Read new_tumbuka_bible MaSalimo 135 Bible Online

MaSalimo 135 - new_tumbuka_bible bible

MaSalimo 135

¹Rumbani FUMU! Rumbani zina la FUMU, rumbani FUMU, imwe mwa ŵateŵeti ŵakhe,

²Imwe mukuteŵeta mu nyumba ya FUMU, mu mabaraza gha mu Nyumba ya Chiuta withu.

³Rumbani FUMU, pakuti njiweme, yimbani sumu za kurumba zina lakhe, pakuti iyo nja uchizi.

⁴Pakuti FUMU yasankha Yakhobe kuŵa wakhe na wakhe, yasankha Israele kuŵa chuma chakhe na chakhe.

⁵Pakuti nkhumanya kuti FUMU njikuru, ndipo kuti FUMU yithu, yikuruska ŵachiuta wose.

⁶FUMU yikuchita chilichose icho nchiweme kwa iyo, kuchanya na pa charu cha pasi, mu zinyanja na mu zindimba zose.

⁷Yikuchita kuti maŵingu ghakwere, ku mphererekezgo za charu, ndiyo yikumwetuska ŵaleza ŵa vura, yikufumiska mphepo kufuma umo yikusunga.

⁸FUMU ndiyo yikakoma ŵana ŵa uŵere mu Eguputo, ŵana ŵa uŵere ŵa ŵanthu na vinyama wuwo.

⁹Iwe Eguputo, FUMU ndiyo yikatuma, vimanyikwiro na vya minthondwe, kwa Faro na ku nduna zakhe zose.

¹⁰Ndiyo yikasakaza mafuko ghanandi, yikakoma ŵakaronga ŵankhongono.

¹¹Yikakoma Sihoni, karonga wa ŵaAmori, Ogi, karonga wa charu cha Bashani, na ŵakaronga wose ŵa charu cha Kanani.

¹²Ndiyo yikapereka charu chawo, kuŵa chiharo cha ŵanthu ŵakhe ŵa Israele.

¹³Zina linu, Mwe FUMU, likukumbukika kwa muyirayira, lumbiri lwinu, Mwe FUMU, likhalirenge ku miwiro yose.

¹⁴Pakuti FUMU yiti yiŵarunjiske ŵanthu ŵakhe, yiti yiŵe na chiwuravi pa ŵanthu ŵakhe.

¹⁵Vikozgo vya ŵamitundu ndi siliva na golide, mlimo wa mawoko gha ŵanthu.

¹⁶Vili nayo milomo, kweni kuti vikuyowoya chara, vili na maso, kweni kuti vikulaŵiska chara.

¹⁷Vili na makutu, kweni kuti vikupulika chara, nanga ndi muvuchi mu milomo yawo mulije.

¹⁸Awo ŵakuvipanga, ŵayanenge na vyeneivi, wose awo ŵakuvigomezga, ŵayanenge navyo.

¹⁹Imwe ŵaIsraele, rumbani FUMU imwe ŵa mbumba ya Aroni, rumbani FUMU.

²⁰Imwe ŵa mbumba ya Levi, rumbani FUMU, imwe mukopa FUMU, rumbani FUMU.

²¹Rumbani FUMU kufuma mu Ziyoni, FUMU iyo yikukhara mu Yerusalemu. Rumbani FUMU!