Read new_tumbuka_bible Yobe 6 Bible Online

Yobe 6 - new_tumbuka_bible bible

Yobe 6

¹Penepapo Yobe wakazgora wakati,

²“Kuŵenge kuti visuzgo vyane vyapimika, ndipo soka lane lose liŵikikenge pa sikelo,

³mphanyi vyaŵa vizitu kuruska muchenga wa mu nyanja, ntheura mazgu ghane ndayowoyera mwa luŵiro.

⁴Pakuti mivwi ya Mwenenkhongono zose yandilasa, thupi lane likupulika urwirwi wa mivwi iyi, vyakofya vya Chiuta vyanozgeka kulimbana nane.

⁵Kasi boli wakulira para wali na utheka? Kasi ng'ombe yikubama para yili na chakurya?

⁶Kasi chakurya chambula muchere chingaryeka? Kasi kunowa kulimo mu katuŵa ka sumbi?

⁷Chakurya cha ntheura nkhukhumba kuchicheta chara. Chakurya cha ntheura chikundiseruska.

⁸Mwe, mphanyi ndangupokera icho nkhuromba, mphanyi Chiuta wangundipa icho nkhunwekera.

⁹Mphanyi chamukondweska Chiuta kuti wandidinyedinye waka, walegherezge waka woko lakhe na kundimara petu.

¹⁰Apo ndipo ndatenge ndisangwenge, mphanyi ndangukondwa nanga ndipulike vyakuŵinya. Ine ndilije kukanapo mazgu gha Mutuŵa Yura.

¹¹Kasi nkhongono zane ndi za mtundu kuti ndilindilire waka? Kasi umaliro wane ndi ngu kuti ndirutilire kuŵa wa moyo?

¹²Kasi nkhongono zane zili nga ndi libwe? Kasi thupi lane likuyana na mkuŵa?

¹³Kasi ndili na nkhongono za kujovwilira, ndipo kasi kulijeso kunyakhe uko ndingasanga wovwiri?

¹⁴Uyo wakukana kumuchitira lusungu mubwezi wakhe, wakureka kopa Mwenenkhongono zose.

¹⁵Kweni ŵana-ŵanyane mbapusikizgi nga nkhamronga, nga nthumironga uto maji ghakhe ghakupopoma,

¹⁶uto maji ghakhe ghakubiriŵira chifukwa cha chiwuvi chakukhoma, ndiposo mwenemumo mukubisika matalala.

¹⁷Mu nyengo ya chihanya tukomira, ndipo para kwathukira tukukamuka.

¹⁸Mipingo ya ŵa ulendo yikupatukirako kufuma mu nthowa kupenja maji. Yikukwerera ku mapopa, ndipo yikumara petu.

¹⁹Mipingo ya ŵa ulendo ŵa ku Tema yikupenja maji, ŵa malonda ŵa ku Sheba ŵakupenja na chigomezgo.

²⁰Iwo ŵakugongowa chifukwa ŵakagomezganga kusanga maji. Iwo ŵakufika kwenekura ndipo ŵakuzukuma waka.

²¹Ntheura ndimo imwe namwe mwaŵira kwa ine, imwe ŵawona soka lane, ndipo muli na wofi.

²²Kasi ine ndayowoya kuti, ‘Mundipe chawanangwa’? Panji kuti, ‘Ndiperekeraniko chimbundi, kufuma mu usambazi winu’?

²³Panji kuti, ‘Mundithaske ku nkhongono ya ŵarwani ŵane’? Panji kuti, ‘Ndiwombolani ku awo ŵakundinyekezga’?

²⁴Ndisambizgani kuti ndimanye kukhara chete, mundimanyiske makora umo ndapurukira.

²⁵Mazgu gha unenesko ghali na nkhongono mwe, kweni kasi kundichenya kwinu mpha chifukwa uli?

²⁶Kasi mukukhumba kuchenya mazgu agha nkhuyowoya? Kasi mukumanya kuti mazgu gha wathika lusoko ndi mphepo?

²⁷Nadi imwe mungamuchitira mphenduzgo mulanda na kumuŵika pa malonda uyo ndi mubwezi winu.

²⁸Kweni sono mundilaŵisiske, ine kuti nkhuyowoya utesi panthazi pinu chara.

²⁹Kweni sono ndaŵeya, mureke kuchita chiheni chilichose. Mureke kundisuska pakuti ndili murunji.

³⁰Kasi mukughanaghana kuti ine nkhuyowoya utesi? Kasi ine ndingachimanya chara, icho nchiweme panji chiheni?”