Read new_tumbuka_bible MaSalimo 10 Bible Online

MaSalimo 10 - new_tumbuka_bible bible

MaSalimo 10

¹Mwe FUMU, kasi mukukhalirachi kutali? Kasi mukujibisirachi mu nyengo ya visuzgo?

²Mu kujikuzga kwawo, ŵaheni ŵakuyuzga ŵakavu, rekani ŵawire mu vipingo ivyo ŵanozgera.

³Muheni wakujitukumura na makhumbiro, gha mu mtima wakhe, mudokezi wakutuka na kuyuyura FUMU.

⁴Mu kujikuzga kwakhe, muheni kuti wakupenja Chiuta chara. Maghanoghano ghakhe ghose ngakuti, “Chiuta kulije.”

⁵Nyengo zose vinthu vikumwendera makora. Weruzgi winu uli kutali na iye, kuti wakuwuwona chara. Ŵarwani ŵakhe wose kuti wakuŵapima kanthu chara.

⁶Iyo wakughanaghana kuti, “Palije icho chingandisunkhunya, mu miwiro yose ine kuti ndiŵenge mu suzgo chara.”

⁷Mlomo wakhe ngwa kuzura na nthembo, upusikizgi na kuyuzga. Mu mlomo wakhe mukufuma masoka ndiposo na vya maubendezi.

⁸Iyo wakukhazga mu vikaya. Mu malo ghakubisika, ndimo wakukomera ŵambula kafukwa. Wakupenjerera awo mbakutomboroka.

⁹Wakukhazga nga ndi nkharamu, mu malo ghakhe ghakubisika. Wakubisama kuti waŵakore ŵakavu. Wakuŵakora ŵasokwano na kuŵaguzira mu ukonde wakhe.

¹⁰Iyo wakumubwaka na kumung'anyira pasi, munthu wakutomboroka ndipo na nkhongono zakhe, wakumuwiskira pasi.

¹¹Mu mtima wakhe wakuti, “Chiuta waruwa! Wabisa chisko chakhe, ivi kuti waviwonenge chara.”

¹²Wukani, Mwe FUMU! Rongorani nkhongono zinu, Mwe Chiuta. Mureke kuŵaruwa awo ŵakusuzgika.

¹³Kasi nchifukwa uli muheni wakupata Chiuta, kasi wakuyowoyerachi mu mtima wakhe kuti, “Chiuta kuti wamkunderuzga chara.”

¹⁴Kweni imwe mukuwona nadi. Inya mukupanikizga visuzgo na vyakuŵinya, kuti mumanye kovwirapo. Wakutomboroka wakujipereka kwa imwe, mulanda nayo mukumovwira ndimwe.

¹⁵Marani nkhongono za munthu muheni za uyo wakuchita uheni. Penjerezgani ubendezi wakhe na kumulanga kuti wareke kuwerezgaposo.

¹⁶FUMU ndiyo karonga kwa muyirayira swii. Ŵamitundu ŵati ŵamarenge petu mu charu chakhe.

¹⁷Mwe FUMU, muti mupulike ivyo ŵakusuzgika ŵakuromba. Muti muŵakhozge na kutegherezga ku kulira kwawo.

¹⁸Muŵeruzgire makora awo mbalanda na ŵakunyekezgeka, mwakuti uyo ngwa pano pasi ŵareke kofyaso.