Read new_tumbuka_bible MaSalimo 119 Bible Online

MaSalimo 119 - new_tumbuka_bible bible

MaSalimo 119

¹Mbakutumbikika awo nthowa zawo zilije kalema, ŵeneawo ŵakwenda mu dango la FUMU.

²Mbakutumbikika awo ŵakusunga vilayizgo vyakhe, ŵeneawo ŵakupenja FUMU na mtima wawo wose,

³ŵeneawo kuti ŵakuchita uheni chara, kweni ŵakwenda mu nthowa zakhe.

⁴Imwe muli kulangula kuti vilayizgo vyinu, kuti visungike na phamphu.

⁵Nkhukhumba mendero ghane, mphanyi ghaŵa ghakugomezgeka, pakusunga malangulo ghinu.

⁶Penepapo ine kuti ndilengeskeke chara, para nkhurondezga marango ghinu ghose.

⁷Nditi ndimurumbaninge na mtima wakunyoroka, para nkhusambira maweruzgo ghinu gha urunji.

⁸Nditi ndisungilire malangulo ghinu, mureke kundirekerathu chara.

⁹Kasi muwukirano wangatozga uli mendero ghakhe? Pakughapwererera kwakuyana na mazgu ghinu.

¹⁰Nkhumupenjani na mtima wane wose. Mungazomerezganga chara, kuti ndireke kusunga marango ghinu.

¹¹Mazgu ghinu ndasungilira mu mtima wane, mwakuti ndireke kumunangirani.

¹²Mutumbikike ndimwe, Mwe FUMU, mundisambizge malangulo ghinu.

¹³Nditi ndipharazgenge na mazgu ghane, maweruzgo ghose agho mukuyowoya.

¹⁴Nkhukondwera para nkhusunga vilayizgo vyinu, kuruska kuŵa na mausambazi gha mtundu na mtundu.

¹⁵Nditi ndilangurukenge pa malangulo ghinu, ndipo ndighanaghanenge na nthowa zinu.

¹⁶Nditi ndikondwere mu malangulo ghinu, ndipo mazgu ghinu kuti ndiruwenge chara.

¹⁷Mundichitire nda muteŵeti winu viweme, mwakuti ndiŵe na umoyo na kusunga mazgu ghinu.

¹⁸Jurani maso ghane kuti ndiwone, vyakuzizwiska vya mu marango ghinu.

¹⁹Ine ndili wakupanjwa waka mu charu cha pasi, mureke kundibisira marango ghinu.

²⁰Mtima wane ukumara na kunwekera, maweruzgo ghinu nyengo yose.

²¹Imwe mukuchenya ŵa mutafu, ŵakutembeka ŵara, ŵeneawo ŵakureka kusunga marango ghinu.

²²Wuskaniko kwa ine chisunjizgo na muyuyuro wawo, pakuti nkhusungilira vilayizgo vyinu.

²³Nanga ŵakaronga ŵangakhara wupu kuti ŵimikane nane, muteŵeti winu wati walanguruke na malangulo ghinu.

²⁴Vilayizgo vyinu ndi kukondwera kwane, ndivyo vikundirongozga.

²⁵Ndagona thambalala mu fuvu, mundisisipuske kwakuyana na mazgu ghinu.

²⁶Para nkhaphara vya mendero ghane, imwe mukandizgora, mundisambizge malangulo ghinu.

²⁷Mundimanyiske umo ghaliri malangulo vyinu, nditi ndilangurukenge na milimo yinu yakuzizwiska.

²⁸Mukati mwane mwasongonoka chifukwa cha chitima, mundikhozge kwakuyana na mazgu ghinu.

²⁹Wuskaniko kwa ine nthowa za utesi, muŵe ŵa uchizi pakundisambizga Dango linu.

³⁰Ine ndasankha nthowa yakuti ndiŵe wakugomezgeka, ndaŵika maweruzgo ghinu mu mtima wane.

³¹Nkhudemerera ku vilayizgo vyinu, Mwe FUMU, mureke kuzomerezga kuti ndikhozgeke soni.

