Read new_tumbuka_bible MaSalimo 105 Bible Online

MaSalimo 105 - new_tumbuka_bible bible

MaSalimo 105

¹Wongani FUMU, chemani zina lakhe, pharazgani milimo yakhe mukati mu ŵanthu.

²Mwimbirani iyo, mwimbirani marumbo, pharani milimo yakhe yose yakuzizwiska.

³Kondwerani mu zina lakhe lituŵa. Awo ŵakuyipenja FUMU ŵasekerere.

⁴Penjani FUMU na nkhongono zakhe, penjani uŵapo wakhe nyengo zose.

⁵Kumbukani milimo yakuzizwiska iyo yili kuchita, minthondwe yakhe na maweruzgo agho yikayowoya,

⁶imwe ŵa mphapu ya Abrahamu, muteŵeti wakhe, ŵana ŵa Yakhobe, ŵakusoreka ŵakhe!

⁷Iyo ndiyo FUMU, Chiuta withu, weruzgi wakhe uli mu charu chose cha pasi.

⁸Wakukumbuka phangano lakhe kwa muyirayira, mazgu agho wakalangula miwiro chikwi chimoza.

⁹Phangano ilo wakachita na Abrahamu, phangano ilo wakachitirapo chirapo kwa Yisake.

¹⁰Phangano ilo wakakhozga kwa Yakhobe kuŵa languro, na la muyirayira kwa Israele.

¹¹Iyo wakati, “Nditi ndikupenge charu cha Kanani, kuŵa phande lako ilo uti uharenge.”

¹²Para ŵakaŵa ŵachoko waka pakuŵapenda, ŵambula na kumanyikwa, na ŵakupanjwamo waka mu charu chira,

¹³ŵakwendendeka kufuma ku fuko ili kuya ku linyakhe, kufuma ku ufumu uwu kuya ku unyakhe,

¹⁴kuti wakazomerezgapo munthu munyakhe kuŵasuzga chara, wakaŵachenya ŵakaronga pa chifukwa cha iwo,

¹⁵wakati, “Mureke kukhwaska ŵakuphakazgika ŵane, mureke kuzichitira uheninchimi zane.”

¹⁶Para wakanjizga njara mu charu, na kunanga vyakurya vyawo vyose,

¹⁷iyo wakatuma munthu kuŵadangirirako, ndiyo Yosefe, mweneuyo wakagulika kuŵa muzga.

¹⁸Malundi ghakhe ghakapwetekeka na vingwe, ndipo singo yakhe yikavwarikika unyoro wa chisulo,

¹⁹mpaka vikafiskika ivyo Yosefe wakayowoya. Mazgu gha FUMU ghakakhozgera kuti ngwambula mrandu.

²⁰Penepapo karonga wakalangula kuti wasutulike, uyo wakawusanga mafuko gha ŵanthu ŵakamusutula nadi.

²¹Wakamuzgora kuŵa sekuru wa nyumba yakhe, na wa mazaza pa vyose ivyo wakaŵa navyo,

²²kuti warongozgenge nduna zakhe nga ndi umo wakukhumbira, na kuŵasambizga mahara ŵakuruŵakuru.

²³Pa nyengo iyo Israele wakiza ku Eguputo, Yakhobe wakapanjwa mu charu cha Hamu.

²⁴FUMU yikandaniska chomene ŵanthu ŵakhe, yikaŵazgora kuŵa ŵankhongono kuruska ŵarwani ŵawo.

²⁵Yikazgora mitima ya ŵaEguputo kuŵatinkha ŵanthu ŵakhe, na kuŵachitira uryarya ŵateŵeti ŵakhe.

²⁶Yikatuma Mozesi muteŵeti wakhe, na Aroni mweneuyo yikamusora.

²⁷Iwo ŵakachita vimanyikwiro vyakhe mukati mwawo, yikachita vya minthondwe mu charu cha Hamu.

²⁸FUMU yikatuma mdima, ndipo charu chikaŵa mu munkhorwe ukuru, ndipouli ŵaEguputo kuti ŵakaghapulikira mazgu ghakhe chara.

²⁹Yikazgora maji ghawo kuŵa ndopa, somba zawo zikafwa.

³⁰Charu chawo chikazura na ŵachule, vipinda vya ŵakaronga navyo vikazura.

³¹Yikayowoya ndipo kukiza milembwera ya vimembe, na nthata mu charu chawo chose.

³²Yikarokweska matalala mu malo mwa vura, yikatuma ŵaleza awo ŵakamwetuka mu charu chawo chose.

³³Yikananga mpheska zawo pamoza na makuni gha vikuyu, ndipo yikapandura makuni gha mu charu chawo.

³⁴Yikayowoya ndipo kukiza zombe, ŵaphanana ŵambula kupendeka.

³⁵Zombe wakarya vyakumera vyose mu charu chawo, pamoza na vuna ya mu minda yawo.

³⁶Chiuta wakakoma ŵana wose ŵa uŵere mu charu chawo, ŵana ŵakudanga kubabika mu nkhongono zawo zose.

³⁷Pamanyuma FUMU yikaŵafumiska ŵaIsraele, uku ŵayegha siliva na golide, ndipo pakaŵavye uyo wakaropwa mukati mu mafuko ghawo.

³⁸ŴaEguputo ŵakasekerera apo ŵaIsraele ŵakafumanga, pakuti chitenthe chikaŵakora chifukwa cha iwo.

³⁹FUMU yikatandazga bingu kuŵabenekerera, na moto kuti uŵape ungweru na usiku.

⁴⁰Iwo ŵakaromba chakurya, ndipo FUMU yikaŵatumira swembe, yikaŵapa chakurya chinandi kufuma kuchanya.

⁴¹Yikaŵajulira jarawe, ndipo maji ghakafuma, ghakenda mu chiparamba nga ndi mronga.

⁴²Yikakumbuka phangano lakhe lakupatulika, na Abrahamu muteŵeti wakhe.

⁴³Ntheura yikarongozga ŵanthu ŵakhe na chimwemwe, ŵakusoreka ŵakhe uku ŵakwimba.

⁴⁴Yikaŵapa vyaru vya ŵamitundu, ŵakahara vipambi vya ŵanthu ŵanyakhe awo ŵakatokatokera,

⁴⁵mwakuti ŵasungilire vilayizgo vyakhe, na kurondezga marango ghakhe. Rumbani FUMU!