Read new_tumbuka_bible MaSalimo 106 Bible Online

MaSalimo 106 - new_tumbuka_bible bible

MaSalimo 106

¹Rumbani FUMU! Wongani FUMU pakuti njiweme, pakuti chisungusungu chakhe chikukhalirira kwa muyirayira.

²Ndi njani wangaphara milimo ya nkhongono ya FUMU, ndi njani wangarumba mwakufikapo?

³Mbakutumbikika awo ŵakweruzga mwakunyoroka, awo ŵakuchita urunji nyengo zose.

⁴Mwe FUMU, mundikumbuke, para mukuŵachitira uweme ŵanthu ŵinu, mundovwire para mukuŵathaska,

⁵mwakuti ndiwone viweme vya ŵanthu ŵinu ŵakusoreka, kuti ndisangane nawo chimwemwe ŵanthu ŵinu, na kuthumbwira mu chiharo chinu.

⁶Ise tananga nga ŵasekuru ŵithu, tachita uheni, tilije kuchita viweme.

⁷Para ŵasekuru ŵithu ŵakaŵa mu Eguputo, kuti ŵakaghanaghana chara na milimo yinu yakuzizwiska. Iwo ŵakaruwa kuzara kwa chisungusungu chinu, kweni ŵakagarukira Chiuta Chikurukuru, para ŵakaŵa pa Nyanja ya Matete.

⁸Ndipouli yikaŵaponoska chifukwa cha zina lakhe, mwakuti yirongore nkhongono yakhe yikuru.

⁹Yikachenya Nyanja ya Matete, ndipo yikomira, yikaŵarongozga pakwambuka mu ndimba nga mpha chiparamba.

¹⁰Ntheura yikaŵathaska ku ŵarwani, na kuŵawombola ku nkhongono ya ŵarwani.

¹¹Ndipo maji ghakabizga ŵarwani ŵawo, pakaŵavye na yumoza wakaponapo.

¹²Penepapo ŵanthu ŵakagomezga mazgu ghakhe, ndipo ŵakimba sumu zakurumba.

¹³Kweni ŵakaruwa luŵiro milimo yakhe, kuti ŵakalindirira urongozgi wakhe chara.

¹⁴Mu mapopa ŵakaŵa na chiryoko chambula kujikora, mu chiparamba ŵakamuyezga Chiuta.

¹⁵Iyo wakaŵapa icho ŵakaromba, kweni wakaŵatumira nthenda yiheni yakughandiska.

¹⁶Para ŵanthu mu msasa ŵakachitira sanje Mozesi, na Aroni, wakupatulika wa FUMU,

¹⁷charu chikayasama ndipo chikamirimitizga Datani, ndipo chikawundira mpingo wa Abiramu.

¹⁸Moto nawo ukabuka mukati mu mpingo wawo, dimi likocherathu ŵaheni ŵara.

¹⁹Iwo ŵakawumba mwana wa ng'ombe pa Phiri la Sinayi, ndipo ŵakasopa chikozgo chakusongonora.

²⁰Ŵakasinthiska uchindami wa Chiuta, na chikozgo cha ng'ombe iyo yikurya utheka.

²¹Ŵakamuruwa Chiuta, Muponoski wawo, uyo wakachita vinthu vikuru mu Eguputo,

²²milimo yakuzizwiska mu charu cha Hamu, ndiposo na vinthu vyakofya pa Nyanja ya Matete.

²³Ndicho chifukwa wakaŵaphalira kuti mphanyi wakaŵamara petu, Mozesi, wakusoreka wakhe, warekenge kwimilira panthazi pakhe, na kukanizga ukari wakhe kuti ureke kuŵamara petu.

²⁴Ndipo ŵakayuyura charu chiweme chira, pakureka kugomezga phangano lakhe.

²⁵Ŵakasinginika mu misasa yawo, ndipo ŵakareka kupulikira mazgu gha FUMU.

²⁶Kwa chifukwa ichi wakarapa pakuwuska woko lakhe, kuti ŵanthu ŵara ŵati ŵafwire mu mapopa.

²⁷Wati wambininiskire mphapu yawo mu ŵamitundu, na kuŵamwalaliskira mu vyaru vinyakhe.

²⁸Ŵanthu ŵara ŵakayamba kusopa chiuta Baala wa ku Peyoro, na kurya sembe zakuperekeka ku ŵakufwa.

²⁹Ntheura ŵakavya ukari wa FUMU na machitiro ghawo, ndipo nthenda yakofya yikawa mukati mwawo.

³⁰Penepapo Finehasi wakawuka na kuŵaŵeyera, ndipo nthenda yakofya yira yikareka.

³¹Ichi chikamikika kwa iyo kuŵa urunji, miwiro na miwiro kwa muyirayira.

³²Ŵakakwiyiska FUMU pa maji gha pa Meriba, ndipo chikamuŵira makora chara Mozesi chifukwa cha iwo.

³³Iwo ŵakamuphyiska mtima chomene, mwakuti Mozesi wakayowoya mazgu mwaluŵiro, kwambula kughanaghana.

³⁴Iwo kuti ŵakaŵamara ŵa mitundu yinyakhe chara, nga ndi umo FUMU yikaŵalangulira.

³⁵Kweni ŵakasazgikana na mafuko ghanyakhe ghara, na kusambira kuchita ivyo iwo ŵakachitanga.

³⁶Ŵakateŵetera ŵangoza ŵawo, awo ŵakazgoka kuŵa chipingo kwa iwo.

³⁷Ŵakapereka ŵana ŵawo ŵanarume na ŵanakazi kuŵa sembe ku viŵanda.

³⁸Ŵakathiska ndopa zambula mrandu, ndopa za ŵana ŵawo ŵanarume na ŵanakazi, ŵeneawo ŵakaŵapereka kuŵa sembe ku ŵangoza ŵa ku Kanani, ndipo charu chikakazuzgika na ndopa.

³⁹Ntheura ŵakajikazuzga na milimo yawo, ndipo ŵakaŵa ŵambula kugomezgeka, nga ndi mwanakazi muzaghali.

⁴⁰Penepapo FUMU yikaŵakwiyira chomene ŵanthu ŵakhe, yikaseruskika na ŵanthu ŵakhe na ŵakhe.

⁴¹Yikaŵapereka ku ŵamitundu, mwakuti awo ŵakaŵatinkhanga ndiwo ŵakaŵawusa.

⁴²Ŵarwani ŵawo ŵakaŵayuzganga, ŵakaŵathereska kuŵaŵika pasi pa muwuso wawo.

⁴³Nyengo zinandi FUMU yikaŵathaska, kweni iwo ŵakaŵa na mitima ya chigaruka, ndipo ŵakayuyurika chifukwa cha zakwananga zawo.

⁴⁴Ndipouli yikaŵapwererera mu visuzgo vyawo, para yikapulika kulira kwawo.

⁴⁵Chifukwa cha iwo, yikakumbuka phangano lakhe, yikaŵagowokera kwakuyana na kuzara kwa chisungusungu chakhe.

⁴⁶Yikachita kuti wose awo ŵakaŵakora umikori, ŵaŵe ŵa chiwuravi na iwo.

⁴⁷Tithaskani, Mwe FUMU, Chiuta withu, mutiwunganiske kufuma pakati pa ŵamitundu, kuti timuwongani pakuzunura zina linu lituŵa, na kuthumbwa pakumurumbani.

⁴⁸Rumbani FUMU, Chiuta wa Israele, kufuma kwa muyirayira mpaka muyirayira swii! Ŵanthu wose ŵayowoye kuti, “Ameni!” Rumbani FUMU!