Read new_tumbuka_bible MaSalimo 115 Bible Online

MaSalimo 115 - new_tumbuka_bible bible

MaSalimo 115

¹Kwa ise chara, Mwe FUMU, kwa ise chara, kweni ku zina linu pera ndiko kuŵenge uchindami, chifukwa cha chisungusungu chinu, na kugomezgeka kwinu.

²Kasi ŵamitundu ŵayowoyerengechi kuti, “Kasi Chiuta wawo wali nkhu?”

³Chiuta withu wali kuchanya. Iyo wakuchita chose icho chikumukondweska.

⁴Kweni vikozgo vyawo ndi siliva na golide, vyakupangika na mawoko gha ŵanthu.

⁵Milomo vili nayo, kweni kuti vikuyowoya chara. Maso vili nagho, kweni kuti vikulaŵiska chara.

⁶Makutu vili nagho, kweni kuti vikupulika chara, Mphuno vili nazo, kweni kuti vikunuska chara.

⁷Mawoko vili nagho, kweni kuti ghangakhwaska chara. Malundi vili nagho, kweni kuti vikwenda chara. Ivyo kuti vikufumiska mazgu chara mu vigoromiro vyawo.

⁸Ŵanthu awo ŵakuvipanga ŵakuyana waka na ivyo, ntheura pera na wose awo ŵakuvigomezga.

⁹Iwe Israele, gomezga mwa FUMU. Iyo ndiyo movwiri wako na chiskango chako.

¹⁰Iwe mbumba ya Aroni, gomezga mwa FUMU. Iyo ndiyo movwiri wako na chiskango chako.

¹¹Imwe mukopa FUMU, gomezgani mwa FUMU. Iyo ndiyo movwiri winu na chiskango chinu.

¹²FUMU yikutikumbuka, ndipo yititumbikenge. Yiti yitumbike Israele, yiti yitumbike mbumba ya Aroni.

¹³Yiti yitumbike wose awo ŵakopa iyo, ŵanthu ŵapasi na ŵapachanya wuwo.

¹⁴FUMU yichite kuti mwandane, imwe pamoza na ŵana ŵinu wuwo.

¹⁵FUMU iyo yikalenga mtambo na charu cha pasi, yimutumbikani.

¹⁶Kuchanya nkhwa FUMU, kweni yili kupereka charu cha pasi ku ŵanthu.

¹⁷Ŵakufwa kuti ŵakurumba FUMU chara, nanga ndi uyo wakukhilira ku charu cha mayiyi.

¹⁸Kweni ise titi tirumbe FUMU, kufuma sono na muyirayira swii!