Read new_tumbuka_bible MaSalimo 144 Bible Online

MaSalimo 144 - new_tumbuka_bible bible

MaSalimo 144

¹Salimo la Davide. Yirumbike FUMU, jarawe lane. Iyo yikusambizga mawoko ghane kurwa nkhondo, ndipo minwe yane kumanya kurwa.

²Iyo ndiyo jarawe[3] lane na linga lane, ndiyo chigongwe chane na muthaski wane, chiskango chane mwa mweneuyo nkhubisamamo, yeneiyo yikundithereskera mafuko.

³Mwe FUMU, kasi munthu ndi vichi, kuti mumupwererenge, panji mwana wa munthu, kuti mumughanaghanirenge?

⁴Munthu ndi muvuchi waka, mazuŵa ghakhe ghali nga ndi muzgezge, uwo ukukhariska chara.

⁵Mwe FUMU, parurani mtambo winu kuti mukhilire pasi, khwaskani mapiri kuti ghasunkhe josi.

⁶Mwetuskani ŵaleza kuti muŵambininiske ŵarwani ŵane, ponyani mivwi yinu kuti muŵabarariska.

⁷Nyoroskani woko linu kufuma kuchanya uko, mundithaske na kundiwombola ku vimaji vinandi, ku nkhongono ya ŵalendo.

⁸Ŵeneawo ŵakuyowoya mautesi, ndipo ŵakuchita mapangano gha utesi.

⁹Mwe Chiuta, nditi ndimwimbiraninge sumu yiphya, nditi ndimurizgirani chiding'indi cha malusinga khumi,

¹⁰mwaŵeneimwe mukaŵapa ŵakaronga kuvivya, uyo wakuthaska Davide muteŵeti wakhe, ku lupanga lwakofya.

¹¹Mundithaske ku nkhondo yakofya, mundiponoske ku nkhongono za ŵalendo, ŵeneawo ŵakuyowoya mautesi nyengo zose, ndipo ŵakuteta uku ŵachita phangano.

¹²Ŵana ŵithu ŵanarume, mu uwukirano wawo, ŵaŵe nga ndi makuni ghakukura mwa nkhongono. Ŵana ŵithu ŵanakazi, ŵaŵe ŵakutowa, nga ndi mizati ya pa chingodya, iyo yanozgekera kuzengera nyumba ya ufumu.

¹³Nthamba zithu zizure, zirongeke na vyakurya vya mitundumitundu. Mberere na mbuzi zithu zibabe ŵana vikwivikwi, mu maluhari ghithu.

¹⁴Ng'ombe zithu ziŵe na bere, zireke kusoposka panji kutondeka kubaba. Mu ŵagurwe ŵithu kuŵavye chitengero, chifukwa cha visuzgo.

¹⁵Mbakutumbikika ŵanthu, ŵeneawo ŵakupokera vitumbiko vya ntheura. Mbakutumbikika ŵanthu, ŵeneawo Chiuta wawo ndi FUMU.