Read new_tumbuka_bible Yobe 9 Bible Online

Yobe 9 - new_tumbuka_bible bible

Yobe 9

¹Penepapo Yobe wakazgora wakati,

²“Nadi, nkhumanya kuti kuli ntheura, kweni Kasi munthu wangaŵa murunji uli panthazi pa Chiuta,

³Nanga yunji wangakhumba kuti wapindane nayo, palije uyo wangamuzgora Chiuta, fumbo limoza pa 1,000 agho wali nayo.

⁴Chiuta ngwa mahara na wa nkhongono chomene, ndi njani uyo wali kunonofyapo mtima wakhe na kutonda?

⁵Wakusezga mapiri, iwo kwambula kumanya, ndipo wakughagadabula mu ukari wakhe.

⁶Wakusunkhunya charu pa malo ghakhe, ndipo mizati yakhe yikumbwambwantha.

⁷Iyo wakulangula dazi kuti lireke kufuma, na nyenyezi kuti zireke kuŵala.

⁸Ndi Chiuta yekha uyo wakatandazga mtambo, na kukanda pa majigha gha nyanja.

⁹Chiuta ndiyo wakalenga nyenyezi, za Chipinga usiku, Mauta na Chilimira, ndiposo na mawumba gha nyenyezi za ku mwera.

¹⁰Ndiyo wakuchita vinthu vikuru, ivyo kuti tingavimanyiska chara. Wakuchita vyakuzizwiska, ivyo kuti vingapendeka chara.

¹¹“Chiuta wakujumpha pafupi na ine, kweni kuti nkhumuwona chara, wakwenda pafupi na ine, kweni kuti nkhumanya chara.

¹²Para Chiuta wakupoka kanthu ndi njani wangamukanizga? Ndi njani wangamufumba kuti, ‘Kasi mukuchitachi?’

¹³Chiuta kuti wakuwezgako ukari wakhe chara, wakakoma ŵarwani ŵakhe, awo ŵakavwirananga na Rahabu, chinjoka chiheni chira.

¹⁴“Kasi sono ine ndingamuzgora uli, mu kasankhiro ka mazgu ghakwimikana nayo?

¹⁵Nangauli ndili wambula kafukwa, kweni kuti ndingamuzgora chara, Ine nkhwenera kuŵeyerera lusungu, kwa iyo uyo ndi mweruzgi wane.

¹⁶Nangauli ine ndingamuchema, ndipo wandizgore, ndingagomezga chara kuti wakupulika mazgu ghane.

¹⁷Wanganditimba waka na chimphupuru, na kwandaniska vilonda yane kwambula chifukwa.

¹⁸Wati wandizomerezge chara kuti ndithute, kweni wakuzuzga umoyo wane na vyakuŵinya.

¹⁹Usange ndingayowoya vya nkhongono, iyo ngwa nkhongono kwakuruska, Usange ndingayowoya vya weruzgi, ndi njani wangamuchema?

²⁰Nangauli ndiŵe wambula kafukwa, ivyo ndingayowoya vingandisuska. Nangauli ndiŵe wambula kalema, iyo wangandisanga kuti ndili wakwananga.

²¹“Nangauli ndiŵe wambula kalema, kweni kuti nkhujirunjiska chara, umoyo wane nkhuwutinkha.

²²Vyose vikuyana waka, ntheura nkhuti, ‘Iyo wakukoma ŵambula kafukwa na ŵaheni wuwo.’

²³Para paranyiko yiza na nyifwa ya mabuchibuchi, Chiuta wakuseka soka la wambula na kafukwa yura.

²⁴Chiuta wakupereka charu ku ŵanthu ŵaheni, ndipo ŵakuburumutizga ŵeruzgi ŵa charu chira. Usange Chiuta ndiyo wandachite, ipo ndi njani munyakhe uyo wachita?

²⁵“Mazuŵa gha umoyo wane ghakuchimbira chomene, kuruska munthu wakuchimbira. Ghakumara waka, ndipo mulije na kaweme.

²⁶Ghakuchimbira kuruska ngaraŵa za marukwa, nga ndi chipungu icho chikuwurukira pa chakurya chakhe.

²⁷Usange nkhuti, ‘Nditi ndiruwe kusinginika kwane, ndireke kurongora chisko cha chitima, kweni ndiŵe wakusanguruka.’

²⁸Nkhuŵa na wofi na visuzgo vyane vyose, pakuti nkhumanya kuti Chiuta, wangazomera chara kuti ine ndilije kafukwa.

²⁹Sono pakuti ndasangika kale kuti ndine wakwananga, kasi sono nkhutokatokerachi pa waka?

³⁰Nangauli ndingageza na maji ghaweme chomene, ndipo ndighatozge mawoko ghane na sopo,

³¹Chiuta wati wandibizge ndipera mu chinkhando, ndipo vyakuvwara vyane viti vindinyanyarenge.

³²“Chiuta kuti wali nga ndine chara kuti ndimuzgore, iyo kuti ndingapindana nayo mu mphara weruzgi chara.

³³Palije na yumoza uyo wangatilamura ise ta ŵaŵiri, uyo wangeruzga mrandu pakati pa Chiuta na ine.

³⁴Imwe Chiuta fumyaniko muchiza winu kwa ine, mwakuti ukari winu ureke kunditenthemeska.

³⁵Penepapo nditi ndiyowoye kwambula kumopa, pakuti ndili nga ndi umo kwenera kuŵira chara.