Read new_tumbuka_bible MaSalimo 116 Bible Online

MaSalimo 116 - new_tumbuka_bible bible

MaSalimo 116

¹Nkhutemwa FUMU, pakuti yapulika mazgu ghane, na kuŵeyerera kwane.

²Iyo yategherezga khutu lakhe kwa ine, ntheura nditi ndiyisopenge apo ndichali wamoyo.

³Vingwe vya ku malo gha ŵakufwa vikandizingirizga ine, ndipo maurwirwi gha nyifwa ghakandikora. Nkhasanga visuzgo, ndipo nkhaŵa na chitima.

⁴Ntheura nkharomba pakuchema zina la FUMU nkhati, “Mwe FUMU, nkhumuŵeyani, thaskani umoyo wane!”

⁵FUMU nja uchizi ndipo nja urunji, Chiuta withu ngwa lusungu.

⁶FUMU yikuŵasunga awo ŵakujiyuyura, para nkhakhizgikira pasi, yikandithaska.

⁷Wa mzimu wane sono pumula, pakuti FUMU yakuchitira vinthu viweme chomene.

⁸Pakuti imwe, Mwe FUMU, mwathaska umoyo wane ku nyifwa, mwafyura masozi ku maso ghane, mwandivikirira kuti ndireke kukhuŵara.

⁹Ntheura nkhwenda panthazi pa FUMU, mu charu cha ŵamoyo.

¹⁰Ntheura nkhugomezga, nangauli nkhayowoya kuti, “Nkhusuzgika chomene.”

¹¹Para nkhaŵa na wofi, nkhati, “Ŵanthu wose mbambula kugomezgeka.”

¹²Kasi icho nditi ndiyiwezgere FUMU nchivichi, pa viweme vyose ivyo yikundichitira?

¹³Nditi ndikwezge nkhombo ya chiponosko, ndipo nditi ndisope pakuzunura zina la FUMU.

¹⁴Nditi ndifiske mapangano ghane kwa FUMU, panthazi pa ŵanthu ŵakhe wose.

¹⁵Nyifwa ya ŵakupatulika nja mtengo wapatali, panthazi pa FUMU.

¹⁶Mwe FUMU, ine ndine muteŵeti winu, ndine muteŵeti winu nadi, mwana wa muteŵeti-kazi winu. Imwe ndimwe mwasutula maunyoro ghane.

¹⁷Nditi ndipereke kwa imwe sembe yakuwonga, na kusopa zina linu FUMU.

¹⁸Nditi ndifiske mapangano ghane kwa FUMU, panthazi pa ŵanthu ŵakhe wose,

¹⁹mu mphara za Nyumba ya Chiuta, na mukati mwako, iwe Yerusalemu. Rumbani FUMU!