Read new_tumbuka_bible MaSalimo 145 Bible Online

MaSalimo 145 - new_tumbuka_bible bible

MaSalimo 145

¹Sumu ya marumbo. Ya Davide. Nditi ndimurumbaninge chomene, imwe Chiuta wane na Karonga wane. Nditi ndichindike zina linu kwa muyirayira swii!

²Nditi ndimurumbaninge imwe zuŵa na zuŵa, na kuchindika zina linu kwa muyirayira swii!

³FUMU njikuru ndipo yikwenera kurumbika chomene, ukuru wakhe ngwambula mapenjeko.

⁴Muwiro umoza uti urumbenge milimo yinu, ku muwiro unyakhe, uti upharazgenge milimo yinu ya nkhongono.

⁵Ŵati ŵayowoye vya uchindami, wa ufumunkhuru winu ukuru, ŵati ŵaghanaghanenge za milimo yinu yakuzizwiska.

⁶Ŵanthu ŵati ŵapharazge milimo yinu yakofya, ine nditi ndithuwuske ukuru winu.

⁷Ŵanthu ŵamkuphara lumbiri, lwa uweme winu wakuzara, ŵamkwimba sumu za kurumba urunji winu.

⁸FUMU nja uchizi na ya chiwuravi, nja kuziwurika kukaripa na ya chisungusungu chikuru.

⁹FUMU njiweme ku wose, yili na chiwuravi pa vilengiwa vyakhe vyose.

¹⁰Mwe FUMU, vyose ivyo muli kulenga, viti vimuwongani imwe, ŵakupatulika ŵinu wose, ŵati ŵamurumbaninge.

¹¹Ŵati ŵaphare vya uchindami wa ufumu winu, na kuphara vya nkhongono zinu,

¹²mwakuti milimo yinu ya nkhongono, na uchindami wakufikapo wa ufumu winu, vimanyikwe ku ŵanthu wose.

¹³Ufumu winu ndi ufumu wa muyirayira, mazaza ghinu ghakukhalirira ku miwiro yose. FUMU nja kugomezgeka ku vyose iyo yikuyowoya, nja uchizi mu vyose ivyo yikuchita.

¹⁴FUMU yikufighilira wose awo ŵakukhuŵara, yikuŵawuska wose awo ŵakhizgikira pasi.

¹⁵Wose ŵakulaŵiska kwa imwe na chigomezgo, imwe mukuŵapa chakurya chawo, mu nyengo yakwenerera.

¹⁶Woko linu likupereka kwa wanangwa, mukuchipa chamoyo chilichose ivyo chikukhumba.

¹⁷FUMU nja urunji mu vyose ivyo yikuchita, nja lusungu mu machitiro ghakhe ghose.

¹⁸FUMU yili pafupi na wose awo ŵakuyiromba, pafupi na wose awo ŵakuyisopa mu unenesko.

¹⁹Wose awo ŵakuyichindika, yikuŵapa ivyo ŵakukhumba, yikupulika kulira kwawo na kuŵaponoska.

²⁰FUMU yikuŵasungilira wose awo ŵakuyitemwa, kweni ŵaheni wose yiti yiŵamare petu.

²¹Mlomo wane uti urumbenge FUMU, vyamoyo vyose vichindike zina lakhe lituŵa, kwa muyirayira swii!