Read new_tumbuka_bible MaSalimo 112 Bible Online

MaSalimo 112 - new_tumbuka_bible bible

MaSalimo 112

¹Rumbani FUMU! Ngwakutumbikika munthu uyo wakopa FUMU, munthu uyo wakutemwa kusunga marango ghakhe.

²Ŵana ŵakhe ŵati ŵaŵenge ŵankhongono mu charu, Ŵa mphapu ya munthu wakunyoroka, ŵaŵenge ŵakutumbikika.

³Chuma na usambazi vili mu nyumba yakhe, ndipo urunji wakhe ngwa kukhalirira kwa muyirayira.

⁴Ungweru ukuŵalira ŵarunji mu mdima, pakuti FUMU nja uchizi, ya lusungu ndiposo yiweme.

⁵Munthu uyo wakubwerekeska mu wanangwa, uyo wakwendeska vinthu vyakhe mwakurunjika, vinthu vikumukhalira makora

⁶Pakuti murunji wasunkhunyiskikenge chara, wati wakumbukikenge kwa muyirayira.

⁷Iyo kuti wakopa makani ghaheni chara, mtima wakhe ngwa kukhora nganganga, kugomezga mwa FUMU.

⁸Iyo ngwa chikanga, kuti wakopa chara, wasuke wawone kuti ŵarwani ŵakhe ŵathereskeka.

⁹Wakugaŵizga vinthu mwa wanangwa, wakupereka ku ŵakavu. Urunji wakhe ukukhalirira kwa muyirayira, ŵanthu ŵakumukwezga na kumupa nchindi.

¹⁰Muheni wakuchiwona ichi ndipo wakukaripa, wakumemena mino ghakhe na kuzgeŵerekera. Khumbiro la munthu muheni lamkumara.