Read new_tumbuka_bible MaSalimo 104 Bible Online

MaSalimo 104 - new_tumbuka_bible bible

MaSalimo 104

¹Rumba FUMU, wa mzimu wane! Mwe FUMU, Chiuta wane, ndimwe ŵakuru, mwavwara uchindami na ufumunkhuru,

²mwaŵeneimwe muli kudika ungweru nga ndi chakuvwara, mwatandazga mitambo nga ndi hema.

³Imwe mwaŵika michiko ya vipinda vyinu pa maji, mukuzgora maŵingu kuŵa gareta linu, mukukwera pa mapapindo gha mphepo.

⁴Mphepo mukuyizgora kuŵa mathenga ghinu, moto na dimi kuŵa ŵateŵeti ŵinu.

⁵Imwe mukaŵika charu pa malufura ghakhe, mwakuti chireke kusunkhunyiskika kwa muyirayira.

⁶Mukachibenekerera na ndimba nga ndi chakuvwara, maji ghakaŵa pachanya pa mapiri.

⁷Pakuchenya kwinu, maji ghakachimbira. Pakupulika kududumira kwinu, ghakachimbira luŵiro.

⁸Ghakenda pachanya pa mapiri, ghakakhilira ku madambo, mpaka pa malo agho mukaghanozgera.

⁹Mukaŵika mphaka iyo ghakatondeka kujumpha, mwakuti ghareke kubizgaso charu cha pasi.

¹⁰Imwe mukubwibwituska mbwiwi mu madambo, mwakuti maji ghakwenda pakati pa mapiri.

¹¹Ghakupereka maji ghakumwa ku nyama zose za mu thondo, ŵaboli ŵakumalirapo nyota yawo.

¹²Viyuni vya mudera vikukhara pafupi na maji gheneagha, vikwimba mu minthavi ya makuni.

¹³Mukuthirira mapiri kufuma kuchanya, uko mukukhara. Charu chazura na vipambi vya milimo yinu.

¹⁴Imwe mukumezga utheka kuti ng'ombe ziryenge, na mbewu kuti ŵanthu walimenge, mwakuti waŵe na vyakurya kufumira mu dongo.

¹⁵Waŵeso na vinyo kukondweska mtima wa munthu, mafuta ghakuphaka kutozga chisko chakhe, na chakurya kuti chimupe nkhongono.

¹⁶Makuni gha FUMU ghakuthiririka maji ghanandi, ndiyo milanje ya ku Lebanoni iyo yikapanda.

¹⁷Viyuni vikuzenga vivimbo vyawo mu makuni agha, kakoŵa wakuzenga chivimbo chakhe mu makuni gha mulombwa.

¹⁸Mu mapiri ghatali ndimo mukukhara vinkhoma, ndipo mu mphanji ndimo mukubisama mbira.

¹⁹Imwe muli kuŵika mwezi kurongora zinyengo, ndipo dazi likumanya nyengo yakhe yakunjirira.

²⁰Mukuŵika mdima, ndipo ukuŵa usiku, apo vikoko vyose vya mu thengere vikufuma.

²¹Tunkharamu tuchoko tukubangura kupenja nyama, kuromba chakurya chawo kufuma kwa Chiuta.

²²Para dazi likufuma, tukunjira, kuya kagona pasi mu zimphanji zawo.

²³Munthu wakufuma kuya ku milimo yakhe, wakutokatoka kufikira na mise.

²⁴Mwe FUMU, nawo mbunandi wa milimo yinu, mu mahara ghinu muli kulenga vyose, charu nchakuzura na vilengiwa vyinu.

²⁵Kuli nyanja, yikuru chomene na yisani, yeneiyo yili kuzura na vinthu vyambula mapendeko, vinthu vyamoyo, vichoko na vikuru wuwo.

²⁶Mwenemura mukwenda ngaraŵa, na chikoko chakofya cha mu nyanja icho mukachilenga, kusoŵera mwenemumo.

²⁷Vilengiwa vyose ivi vikulindirira imwe, kuvipa chakurya chawo pa nyengo yakwenerera.

²⁸Para mwavipa, vikuwunjika, para mwajula woko linu vikukhuta na viweme.

²⁹Para mwabisa chisko chinu, vikusuzgika, para mwawuskamo muvuchi wawo vikufwa, na kuwereraso ku fuvu.

³⁰Para mwathutiramo Mzimu winu, vikuzgoka kuŵa vyamoyo, ndipo mukunozgaso kawonekero ka charu cha pasi.

³¹Uchindami wa FUMU ukhalirirenge kwa muyirayira, FUMU yisekerere nayo milimo yakhe.

³²Yikulaŵiska pa charu, ndipo chikutenthema, wakukhwaska mapiri ndipo ghakusunkha josi.

³³Nditi ndiyimbire FUMU mu umoyo wane wose, nditi ndimbenge sumu za kurumba Chiuta wane, nyengo zose apo ndichali wamoyo.

³⁴Malanguruko ghane ghaŵenge ghakumukondweska iyo, pakuti nkhusekerera mwa FUMU.

³⁵Ŵakwananga ŵamaremo mu charu cha pasi, ŵaheni nawo ŵareke kuŵamoso. Rumba FUMU, wa mzimu wane! Rumba FUMU.