Read new_tumbuka_bible MaSalimo 139 Bible Online

MaSalimo 139 - new_tumbuka_bible bible

MaSalimo 139

¹Kwa uyo wakwimbiska sumu. Salimo la Davide. Mwe FUMU, mwandisanda, ndipo mwandimanya.

²Imwe mukundimanya ine para nkhukhara pasi na para nkhuwuka. Maghanoghano ghane mukughamanyira patali.

³Mukundiŵanika kwenda kwane na kugona, mwazgoŵerana nagho mendero ghane.

⁴Pambere ndindayowoye lizgu mu mlomo wane, imwe mwalimanya kale, Mwe FUMU.

⁵Imwe mukundivikirira kunyuma na kunthazi wuwo, ndipo mukuŵika woko linu la vitumbiko pa ine.

⁶Vinjeru vya ntheura vikundizizika chomene. Nvya pachanya chomene, kuti ndingavipulikiska chara.

⁷Ndiyenkhu kuti ndireke kukumana na Mzimu winu? Panji ndichimbilirenkhu kuti ndifumepo pa maso pinu?

⁸Usange ndingakwerera kuchanya, imwe muli kwenekuko, usange ndingagona mu malo gha ŵakufwa, imwe muli mwenemumo.

⁹Usange ndingadukira ku mafumiro gha dazi, panji kuya kafika ku umaliro wa nyanja,

¹⁰nanga kungaŵa kwenekura, woko linu lamkundirongozga, woko linu la maryero lamkundikora.

¹¹Usange ine nkhuti, “Mdima ndiwo undibenekerere, ndipo ungweru wakundizingirizga uzgoke usiku,”

¹²nanga ndi mdima, kuti ndi mdima kwa imwe chara. Usiku ukuŵala nga ndi muhanya, pakuti kwa imwe mdima ukuyana waka na ungweru.

¹³Pakuti imwe mukalenga vyose vya mukati mwane, mukandirunga pamoza mu nthumbo ya amama.

¹⁴Nkhumurumbani imwe, pakuti imwe muli ŵakofya na ŵakuzizwiska. Mlimo yinu njakuzizwiska, imwe mukundimanya makora ghene.

¹⁵Karungikiro kane kuti kakabisika kwa imwe chara, para nkhapangikanga ku udesi, para nkhawumbikanga mwa unkhwantha, mu nthumbo ya amama.

¹⁶Maso ghinu ghakawona kaŵiro kane ndindababike, mazuŵa gha umoyo wane wose, mukaghalemberathu mu buku linu, pambere ghandayambe kupendeka.

¹⁷Mwe Chiuta, maghanoghano ghinu, ngakuzirwa chomene kwa ise, nganandi chomene, ghambula kupendeka.

¹⁸Usange ndingakhumba kughapenda, nganandi chomene kuruska muchenga. Para nkhuwuka mu tulo, nkhuŵa pamoza namwe.

¹⁹Mwe Chiuta, mphanyi mwangukoma ŵaheni, na kuti ŵanthu ŵakuthiska ndopa, mphanyi ŵawukako kwa ine,

²⁰ŵanthu awo ŵakumuyowoyerani vinthu viheni, ŵeneawo ŵakwimikana na mtima uheni.

²¹Mwe FUMU, asi ine nkhuŵatinkha, awo ŵakutinkha imwe? Asi ine nkhuŵanyanyara awo ŵakumuwukirani imwe?

²²Ine nkhuŵatinkha na tinkho lenecho, nkhuŵapima kuŵa ŵarwani ŵane.

²³Mwe Chiuta, mundisande ine, na kumanya mtima wane. Mundiyezge ine na kumanya maghanoghano ghane.

²⁴Muwone usange kalimo kendero kaheni mwa ine, ndipo mundirongozge mu nthowa ya muyirayira.