Read new_tumbuka_bible MaSalimo 102 Bible Online

MaSalimo 102 - new_tumbuka_bible bible

MaSalimo 102

¹Lurombo lwa munthu wakusuzgika, para nkhongono zakhe zamara ndipo wakudandaula panthazi pa FUMU. Mwe FUMU, pulikani lurombo lwane, kulira kwane kwize kwa imwe.

²Mureke kubisa chisko chinu kwa ine mu zuŵa la suzgo yane. Tegherezgani khutu linu kwa ine, mundizgore luŵiro pa zuŵa ilo nkhumuchemani.

³Mazuŵa ghane ghakupwalarikira nga ndi josi, viwangwa vyane vikuphya nga ndi para vili mu ng'anjo ya moto.

⁴Mtima wane wapwetekeka nga ndi utheka uwo wafota. Nkhutondeka na kurya chakurya chane wuwo.

⁵Ndaghanda na kuzgoka viwangwa pera, chifukwa nyengo zose nkhutandalira kutampha pera.

⁶Ndili nga ndi khuŵi la mu chiparamba, nga ndi phururu wa mu mahami.

⁷Nkhureka na kugona tulo. Nkhulingana waka na kayuni ako kali kekha pa mtenje.

⁸Ŵarwani ŵane ŵakundisunjizga zuŵa lose, awo ŵakundihoya ŵakuzunura zina lane para ŵakutemba.

⁹Ine nkhurya vyoto nga nchakurya ndipo masozi ghane ghakusazgikana na chakumwa,

¹⁰chifukwa cha kutukutwa kwinu na ukari winu, pakuti imwe mwandinyamura na kunditaya kutali.

¹¹Mazuŵa ghane ghali nga ndi muzgezge pa nyengo ya mise. Nkhufota waka nga mbutheka.

¹²Kweni imwe, Mwe FUMU mukukhara pa chizumbe chinu kwa muyirayira. Zina linu likukumbukika mu miwiro yose.

¹³Muti muwuke na kuwulengera lusungu msumba wa Ziyoni. Inya nyengo ya kuchitira chiwuravi yafika.

¹⁴Ŵateŵeti ŵinu ŵakuwutemwa nadi msumba uwu, wakuwulengera lusungu nangauli wazgoka mahami.

¹⁵Ŵamitundu ŵati ŵachindike zina la FUMU, ŵakaronga ŵa pa charu cha pasi nawo ŵati ŵachindike uchindami winu.

¹⁶FUMU yiti yiwuzengeso msumba wa Ziyoni, ndipo yiti yiwoneke mu uchindami wakhe.

¹⁷Yiti yizgorenge lurombo lwa musokwano, ndipo yiti yiyuyurenge kuŵeya kwawo chara.

¹⁸Ivi vilembeke chifukwa cha miwiro yinyakhe iyo yikwiza, mwakuti awo ŵachali ŵandababike nawo ŵazakarumbe FUMU.

¹⁹Iyo yikalaŵiska pasi kufumira kuchanya ku malo ghakhe ghakupatulika. Inya FUMU yikalaŵiska pa charu cha pasi kufumira kuchanya,

²⁰kuti yipulike mutampho wa ŵakayidi, na kusutula awo ŵakaŵa ŵakukombolekera ku nyifwa.

²¹Ntheura ŵanthu ŵati ŵapharazgenge zina la FUMU mu Ziyoni, ndiposo na marumbo ghakhe mu Yerusalemu,

²²para mafuko na maufumu ghakuwungana pamoza, kuti ŵasope FUMU.

²³FUMU yikaphyora nkhongono yane apo ndichali ndindakule ndiposo yafupiska mazuŵa ghane.

²⁴Ine nkhuti, “Mwe Chiuta wane, mureke kundiwuskapo sono, apo ndichali ndindachekure, mwaŵeneimwe virimika vyinu vikukhalirira miwiro na miwiro.”

²⁵Mukaŵika lufura lwa charu cha pasi kufuma pa mutendeko, ndipo vya kuchanya vyose ndi mlimo wa mawoko ghinu.

²⁶Vyose ivi vitimarenge kweni imwe mukukhalirira. Ivi visukurukenge nga ndi malaya. Imwe mukuvizgora nga ndi vyakuvwara, ndipo vikumara.

²⁷Kweni imwe muchali umo muliri, virimika vyinu kuti vimarenge chara.

²⁸Ŵana ŵa ise ta ŵateŵeti ŵinu ŵatikharenge kwambula wofi. Ŵa mphapu yithu ŵati ŵakhazikike panthazi pinu.