Read new_tumbuka_bible MaSalimo 132 Bible Online

MaSalimo 132 - new_tumbuka_bible bible

MaSalimo 132

¹Sumu yakwimba pakukwerera ku Yerusalemu. Mwe FUMU, kumbukani Davide, na visuzgo vyakhe vyose ivyo wakazizipizga,

²ndiposo na umo wakarapira kwa FUMU, na kupangana kwa Chiuta, Chikurukuru Yura wa Yakhobe, kuti,

³“Ndinjirengemo mu nyumba yane chara, nanga nkhugona pa chitara chane.

⁴Ndizomerezgenge maso ghane chara, kugona tulo, nanga ndi vikope vyane kuti visiwe,

⁵ndisuke ndiyisangire malo FUMU, malo gha kukharamo Chiuta, Chikurukuru Yura wa Yakhobe.”

⁶Tikapulika za Bokosi la Phangano ku Efurata, tikalisanga mu minda ya Yaara.

⁷“Tiyeni tirute ku malo ghakhe uko FUMU yikukhara, tikasope ku chitambaliro cha malundi ghakhe.”

⁸Mwe FUMU, wukani, mwize ku malo ghinu ghakupumulirako, imwe na Bokosi la Phangano lankhongono yinu.

⁹Ŵasofi ŵinu ŵavwarikike urunji, ŵakupatulika ŵinu ŵachemerezge na chimwemwe.

¹⁰Chifukwa cha muteŵeti winu Davide, mureke kumukana wakuphakazgika winu.

¹¹FUMU yikachita chirapo kwa Davide, chirapo cha unenesko icho yichisinthenge chara, chakuti, “Yumoza wa ŵana ŵako, ndizamkumukharika pa chizumbe chako.

¹²Usange ŵana ŵako ŵakusunga phangano lane, na visimikizgo ivyo ndizamkuŵasambizga, penepapo ŵana ŵawo ŵizamkukhara, pa chizumbe chako kwa muyirayira.”

¹³Pakuti FUMU yasankha msumba wa Ziyoni, yakhumba kuti uŵe malo ghakhe ghakukharamo.

¹⁴FUMU yikuti, “Agha ndi malo ghane, ghakupumulirapo kwa muyirayira, pano ndipo nditi ndikharenge, pakuti ndakhumbapo.

¹⁵Nditi ndiwutumbike msumba uwu, na fumpha yinandi, ŵanthu ŵakhe ŵakavu, nditi ndiŵakhutiske vyakurya vinandi.

¹⁶Ŵasofi ŵakhe ndizamkuŵavwarika chiponosko, ŵakupatulika ŵakhe ŵizamkuchemerezga na chimwemwe.

¹⁷Kwenekura ndiko nditi ndichite, kuti lusengwe luphuke kufuma kwa Davide. Ndamunozgera nyali kwa wakuphakazgika wane.

¹⁸Nditi ndiŵavwarike soni ŵarwani ŵakhe, kweni pa iyomwene mphumphu yakhe yiti ying'azimenge.”