Read new_tumbuka_bible MaSalimo 146 Bible Online

MaSalimo 146 - new_tumbuka_bible bible

MaSalimo 146

¹Rumbani FUMU! Rumbanga FUMU, iwe wa mzimu wane!

²Ine nditi ndirumbe FUMU umoyo wane wose, nditi ndiyimbe sumu za kurumba Chiuta wane, nyengo zose za umoyo wane.

³Rekani kugomezga ŵakaronga, mwa munthu uyo kuti wangamovwirani chara.

⁴Para muvuchi wawo wafumamo, ŵakuwerera ku dongo. Vyose ivyo ŵakanozgera vikumara zuŵa leneliro.

⁵Ngwakutumbikika munthu uyo movwiri wakhe, ndi Chiuta wa Yakhobe, mweneuyo chigomezgo chakhe, chili kwa FUMU, Chiuta wakhe,

⁶Chiuta uyo wakalenga mtambo na charu cha pasi, nyanja na vyose ivyo vili mwenemumo, wakusungilira kugomezgeka kwakhe kwa muyirayira.

⁷Wakuŵayeruzgira mu urunji awo ŵakutindiŵizgika, wakuŵapa vyakurya awo ŵali na njara. FUMU yikuŵasutula ŵakayidi.

⁸FUMU yikujula maso gha ŵachiburumutira. FUMU yikuŵakwezga wose awo ŵakukhizgikira pasi, yikutemwa awo ŵakuchita urunji.

⁹FUMU yikupwererera awo ŵakupanjwa mu charu, yikufighilira vyokoro na awo mbalanda. Kweni yikutimbanizga nthowa za ŵanthu ŵaheni.

¹⁰FUMU ndiyo yikuwusa kwa muyirayira, Chiuta wako, iwe Ziyoni, wizamkuwusa, kuya kafika ku miwiro yose. Rumbani FUMU!