Read new_tumbuka_bible MaSalimo 107 Bible Online

MaSalimo 107 - new_tumbuka_bible bible

MaSalimo 107

¹Wongani FUMU pakuti njiweme, chifukwa chisungusungu chakhe chikukhalirira kwa muyirayira.

²Ŵakuwomboleka ŵa FUMU, ŵayowoye ntheura, ŵeneawo yaŵawombola ku visuzgo,

³awo yili kuŵawunganya kufuma ku vyaru, kufuma ku mafumiro gha dazi mpaka ku manjiliro ghakhe, kufuma ku mpoto na ku mwera.

⁴Ŵanji ŵakayingayinga mu chiparamba, kwambula kusanga nthowa, ya kuyira ku msumba wakukharamo.

⁵Ŵakaŵa na njara na nyota, ndipo ŵakafwa lunkhuŵa.

⁶Penepapo ŵakalira kwa FUMU mu visuzgo vyawo, ndipo yikaŵathaska ku vyakuŵinya vyawo.

⁷Yikaŵarongozga mu nthowa yakunyoroka, ŵakasuka ŵakafika ku msumba wakukharamo.

⁸Ŵawonge FUMU chifukwa cha chisungusungu chakhe, chifukwa cha milimo yakhe yakuzizwiska ku ŵanthu.

⁹Pakuti FUMU yikumazga nyota ya uyo womirwa, yikuryeska vinthu viweme uyo ŵali na njara.

¹⁰Ŵanyakhe ŵakakharanga mu chisi na mu mdima wa bii, ŵakaŵa ŵakayidi ŵakusuzgika na maunyoro,

¹¹pakuti ŵakagarukira mazgu gha Chiuta, ŵakatafulira urongozgi wa Chiuta Chikurukuru.

¹²Ŵakazotofyeka na milimo yinonono, ŵakawanga pasi kwambula munthu wakuŵawovwira.

¹³Pamanyuma ŵakalira kwa FUMU, para ŵakaŵa mu visuzgo, ndipo FUMU yikaŵathaska kukukomwa kwawo.

¹⁴Yikaŵafumyamo mu chisi na mu mdima wa bii, ndipo yikadumula maunyoro ghawo.

¹⁵Ŵawonge FUMU chifukwa cha chisungusungu chakhe, na milimo yakhe yakuzizwiska ku ŵanthu.

¹⁶Pakuti wakuphyora vijaro vya mkuŵa, na kudumula paŵiri mphingirizgo za chisulo.

¹⁷Ŵanyakhe ŵakaŵa vindere chifukwa cha nthowa zawo ziheni, ŵakajitorera suzgo chifukwa cha majuvyo ghawo.

¹⁸Ŵakatinkha chakurya cha mtundu uliwose, ŵakasenderera kufupi na vipata vya nyifwa.

¹⁹Pamanyuma ŵakalira kwa FUMU, para ŵakaŵa mu visuzgo, ndipo FUMU yikaŵathaska kukukomwa kwawo.

²⁰Yikayowoya nawo ndipo yikaŵachizga, yikaŵathaska kuti ŵareke kumara.

²¹Ŵawonge FUMU chifukwa cha chisungusungu chakhe, na milimo yakhe yakuzizwiska ku ŵanthu.

²²Ŵapereke sembe za kuwonga, ŵaphare milimo yakhe, pakwimba sumu za chimwemwe.

²³Ŵanji ŵakenda mu nyanja mu ngaraŵa, ŵakachitanga malonda mu zinyanja zikuru.

²⁴Ŵakawona milimo ya FUMU, milimo yakhe yakuzizwiska mu zindimba.

²⁵Iyo yikalangula ndipo yikawuska mphepo ya chimphupuru, yeneiyo yikawuska majigha pa nyanja.

²⁶Ngaraŵa zikakwera mpaka muchanya, na kukhiliraso pasi pa ndimba, ndipo ŵanthu ŵakataya mtima chifukwa cha masuzgo ghawo.

²⁷Ŵakayungwa uku na uku kupenthyapenthya, nga mbanthu ŵaloŵevu, ndipo mahara ghaŵamalira.

²⁸Pamanyuma ŵakalira kwa FUMU, para ŵakaŵa mu visuzgo, ndipo FUMU yikaŵathaska ku kukomwa kwawo.

²⁹FUMU yikachetamiska chimphupuru, ndipo majigha gha pa nyanja ghakakhara bata.

³⁰Penepapo ŵakakondwa chifukwa kukaŵa bata, ndipo FUMU yikaŵafikiska ku dowoko, uko ŵakakhumbanga kuruta.

³¹Ŵawonge FUMU chifukwa cha chisungusungu chakhe, na milimo yakhe yakuzizwiska ku ŵanthu.

³²Ŵayichindike mu mpingo wa ŵanthu, na kuyirumba mu maungano gha ŵararaŵarara.

³³FUMU yikuzgora mironga kuŵa chiparamba, mbwiwi za maji kuŵa mtunda womizo.

³⁴Yikuzgora charu cha nyata yiweme kuŵa cha mchere, chifukwa cha ubendezi wa awo ŵakukharamo.

³⁵Yikuzgora chiparamba kuŵa viziŵa vya maji, charu cha chinkhamwa kuŵa mbwiwi za maji.

³⁶Kwenekura ndiko yikuŵakhazika ŵa njara, ndipo iwo ŵakuzenga msumba wakukharamo.

³⁷Ŵakuseŵa mbuto mu minda na kupanda mpheska, ndipo ŵakuŵa na vuna yiweme.

³⁸Chifukwa cha vitumbiko vya FUMU iwo ŵakwandana chomene, ndipo kuti yikuchepeska vyakuŵeta vyawo chara.

³⁹Para ŵanthu ŵakhe ŵakachefyeka na kuyuyurika, kwizira mu kutindiŵizgika, visuzgo na chitima,

⁴⁰FUMU yikuŵika muyuyuro pa ŵakaronga, na kuŵayingiska mu chiparamba mwambula na nthowa.

⁴¹Kweni ŵakavu yikuŵafumyamo mu visuzgo, ndipo yikwandaniska mbumba zawo, nga ndi miskambo ya mberere na mbuzi.

⁴²Ŵarunji ŵakuchiwona ndipo ŵakusekerera, kweni ŵaheni wose ŵakujara milomo yawo.

⁴³Uyo ngwa mahara wasungulire vinthu ivi, ŵanthu ŵaghanaghane na za chisungusungu cha FUMU.