Read new_tumbuka_bible MaSalimo 118 Bible Online

MaSalimo 118 - new_tumbuka_bible bible

MaSalimo 118

¹Wongani FUMU chifukwa njiweme. Chisungusungu chakhe chikukhalirira kwa muyirayira.

²Israele wayowoye kuti, “Chisungusungu chakhe chikukhalirira kwa muyirayira.”

³Mbumba ya Aroni yiyowoye kuti, “Chisungusungu chakhe chikukhalirira kwa muyirayira.”

⁴Ŵanthu awo ŵakopa FUMU ŵayowoye kuti, “Chisungusungu chakhe chikukhalirira kwa muyirayira.”

⁵Para nkhaŵa mu suzgo nkharomba kwa FUMU, ndipo yikapulika na kundisutulamo.

⁶Usange FUMU yili kuchiri kwane, kuti ndopenge chara, kasi munthu wangachitachi kwa ine.

⁷FUMU yili pamoza nane kuti yindovwire, nditi ndiwone kuthera kwa awo ŵakunditinkha.

⁸Nkhuweme kugomezga FUMU, kuruska kugomezga munthu.

⁹Nkhuweme kugomezga FUMU, kuruska kugomezga ŵakaronga.

¹⁰Ŵamitundu wose ŵakandizinga kwete, kweni mu zina la FUMU nkhaŵamara wose.

¹¹Ŵakandizinga kwete, nadi ŵakandizinga kosekose. Mu zina la FUMU nkhaŵamara petu.

¹²Ŵakandizinga nga ndi njuchi, kweni ŵakagolera nga ndi moto wa pa minga. Mu zina la FUMU, nkhaŵamara petu.

¹³Nkhang'anuzgika chomene, mwakuti nkhaŵa pafupi kuwa, kweni FUMU yikandovwira.

¹⁴FUMU ndiyo nkhongono zane na sumu yane, iyo ndiyo Muponoski wane.

¹⁵Pulikani sumu zakukondwerera kutonda, mu mahema gha ŵanthu ŵa Chiuta: “Woko la maryero la FUMU ndilo likutonda.

¹⁶Woko la maryero la FUMU ndilo lakwezgeka, woko la maryero la FUMU lachita vinthu vikuru.”

¹⁷Ine kuti ndifwenge chara, kweni ndiŵenge wamoyo, ndipo nditi ndipharazge milimo ya FUMU.

¹⁸FUMU yandilanga chomene, kweni kuti yandilekerera kuti ndifwe chara.

¹⁹Ndijulirani vipata vya Nyumba ya Chiuta, mwakuti ndinjiriremo na kuwonga FUMU.

²⁰Ichi ndicho chipata cha FUMU, ŵarunji ŵati ŵanjirirenge penepapo.

²¹Nkhumuwongani imwe chifukwa mwandipulika, ndipo mwaŵa Muponoski wane.

²²Libwe ilo ŵazengi ŵakalikana, ndilo lazgoka nkhorezgero ya chingodya.

²³FUMU Chiuta ndiyo yachita ichi, ndipo nchakutizukumiska pakuchiwona.

²⁴Ili ndilo zuŵa leneilo FUMU yimika, tiyeni tisekerere na kukondwera.

²⁵Mwe FUMU, tikumuŵeyani tiponoskani, FUMU, tikumuŵeyani, mutipe kutonda.

²⁶Ngwakutumbikika uyo wakwiza mu zina la FUMU, kufuma mu Nyumba ya Chiuta tikumutumbikani.

²⁷FUMU ndi Chiuta, ndipo watipa ungweru. Yambani chiphikiro, uku mwayegha minthavi kuya kafika ku jochero.

²⁸Imwe ndimwe Chiuta wane, ine nditi ndimuwongani imwe. Imwe ndimwe Chiuta wane, ine nditi ndimuchindikaninge.

²⁹Wongani FUMU chifukwa njiweme, pakuti chisungusungu chakhe chikukhalirira kwa muyirayira.