³²Nditi ndendenge na phamphu mu nthowa za marango ghinu, para imwe mwakuzga kamanyiro kane.

³³Mwe FUMU, mundisambizge malangulo ghinu, ndipo nditi ndighasunge mpaka ku umaliro.

³⁴Mundipe mahara kuti ndisungenge dango linu, na kulipulikira na mtima wane wose.

³⁵Mundendeske mu nthowa ya marango ghinu, pakuti nkhukondwera nagho.

³⁶Zgolerani mtima wane ku vilayizgo vyinu, ndipo mureke kuwuzgolera ku chuma.

³⁷Zgorani maso ghane kuti ghareke kulaŵiska vya wakawaka, mundipe umoyo kwakuyana na mazgu ghinu.

³⁸Khozgani mazgu ghinu kwa muteŵeti winu, ilo nda awo ŵakumopani imwe.

³⁹Mupatuske chisunjizgo icho nkhopa, pakuti maweruzgo ghinu ngaweme.

⁴⁰Wonani, nkhunwekera malangulo ghinu, mundipe umoyo mu urunji winu.

⁴¹Mwe FUMU, chisungusungu chinu chizenge kwa ine, chiponosko kwakuyana na phangano linu.

⁴²Penepapo nditi ndiŵe na zgoro ku awo ŵakundihoya, pakuti nkhugomezga mu mazgu ghinu.

⁴³Mureke kuwuskamo mazgu gha unenesko mu mlomo, chifukwa nkhugomezga maweruzgo ghinu.

⁴⁴Ine nditi ndisunge dango linu, kwa muyirayira swii!

⁴⁵Nditi ndendenge mu wanangwa, pakuti nkhusungilira malangulo ghinu.

⁴⁶Nditi ndiyowoyeso vilayizgo vyinu, panthazi pa ŵakaronga, ndipo kuti ndikhozgeke soni chara.

⁴⁷Pakuti ine nkhujikondweska mu marango ghinu, gheneagho nkhughatemwa.

⁴⁸Nkhuchindika marango ghinu agho nkhughatemwa, ndipo nditi ndilangurukenge na malangulo ghinu.

⁴⁹Kumbukani mazgu ghinu kwa muteŵeti winu, mu gheneagho mwachita kuti ine ndigomezge.

⁵⁰Ichi ndicho chikundisanguruska chane mu suzgo, kuti phangano linu likundipa umoyo.

⁵¹Ŵakujikuzga ŵakundiseka chomene, kweni ine kuti ndili kupatukana na dango linu chara.

⁵²Para nkhughanaghana za maweruzgo ghinu gha kalekale, nkhuŵa wakusanguruka, Mwe FUMU.

⁵³Nkhuphya mtima chifukwa cha ŵaheni, ŵeneawo ŵakureka dango linu.

⁵⁴Vilayizgo vyinu vyaŵa sumu yane, umoyo wane wose mu charu cha pasi.

⁵⁵Na usiku nkhukumbuka zina linu, Mwe FUMU, ndipo nkhusunga dango linu.

⁵⁶Vitumbiko ivi vyandizira ine, pakuti ndasungilira vilayizgo vyinu.

⁵⁷FUMU ndiyo phande lane, nkhupangana kusunga mazgu ghinu.

⁵⁸Nkhuromba wezi winu na mtima wane wose, mundilengere lusungu kwakuyana na phangano linu.

⁵⁹Para nkhughanaghana za nthowa zinu, nkhujiwezga kuti ndisunge vilayizgo vyinu.

⁶⁰Nkhujiwezga luŵiro kwambula kuziwurika, pakusunga marango ghinu.

⁶¹Nangauli ŵaheni ŵangandithyera ukonde, kuti nkhuruwa dango linu chara.

⁶²Na usiku pakati nkhuwuka kuti ndimurumbani, chifukwa cha maweruzgo ghinu ghakunyoroka.

