Read new_tumbuka_bible MaSalimo 143 Bible Online

MaSalimo 143 - new_tumbuka_bible bible

MaSalimo 143

¹Salimo la Davide. Mwe FUMU, pulikani lurombo lwane, tegherezgani kuti mupulike maŵeyerero ghane. Mundizgore chifukwa cha kugomezgeka kwinu, na urunji winu.

²Mureke kweruzga muteŵeti winu, pakuti palije munthu wamoyo, uyo ndi murunji pa maso pinu.

³Murwani wandirondezga ine, wafyandira umoyo wane pasi. Iyo wandikharika mu mdima, nga ndi awo ŵali kufwa kale.

⁴Ntheura mzimu wane waropwa mukati mwane, mtima wane nawo wachiruka mukati mwane.

⁵Nkhughakumbuka mazuŵa gha kale ghara, nkhulanguruka na vyose ivyo muli kuchita, nkhughanaghana na mlimo wa mawoko ghinu.

⁶Nkhukwezgera mawoko ghane kwa imwe, mzimu wane ukomirwira imwe, nga ndi charu cha chinkhamwa.

⁷Mwe FUMU, mundizgore luŵiro, pakuti mzimu wane wawa nkhumbi, Mureke kubisa chisko chinu kwa ine, mzire ndiŵe nga ndi awo ŵakuruta ku dindi.

⁸Na mulenje ndipulike vya chisungusungu chinu, pakuti ine nkhugomezga imwe. Ndisambizgani nthowa iyo ndingendamo, chifukwa kwa imwe, ndiko nkhwinuskira mzimu wane.

⁹Mwe FUMU, ndithaskani ku ŵarwani ŵane, pakuti nkhuchimbilira kwa imwe, kuti ndibisameko.

¹⁰Mundisambizge kuchita khumbo linu, chifukwa imwe ndimwe Chiuta wane. Mzimu winu uweme undirongozge ine, mu nthowa yakuti waka skee.

¹¹Chifukwa cha zina linu, Mwe FUMU, sungilirani umoyo wane Mundifumyemo mu visuzgo, chifukwa cha urunji winu.

¹²Chifukwa cha chisungusungu chinu pa ine, muŵakome ŵarwani ŵane, muŵamare petu awo ŵakupindikana nane, pakuti ine ndine muteŵeti winu.