako Yobe ndarama na mphete ya golide.

¹²Mazuŵa gha umaliro, FUMU yikatumbika chomene umoyo wa Yobe kuruska wapakudanga. Wakaŵa na mberere na mbuzi 14,000, ngamila 6,000, ng'ombe zakulima 2,000 ndiposo mbunda zanakazi 1,000.

¹³Yobe wakaŵa na ŵana ŵanarume ŵankhonde na ŵaŵiri ndiposo ŵana ŵanakazi ŵatatu.

¹⁴Mwana wakhe mwanakazi wakudanga wakamuthya Yemima, wa chiŵiri wakamuthya Keziya ndipo wa chitatu wakamuthya Kereni Hapuki.

¹⁵Mu charu chose cha pasi mukaŵavye ŵanakazi ŵakutowa nga ndi umo ŵakaŵira ŵana ŵanakazi ŵa Yobe. Yobe wakaŵapa chiharo ŵana ŵanakazi aŵa nga ndi umo wakaŵapira ŵana ŵakhe ŵanarume.

¹⁶Pamanyuma pa vyeneivi, Yobe wakakhara virimika 140 ndipo wakawona ŵana ŵakhe ndiposo na ŵazukuru ŵakhe mpaka pa miwiro yinayi.

¹⁷Ntheura Yobe wakafwa, munthu muchekuru chomene na wa virimika vinandi.