⁶³Ndine mubwezi wa wose awo ŵakumopani, awo ŵakusunga vilayizgo vyinu.

⁶⁴Mwe FUMU, charu cha pasi, chazura na chisungusungu chinu, mundisambizge malangulo ghinu.

⁶⁵Mwe FUMU, mwachitira makora muteŵeti winu, kwakuyana na mazgu ghinu.

⁶⁶Mundisambizge keruzgiro kaweme na ka vinjeru, pakuti nkhupulikana na marango ghinu.

⁶⁷Pambere nkhaŵa ndichali ndindalangike, nkhapuruka, kweni sono nkhusunga mazgu ghinu.

⁶⁸Imwe ndimwe ŵaweme, ndipo mukuchita uweme, mundisambizge malangulo ghinu.

⁶⁹Ŵakujikuzga ŵakunditetezgera, ndipouli nkhusunga malangulo ghinu, na mtima wane wose.

⁷⁰Ŵanthu aŵa ŵakupulikiska vinthu chara, kweni ine nkhukondwera mu dango linu.

⁷¹Nchiweme kuti nkhalangika, kuti ndisambire malangulo ghinu.

⁷²Dango ilo mukuyowoyera ndiweme, kuruska ndarama zinandinandi za golide na siliva.

⁷³Mawoko ghinu ghakandilenga na kundiwumba, mundipe mahara kuti ndisambire marango ghinu.

⁷⁴Awo ŵakumopani imwe, ŵati ŵandiwone na kusekerera, chifukwa nkhugomezga mazgu ghinu.

⁷⁵Nkhumanya kuti weruzgi winu ngwa kunyoroka, Mwe FUMU, ndipo mwandisuzga chifukwa cha kugomezgeka kwinu.

⁷⁶Chisungusungu chinu chiŵe pafupi kundisanguruska, kwakuyana na phangano linu kwa muteŵeti winu.

⁷⁷Mundilengere lusungu kuti ndiŵe na umoyo, pakuti dango linu likundikondweska.

⁷⁸Ŵakujikuzga ŵakhozgeke soni, chifukwa ŵandipusikizgira na uryarya, kweni ine nditi ndilangurukenge na malangulo ghinu.

⁷⁹Awo ŵakumopani ŵize kwa ine, kuti ŵamanye vilayizgo vyinu.

⁸⁰Mtima wane uŵe wambula kalema mu malangulo ghinu, mwakuti ndireke kukhozgeka soni.

⁸¹Umoyo wane ukunwekera chiponosko chinu, nkhugomezga mu mazgu ghinu.

⁸²Maso ghane ghavuka kulindirira, kuti ghawone icho muli kupangana. Ine nkhufumba kuti, “Kasi muti mundisanguruskenge pauli?”

⁸³Pakuti ine ndazgoka nga thumba la chikumba cha vinyo chakukhwinyata. Ndipouli ndilije kuruwa malangulo ghinu.

⁸⁴Kasi muteŵeti winu wazizipizgenge mpaka pauli? Kasi muŵeruzgenge pauli awo ŵakundizikizga?

⁸⁵Ŵakujikuzga ŵakundijimira zimbuna, ŵanthu awo ŵakureka kupulikira dango linu.

⁸⁶Marango ghinu ghose ngakugomezgeka, Ŵanthu aŵa ŵakundizikizga na utesi. Kumuŵeyani mundovwire!

⁸⁷Ŵali pafupi kundimarizga pa charu cha pasi, ndipouli kuti ndili kughareka malangulo ghinu chara.

⁸⁸Mu chisungusungu chinu, thaskani umoyo wane, kuti ndisunge vilayizgo ivyo mukuyowoya.

⁸⁹Mazgu ghinu, Mwe FUMU, ghali kukhozgeka kuchanya kwa muyirayira.

⁹⁰Kugomezgeka kwinu kukukhalirira ku miwiro yose, Mulikukhazika charu, ndipo chimilira nganganga.

⁹¹Mpaka sono marango ghinu ghali nganganga, pakuti vinthu vyose vikuteŵetera imwe.

