Read new_tumbuka_bible Yobe 7 Bible Online

Yobe 7 - new_tumbuka_bible bible

Yobe 7

¹“Asi munthu wali na mlimo unonono pa charu? Asi mazuŵa ghakhe ghali nga ndi munthu waganyu?

²Wali nga ndi muzga uyo wakunwekera muzgezge, panji nga ndi waganyu, uyo wakulindirira kupokera njombe yakhe.

³Ntheura ine ndapika myezi yinandi ya waka, ndapika mausiku gha visuzgo pera.

⁴Para ndagona, nkhughanaghana kuti, ‘Kasi kuchenge pauli kuti ndiwuke?’ Kweni usiku ngutali, ndipo nkhuzgokazgoka waka mpaka ku matandakucha.

⁵Thupi lane liri na mphorozi pera na marikho. Chikumba chane chili gwagwarara na kugagauka.

⁶Mazuŵa ghane ghakuchimbira, kuruska makina ghakurukira salu, ndipo ghakumara kwambula na chigomezgo.”

⁷“Mwe Chiuta, kumbukani, kuti umoyo wane ndi muvuchi waka, viweme kuti ndiviwonengeso chara.

⁸Awo ŵakundiwona sono, kuti ŵizamkundiwonaso chara, ŵamkundipenja, kweni ndiŵenge kuti ndaruta kale.

⁹Nga ndi umo bingu likumalira na kupwalalikira, ndimo uyo wakuruta ku malo gha ŵakufwa wakuwerako chara.

¹⁰Kuti wakuwelerakoso ku nyumba yakhe chara, wose awo ŵakamumanyanga ŵakumuruwa.”

¹¹“Ntheura ine kuti ndikharenge chete chara. Nditi ndiyowoye chifukwa cha urwirwi wa mu mzimu wane, ndipo ndisinginikenge chifukwa cha kuŵinya kwa umoyo wane.

¹²Kasi ine ndine nyanja panji chikoko chakofya cha mu nyanja, kuti mundiŵikire mulinda?

¹³Para ine nkhuyowoya kuti, ‘chitara chane chindisanguruskenge, chitengo chane chichepeskenge kusinginika kwane,’

¹⁴imwe mukundichiruska na maloto, na kundofya na zimboniwoni.

¹⁵Ntheura nkhwenera kusankha kujikaka na nyifwa kuruska kukhara mu thupi ili.

¹⁶Nkhuwunyanyara umoyo wane. Kuti ndinkhalirirenge wamoyo kwa muyirayira chara. Ine mundireke waka, pakuti mazuŵa gha umoyo wane ndi muvuchi waka.”

¹⁷“Kasi munthu kanthu uli, kuti mumughanaghanenge ntheura? Kuti mpaka muwikenge mtima winu pa iyo?

¹⁸Imwe mukuchezga na munthu mulenje uliwose, mukumuyezga nyengo na nyengo.

¹⁹Kasi muti mureke pauli kulaŵiska kwa ine, kuti ndiŵe na mwaŵi wa kumilira mata?

²⁰Usange ndananga, kasi nkhumusuzgani uli, imwe mulinda wa ŵanthu? Kasi nchifukwa uli mwandiŵika ine, kuti ndiŵe chimanyikwiro cha kusanda kwinu? Kasi nchifukwa uli, ine ndaŵa katundu muzitu kwa imwe?

²¹Kasi mukurekerachi kugowokera kwananga kwane, na kuwuskapo ubendezi wane? Pakuti sonosono nditi ndifwenge na kusungika mu dindi, mwamkundipenja, kweni kuti mwamkundisanga chara.”