Read new_tumbuka_bible Yobe 5 Bible Online

Yobe 5 - new_tumbuka_bible bible

Yobe 5

¹“Iwe Yobe, chemerezga sono, kasi walipo uyo wati wakuzgore? Kasi uti uzgokere ku ŵangelo mba?

²Nadi ukari ukukoma chindere, ndipo sanje yikukoma wambula mahara.

³Ine ndawowa chindere wakupusa wakuthaza misisi, kweni mwamabuchibuchi nyumba yakhe nkhayitemba.

⁴Ŵana ŵakhe ŵalije chivikiriro chilichose, ŵakususkika waka panthazi pa ŵeruzgi, kwambula na yumoza wakuŵathaska.

⁵Ŵanjara ŵakurya ivyo chindere chikukorora, ŵakuchitorera nanga ndi ivyo vili mukati mu minga, ndipo awo womirwa ŵakunwekera usambazi wakhe.

⁶Pakuti soka kuti likufuma mu fuvu chara, nanga ndi visuzgo ku dongo chara.

⁷Kweni munthu wakujitorera ŵekha visuzgo, nga ndi mbaliŵali za moto zakuwurukira muchanya.”

⁸“Kweni ndiŵenge ine, mphanyi ndakuzgokera kwa Chiuta, ndiko mphanyi ndaŵeyerera mrandu wane kwa iyo.

⁹Chiuta wakuchita vinthu vikuru, vyambula mapimiko, vyakuzukumiska, vyambula mapendeko.

¹⁰Chiuta wakurokweska vura pa charu, wakupereka maji mu minda ya ŵanthu.

¹¹Wakuŵakwezgera muchanya awo ŵakujiyuyura, wakuŵasanguruska awo ŵakulira.

¹²Wakutimbanizga fundo za awo mbaryarya, mwakuti icho ŵakunozgekera chireke kufiskika.

¹³Ŵamahara wakuŵakorera mu uryarya wawo, ndipo ivyo ŵakuchenjera ŵakunozgera, wakuvizgora vya waka.

¹⁴Mdima ukuŵizira pa nyengo ya muhanya, ŵakuwurawura waka na muhanya pakati nga ndi usiku.

¹⁵Kweni Chiuta wakuponoska ŵalanda ku awo ŵakuŵanena, ŵakavu ku awo mba mazaza.

¹⁶Ntheura ŵakavu wakuŵapa chigomezgo, awo ŵakuchita uheni wakuŵachetamiska.”

¹⁷“Ngwakutumbikika munthu uyo Chiuta wakumuchenya, ntheura ureke kuyuyura kuchenya kwa Chiuta Mwenenkhongono zose.

¹⁸Pakuti wakupweteka na kukakaso vilonda. Wakutimba, kweni wakuchizga na mawoko ghakhe.

¹⁹Wakuthaska ku visuzgo nyengo na nyengo, nanga vingaŵa vinandi uli, palije icho chingakukhwaska.

²⁰Wizamkukuwombola ku nyifwa mu nyengo ya njara, na ku nkhongono ya lupanga mu nyengo ya nkhondo.

²¹Wizamkukuvikirira ku awo ŵakukunena, ndipo wamkopa chara para pharaniko yiza.

²²Wizamkuseka waka pa nyengo ya pharaniko na ya njara, wizamkopa chara vikoko vya mu charu.

²³Minda iyo ukulimapo yizamkuŵavye mawe pakuti pizamkuŵa phangano. Vikoko vya mu thondo, vizamkukhara nawe mu mutende.

²⁴Uti umanyenge kuti hema lako ndakuvikiririka makora, ndipo iwe wamkuwona mu chiŵaya, na kusanga kuti palije chiŵeto chakusoŵa.

²⁵Wizamkumanyaso kuti ŵana ŵako ŵizamukwandana, ndipo ŵa mphapu yako kuŵa ŵanandi nga ndi utheka.

²⁶Ntheura wizamkufika ku dindi uli muchekuru, nga ndi mziwo wa tirigu pa nyengo ya kuvunira.”

²⁷“Iwe Yobe, vyose ivi ise tavisandasanda, ndipo tasanga kuti ndi unenesko. Ntheura uvipulike na kuvipokerera.”