⁹²Marango ghinu gharekenge kundikondweska, mphanyi ndili kufwa chifukwa cha visuzgo vyane.

⁹³Malangulo ghinu kuti ndigharuwengepo muyirayira chara, pakuti mukundipa umoyo pa gheneagha.

⁹⁴Ine ndili winu, mundithaske, pakuti ndayezga nadi kusunga malangulo ghinu.

⁹⁵Ŵaheni ŵakundikhazga kuti ŵandikome, kweni ine nkhughanaghana za vilayizgo vyinu.

⁹⁶Ine ndawona kuti vinthu vyose vili na umaliro, kweni marango ghinu ghalije umaliro.

⁹⁷Dango linu nkhulitemwa chomene, nkhulanguruka nalo zuŵa lose.

⁹⁸Dango linu likundizgora kuŵa wa mahara, kuruska ŵarwani ŵane, pakuti liri na ine nyengo zose.

⁹⁹Ine ndili na mahara kuruska ŵasambizgi ŵane wose, pakuti kulanguruka kwane kuli mu vilayizgo vyinu.

¹⁰⁰Ine nkhumanyiska makora kuruska ŵachekuru, pakuti nkhusunga malangulo ghinu.

¹⁰¹Nkhukanizga malundi ghane ku nthowa zose ziheni, mwakuti ndisunge mazgu ghinu.

¹⁰²Ine kuti nkhupatukako ku marango ghinu chara, pakuti imwe muli kundisambizga.

¹⁰³Mazgu ghinu ghakunowa para ndaghalaŵa, ghakunowa mu mlomo wane kuruska uchi.

¹⁰⁴Nkhuŵa na mahara kufuma mu malangulo ghinu, Ntheura nkhutinkha nthowa yose ya upusikizgi.

¹⁰⁵Mazgu ghinu ndi nyali ku malundi ghane, ndi muliko wakungweruska nthowa yane.

¹⁰⁶Ndarapa chirapo ndipo ndakhozgera, kuti ndisungilirenge maweruzgo ghinu.

¹⁰⁷Ine ndasuzgika chomene, Mwe FUMU, mundipe umoyo, kwakuyana na mazgu ghinu.

¹⁰⁸Mwe FUMU, pokerani lurombo lwane lwa kumurumbani, ndipo mundisambizge maweruzgo ghinu.

¹⁰⁹Zuŵa na zuŵa umoyo wane uli mu woko lane, kweni kuti nkhuruwa dango linu chara.

¹¹⁰Ŵaheni ŵandithyera chipingo, kweni ine nkhutayika mu malangulo ghinu chara.

¹¹¹Vilayizgo vyinu nchiharo chane kwa muyirayira, nadi, ndivyo chimwemwe cha mu mtima wane.

¹¹²Mtima wane wanwekera kusunga malangulo ghinu, nyengo zose, mpaka ku umaliro.

¹¹³Nkhutinkha ŵanthu ŵa mitima yiŵiri, kweni nkhutemwa dango linu.

¹¹⁴Imwe ndimwe malo ghakubisamamo na nguru yane, nkhugomezga mu mazgu ghinu.

¹¹⁵Fumaniko kwa ine, imwe mukuchita uheni, mwakuti ndisunge marango gha Chiuta wane.

¹¹⁶Mundifighilire kwakuyana na phangano linu, mwakuti ndiŵe na umoyo, ndipo ndireke kukhozgeka soni, chifukwa cha chigomezgo chane.

¹¹⁷Mundikore mwakuti ndipone kuti nyengo zose ndirondezge malangulo ghinu.

¹¹⁸Mukupata wose awo ŵakupatukako, ku malangulo ghinu, nadi, uryarya wawo ngwambula chandulo.

¹¹⁹Ŵakubendera wose mu charu, mukuŵapima nga ndi makharang'anjo. Pa chifukwa ichi, nkhutemwa vilayizgo vyinu.

