Read new_tumbuka_bible Yobe 8 Bible Online

Yobe 8 - new_tumbuka_bible bible

Yobe 8

¹Penepapo Bilidadi wa ku Shuwa wakazgora wakati,

²“Kasi iwe Yobe, uti uyowoyenge vinthu ivi mpaka pauli? Mazgu ghako ghali nga ndi mphepo ya kuputa.

³Kasi Chiuta wakubendezga weruzgi wakunyoroka? Kasi Mwenenkhongono zose, wakubendezga icho ncha urunji?

⁴Usange ŵana ŵako ŵanangira Chiuta, wakuŵapereka ku mrandu wa kwananga kwawo.

⁵Usange ungalaŵiska kwa Chiuta, na kuŵeyerera kwa iyo Mwenenkhongono zose,

⁶usange ndiwe wambula kalema na wakunyoroka, iyo wati wizenge na kukovwira, na kukupa njombe ya chikhazi chiweme.

⁷Ndipo nanga jando lako likaŵa lichoko, kweni umaliro uti uŵenge uweme chomene.

⁸“Nkhukuŵeya, fumbilira ku miwiro ya kale, ndipo usandesande ivyo ŵasekuru withu wakasambira.

⁹Pakuti ise ndise ŵana ŵakubabika mayiro, kuti tikumanya kalikose chara, pakuti umoyo withu pa charu ndi muzgezge waka.

¹⁰Asi ŵati ŵakusambizge na kukuphalira makora? Asi ŵati ŵayowoye mazgu pa ivyo ŵakumanya?

¹¹“ ‘Kasi marukwa ghangamera pambula chisapa? Kasi matete ghangatikitira pambula maji?

¹²Kwambula maji ivi vikufota, apo vichali kukura, pambere vindadumulike, vikomira luŵiro kuruska vyakumera vinyakhe.

¹³Ntheura ndimo ziliri nthowa za wose awo ŵakuruwa Chiuta. Chigomezgo cha wambula kopa Chiuta chizamkumara.

¹⁴Chigomezgo chakhe chikumara, ndipo icho wakugomezga chikuŵa nga ndi utatavu.

¹⁵Iyo wakweghamira pa utatavu wakhe, kweni kuti wakwimilira chara. Wakuwukorera utatavu ura, kweni kuti ukumukhozga chara.’

¹⁶“Iyo wakuŵa nga ndi khuni lakuthiririka makora para kuli dazi, ndipo minthavi yakhe yikuthazira mu minda yakhe yose.

¹⁷Misisi yakhe yikuzingizga pa mulu wa mawe, ndipo yikukhorera mu mawe gheneghara.

¹⁸Kweni para khuni lira lazgurika pa malo ghakhe, malo ghara ghakulikana na kuyowoya kuti, ‘Ndilije na kukuwonapo na kale chara.’

¹⁹Nadi umoyo wa khuni ili ukumara, ndipo makuni ghanyakhe ghakumera pa malo ghakhe.

²⁰“Nadi, Chiuta wakutaya munthu wambula kalema chara, panji nesi kovwira uyo wakuchita uheni.

²¹Chiuta wati wachite kuti mlomo wako ukondwenge, ndiposo kuti milomo yako yichemerezgenge.

²²Awo ŵakukutinkha ŵamkukhozgeka soni, ndipo mahema gha ŵaheni kuti ghamkuŵakoso chara.”