Read new_tumbuka_bible MaSalimo 103 Bible Online

MaSalimo 103 - new_tumbuka_bible bible

MaSalimo 103

¹Salimo la Davide. Rumba FUMU, wa mzimu wane, umoyo wane wose urumbe zina lakhe lituŵa.

²Rumba FUMU, wa mzimu wane, viweme vyakhe vyose, ungaruwanga chara.

³Iyo ndiyo yikugowokera zakwananga zako zose, ndiyo yikuchizga matenda ghako ghose.

⁴Ndiyo yikuwombola umoyo wako ku dindi, yikukuvwarika chisungusungu na kutemwa kwakhe.

⁵Ndiyo yikukupa viweme mu umoyo wako, mwakuti uwukirano wako ukuwereramo nga ngwa nombo.

⁶FUMU nja urunji mu vyose ivyo yikuchita, yikuŵeruzgira mwakunyoroka wose awo ŵakusuzgika.

⁷Yikamuvumbulira Mozesi nthowa zakhe, milimo yakhe ku ŵaIsraele.

⁸FUMU nja chiwuravi na ya uchizi, nja kuziwurika kukaripa na ya chisungusungu chakuzara.

⁹Iyo kuti yikuchenya nyengo zose chara, nanga nkhusungilira ukari wakhe kwa muyirayira.

¹⁰Iyo kuti wakutilanga kwakuyana na kwananga kwithu chara, nanga nkhutiwezgera kwakuyana na ubendezi withu.

¹¹Umo mtambo uliri kuchanya chomene na charu cha pasi, ndimo uliri ukuru wa chisungusungu chakhe kwa awo ŵakopa iyo.

¹²Umo ku vuma kuliri kutali na ku zambwe, ndimo wakuwuskirapo kwananga kwithu pa ise.

¹³Umo dada wakuŵira na chiwuravi na ŵana ŵakhe, ndimo FUMU yikuŵira na chiwuravi na awo ŵakopa iyo.

¹⁴Pakuti yikumanya umo yikatipangira, yikukumbuka kuti ise ndise dongo.

¹⁵Kwakuyana na munthu, mazuŵa ghakhe ghakuyana waka na utheka. Iyo wakutikitira nga ndi luŵa la mu thengere.

¹⁶Pakuti mphepo yikuputirapo, ndipo yikuruta, malo ghakhe kuti ghakuyimanyaso chara.

¹⁷Kweni chisungusungu cha FUMU ncha muyirayira swii, ku awo ŵakopa iyo, ndipo urunji wakhe ukukhalirira ku miwiro na miwiro,

¹⁸kwa awo ŵakusungilira phangano lakhe, ŵeneawo ŵakukumbuka kusunga marango ghakhe.

¹⁹FUMU yili kukhozga chizumbe chakhe kuchanya, ufumu wakhe ukuwusa pa vyose.

²⁰Rumbani FUMU, imwe mwa ŵangelo ŵakhe, mwa vinkhara imwe mukufiska marango ghakhe, na kutegherezga ku mazgu ghakhe.

²¹Rumbani FUMU mose mwa vitha vyakhe, mwa ŵateŵeti ŵakhe imwe mukuchita khumbo lakhe.

²²Rumbani FUMU, imwe vilengiwa vyakhe vyose, mu malo ghose umo iyo yikuwusa. Rumba FUMU, we wa mzimu wane!