¹²⁰Thupi lane likutenthema chifukwa cha kopa imwe, ndipo ndili na wofi na weruzgi winu.

¹²¹Ine ndachita icho nchiweme na cha kunyoroka, Mungandirekanga mu mawoko gha ŵakundisuzga chara.

¹²²Muŵe nkhoswe yiweme kwa nda muteŵeti winu. Ŵakujikuzga ŵareke kundisuzga.

¹²³Maso ghane ghavuka kulindirira chiponosko chinu, na kufiskika kwa phangano linu la kunyoroka.

¹²⁴Mundichitire ine nda muteŵeti winu, kwakuyana na chisungusungu chinu, ndipo mundisambizge marango ghinu.

¹²⁵Ine ndine muteŵeti winu, mundipe mahara gha kupulikiska, kuti ndimanye vilayizgo vyinu.

¹²⁶Sono ndi nyengo yakuti FUMU muchitepo kanthu, pakuti dango linu lasweka.

¹²⁷Kweni ine nkhutemwa marango ghinu, kuruska golide lakwengeka makora.

¹²⁸Ntheura mendero ghane, nkhugharongozgera mu malangulo ghinu, nkhutinkha nthowa yiliyose iyo nja upusikizgi.

¹²⁹Vilayizgo vyinu ndi vyakuzizwiska, ntheura mtima wane ukuvisunga.

¹³⁰Kuvumbukwa kwa mazgu ghinu kukupereka ungweru, kukupa mahara ku ŵanthu waka.

¹³¹Nkhuŵefukaŵefuka uku ndayasama mlomo wane, chifukwa nkhunwekera marango ghinu.

¹³²Zgokerani kwa ine na kundilengera lusungu, nga ndi umo mukuchitira nyengo zose, ku awo ŵakutemwa zina linu.

¹³³Rongozgani mendero ghane, kwakuyana na phangano linu, mungazomerezganga kuti ubendezi uliwose undiwuse.

¹³⁴Ndiwombolani ku awo ŵakundisuzga, mwakuti ndisungilire malangulo ghinu.

¹³⁵Ŵariskani chisko chinu kwa muteŵeti winu, ndipo mundisambizge malangulo ghinu.

¹³⁶Maso ghane ghakuthira masozi ghanandi nga ndi tumironga, chifukwa ŵanthu ŵakusunga marango ghinu chara.

¹³⁷Ŵarunji ndimwe, Mwe FUMU, ndipo ŵeruzgi winu ngwa kunyoroka.

¹³⁸Imwe muli kwimika vilayizgo mu urunji, ndipo ndi vya kugomezgeka.

¹³⁹Phamphu lane likundimara petu, chifukwa ŵarwani ŵane ŵakuruwa mazgu ghinu.

¹⁴⁰Phangano linu nda kugomezgeka, ndipo muteŵeti winu wakulitemwa.

¹⁴¹Ndili wakuchepa na wakuyuyurika, ndipouli kuti nkhuruwa malangulo ghinu chara.

¹⁴²Urunji winu ngwa muyirayira, ndipo dango linu nda kuneneska.

¹⁴³Visuzgo pamoza na vyakuŵinya vyandiwira, kweni marango ghinu ghakundikondweska.

¹⁴⁴Vilayizgo vyinu ndi vya urunji kwa muyirayira, mundipe mahara kuti ndiŵe na umoyo.

¹⁴⁵Nkhulira kwa imwe na mtima wane wose, mundizgore, Mwe FUMU, nditi ndisunge malangulo ghinu.

¹⁴⁶Ine nkhulira kwa imwe, mundiponoske, mwakuti ndisungenge vilayizgo vyinu.

¹⁴⁷Nkhuwuka ku matandakucha na kulira kuti mundovwire, ine nkhugomezga mazgu ghinu.

¹⁴⁸Ine nkhuŵa maso mu maulinda gha usiku, mwakuti ndi langurukenge na phangano linu.

¹⁴⁹Pulikani mazgu ghane, chifukwa cha chisungusungu chinu. Mwe FUMU, sungilirani umoyo wane, chifukwa cha urunji winu.

