Read new_tumbuka_bible MaSalimo 108 Bible Online

MaSalimo 108 - new_tumbuka_bible bible

MaSalimo 108

¹Sumu. Salimo la Davide. Mwe Chiuta, mtima wane wakhozgeka, nadi, mtima wane wakhozgeka. Nditi ndimbenge sumu na kumurumbani! Pamphuka, wa mzimu wane!

²Pamphukani, imwe chiding'indi na bango! Ine nditi ndipamphuske matandakucha!

³Nditi ndimuwongani imwe, Mwe FUMU, mukati mu mafuko. Nditi ndimbenge marumbo, mukati mu ŵamitundu.

⁴Pakuti chisungusungu chinu nchikuru, kuya kafika kuchanya, ndipo kugomezgeka kwinu, kukuya kafika ku maŵingu.

⁵Mwe Chiuta, mutumphuskike pachanya pa mitambo, uchindami winu uŵe pa charu chose cha pasi.

⁶Mundovwire na nkhongono yinu yikuru na kundizgora, mwakuti nda wakutemweka winu ndithaskike.

⁷Chiuta wayowoya kufuma ku malo ghakhe ghakupatulika kuti, “Nditi ndipatule charu cha Shekemu na kukondwa, ndipo nditi ndigaŵe dambo la Sukoti.

⁸Gileyadi ngwane, Manase nayo ngwane. Efurayimu ndi chipewa chane cha kundivikirira, Yuda ndi nthonga yane ya ufumu.

⁹Mowabu ndi chiŵiya chane chakugezeramo, pa Edomu ndipo pakuŵika skapato zane, pa Filisitiya, nkhuchemerezga mwa kuvivya.”

¹⁰Ndi njani wati wanditorere, ku msumba uwo uli na linga, ndipo ndi njani wati wandirongozgere ku Edomu?

¹¹Asi ndimwe, Mwe Chiuta, mwaŵeneimwe mwatikana? Mwe Chiuta mwareka kuruta na ŵasilikari ŵithu.

¹²Taŵeya, tovwirani kwimikana na ŵarwani withu, pakuti wovwiri wa munthu ngwawakawaka.

¹³Para Chiuta wali pamoza nase, tamkurwa nkhondo na chikanga, iyo ndiyo wamkukandirizgira pasi ŵarwani ŵithu.