Read new_tumbuka_bible MaSalimo 140 Bible Online

MaSalimo 140 - new_tumbuka_bible bible

MaSalimo 140

¹Kwa uyo wakwimbiska sumu. Salimo la Davide. Mwe FUMU, mundithaske ku ŵanthu ŵaheni, mundivikirire ku ŵanthu ŵa mbembe,

²ku awo ŵakunozgera vinthu viheni, mu mitima yawo, na kuwuska nkhondo nyengo zose.

³Malulimi ghawo ngakuthwa nga ndi gha njoka, mu milomo yawo muli urwirwi nga wa njoka ya chipiri.

⁴Mwe FUMU, mundivikirire ku mawoko gha ŵanthu ŵaheni, mundisungilire ku ŵanthu ŵa mbembe, awo ŵanozgera kupiringizga malundi ghane.

⁵Ŵakujikuzga ŵandibisira chipingo, ŵatandazga ukonde wa vingwe, ndipo ŵandithyera vipingo, mu mphepete mwa nthowa.

⁶Nkhuyowoya kwa FUMU nkhuti, “Imwe ndimwe Chiuta wane.” Tegherezgani khutu, Mwe FUMU, kuti mupulike mazgu gha kuŵeya kwane.

⁷Mwe FUMU, Chiuta wane, ndimwe muthaski wane wankhongono, imwe mukuvikirira umoyo wane pa nyengo ya nkhondo.

⁸Mwe FUMU mureke kuŵapa ŵaheni ivyo ŵakukhumba, mureke kuŵawovwira pa chiŵembu chawo.

⁹Ŵarwani ŵane awo ŵandizinga ŵareke kundiruska, mazgu ghawo ghaheni ghaŵawerere ŵekha.

¹⁰Makara gha moto gharakatire pa iwo, ŵaponyeke mu vizongwe, ŵareke na kufumamo.

¹¹Mwendanato wareke na kuŵamo mu charu, uheni umurondore luŵiroluŵiro munthu wa mbembe.

¹²Nkhumanya kuti FUMU ndi nkhoswe ya awo ŵakusuzgika, yikuŵayeruzga ŵakavu mu urunji.

¹³Nadi, ŵarunji ŵati ŵarumbe zina linu, Ŵakunyoroka mu mtima ŵati ŵakharenge panthazi pinu.