Read new_tumbuka_bible MaSalimo 109 Bible Online

MaSalimo 109 - new_tumbuka_bible bible

MaSalimo 109

¹Kwa uyo wakwimbiska sumu. Salimo la Davide. Mwe Chiuta, mwaŵeneimwe nkhumurumbani, mungakharanga chete chara.

²Pakuti ŵanthu ŵaheni na ŵakupusika, ŵakuyowoya vya kwimikana nane, ŵakuyowoya vinthu vyakundipusikizgira.

³Ŵakundizingirizga na mazgu gha tinkho, ndipo ŵakundiwukira kwambula chifukwa.

⁴Mu malo mwa chitemwa icho nkhurongora, iwo ŵakundichombola, kweni ine nkhuŵarombera.

⁵Ŵakundiwezgera uheni pa uweme, ŵakunditinkha mu malo mwa kutemwa kwane.

⁶Mumwimike munthu muheni kuti wamususke, uyo wakumupacha ndiyo weruzge mrandu wakhe.

⁷Para weruzgika, wasangike na mrandu, lurombo lwakhe lupimike kuŵa kwananga.

⁸Mazuŵa gha umoyo wakhe ghaŵe ghachoko waka, munthu munyakhe ndiyo watore mlimo wakhe.

⁹Ŵana ŵakhe ŵaŵe ŵalanda, ndipo muwoli wakhe waŵe chokoro.

¹⁰Ŵana ŵakhe ŵaŵe ŵamayinga na ŵakupempha pempha, ŵachimbizgike pa mahami apo ŵakukhara.

¹¹Awo ŵakukongoreska ndarama, ŵakuse vyose ivyo wali navyo, ŵalendo ŵayore vipambi ivyo ŵakatokatokeranga.

¹²Kuŵavye na yumoza wakumuchitira lusungu, nanga nkhuŵa nawo na chiwuravi ŵana ŵakhe ŵalanda.

¹³Ŵana ŵakhe ŵamare petu, mazina ghawo ghasisitike, mu muwiro wa kunthazi.

¹⁴FUMU yireke kuruwa ubendezi wa ŵawiskekuru, ndipo kwananga kwa ŵanyina kureke kusisitika.

¹⁵Kwananga kwawo kuŵenge panthazi pa FUMU kwa muyirayira kweni iwo ŵareke kukumbukika pa charu.

¹⁶Pakuti munthu yura wakaruwa kuchita vya lusungu, kweni wakazikizganga ŵakavu, ŵasokwano, na ŵakusweka mitima mpaka na kuŵakoma.

¹⁷Iyo wakatemwa kutemba, ntheura nthembo zimuwire iyo. Iyo kuti wakatemwa kutumbika chara, ntheura vitumbiko viŵenge kutali na iyo.

¹⁸Wakajivwarika nthembo kuŵa nga ndi chakuvwara. Nthembo yinyevye thupi lakhe nga ndi maji, nga ndi mafuta mu viwangwa vyakhe.

¹⁹Nthembo zakhe ziŵe nga nchakuvwara, icho wakujivungirizga nacho, nga ndi lamba wakujiphinya nayo zuŵa na zuŵa.

²⁰Ichi ndicho chiŵe chilango chakufumira kwa FUMU, pa awo ŵakundipacha, ŵeneawo ŵakuyowoyera ine uheni.

²¹Kweni imwe, Mwe FUMU, Chiuta wane, mundovwire ine chifukwa cha zina linu. Mundithaske pakuti chisungusungu chinu nchiweme.

²²Chifukwa ine ndine mukavu na musokwano, ndipo mtima wane ŵapwetekeka chomene.

²³Ndazgeŵerekera nga ndi muzgezge wa na mise, ndachimbizgika nga ndi zombe.

²⁴Makongono ghane gharopwa, chifukwa cha kuziŵizga kurya, thupi lane nalo laghanda.

²⁵Ndazgoka kuŵa chisunjizgo ku awo ŵakundipacha, para ŵakundiwona ŵakupukunya mitu yawo.

²⁶Mwe FUMU, Chiuta wane, ndovwirani, ndiponoskani kwakuyana na chisungusungu chinu.

²⁷Ŵamanye kuti ili ndi woko linu ilo likundithaska, Mwe FUMU, ndimwe mwachichita.

²⁸Ŵarekani ŵatembekenge, kweni imwe mutumbikikenge. Awo ŵakupindikana nane ŵakhozgeke soni, kweni ine nda muteŵeti winu ndikondwenge.

²⁹Awo ŵakundipacha ŵayuyurike, ndipo soni ziŵavungirizge nga nchirundo.

³⁰Nditi ndiwonge chomene FUMU, nditi ndimurumbenge mukati mu ŵanthu ŵanandi.

³¹Pakuti FUMU yikukhara pafupi na mukavu, kuti yimuthaske ku awo ŵakukhumba kumukoma.