¹⁵⁰Ŵakusenderera pafupi, awo ŵakundizikizga na makhumbiro ghaheni, ŵeneaŵa ŵali kutali na dango linu.

¹⁵¹Kweni imwe, Mwe FUMU, muli pafupi, ndipo marango ghinu ghose ngakuneneska.

¹⁵²Nkhamanya papo kale, kufuma mu vilayizgo vyane, kuti muli kughakhazikiska kwa muyirayira.

¹⁵³Laŵiskanipo pa visuzgo vyane ndipo mundithaske, pakuti ndilije kuruwa dango linu.

¹⁵⁴Muŵe nkhoswe yane ndipo mundiwombole, mundipe umoyo kwakuyana na phangano linu.

¹⁵⁵Chiponosko chili kutali na ŵanthu ŵaheni, pakuti ŵakupenja malangulo ghinu chara.

¹⁵⁶Mwe FUMU, na lusungu lwinu lukuru, mundipe umoyo kwakuyana na weruzgi winu wa kunyoroka.

¹⁵⁷Ŵakundizikizga na ŵarwani ŵane mbanandi, kweni kuti ndingapatukako ku vilayizgo vyinu chara.

¹⁵⁸Ŵanthu ŵambula chipulikano, nkhuŵalaŵiska na mtima wakunyanyara, chifukwa ŵakureka kusunga mazgu ghinu.

¹⁵⁹Wonani umo nkhutemwera malangulo ghinu, Mwe FUMU sungilirani umoyo wane, kwakuyana na chisungusungu chinu.

¹⁶⁰Mazgu ghinu ghose nga unenesko, maweruzgo ghinu ghose gha urunji nga muyirayira.

¹⁶¹Nduna zikundizikizga kwambula chifukwa, kweni mtima wane ukopa mazgu ghinu.

¹⁶²Nkhusekerera na mazgu ghinu, nga ndi uyo wasanga vyuma vinandi.

¹⁶³Nkhutinkha utesi na kuwunyanyara, kweni dango linu nkhulitemwa.

¹⁶⁴Nkhumurumbani kankhonde na kaŵiri pa zuŵa, chifukwa cha maweruzgo ghinu ghakunyoroka.

¹⁶⁵Awo ŵakutemwa dango linu, ŵakuŵa mu mutende ukuru, palije na kamoza ako kangaŵakhuŵazga.

¹⁶⁶Ine nkhugomezga chiponosko chinu, Mwe FUMU, ndipo nkhusunga marango ghinu.

¹⁶⁷Mtima wane ukusunga vilayizgo vyinu, ine nkhuvitemwa chomene.

¹⁶⁸Ine nkhusunga malangulo ghinu na vilayizgo vyinu, pakuti mendero ghane ghose mukughawona.

¹⁶⁹Kulira kwane kupulikikwe kwa imwe, Mwe FUMU, mundipe mahara kwakuyana na mazgu ghinu.

¹⁷⁰Kuŵeyerera kwane kupulikikwe kwa imwe, ndipo mundithaske kwakuyana na mazgu ghinu.

¹⁷¹Mlomo wane uti umurumbani imwe, pakuti mukundisambizga malangulo ghinu.

¹⁷²Lulimi lwane luti lwimbenge sumu za mazgu ghinu, pakuti marango ghinu ghose ngakunyoroka.

¹⁷³Woko linu liŵe lakunozgeka kundovwira, pakuti ndarondezga malangulo ghinu.

¹⁷⁴Mwe FUMU, ine nkhunwekera chiponosko chinu, ndipo dango linu likundikondweska.

¹⁷⁵Zomerani kuti ndiŵe na umoyo, mwakuti ndimurumbaninge, ndipo maweruzgo ghinu ghandovwirenge.

¹⁷⁶Ine ndapuruka nga ndi mberere yakuzgeŵa, ntheura penjani muteŵeti winu, pakuti nkhuruwa marango ghinu chara.