Read new_tumbuka_bible MaSalimo 148 Bible Online

MaSalimo 148 - new_tumbuka_bible bible

MaSalimo 148

¹Rumbani FUMU! Rumbani FUMU, imwe mukukhara kuchanya, rumbani iyo, imwe muli mu mlengalenga.

²Rumbani iyo, mose mwa ŵangelo ŵakhe, rumbani FUMU, mose mwa vitha vyakhe.

³Rumbani iyo, imwe dazi na mwezi, rumbani iyo, imwe mose nyenyezi za kuŵala.

⁴Rumbani iyo, imwe mtambo wa kuchanya nkhanira, na imwe maji gha pachanya pa mtambo.

⁵Vyose virumbe zina la FUMU, pakuti yikalangula, ndipo vikalengeka.

⁶Yikavikhozga kuti viŵeko kwa muyirayira swii! Yikaŵikako dango ilo kuti lingasinthika chara.

⁷Rumbani FUMU kufumira pa charu, imwe vinjoka vya mu nyanja na imwe zindimba zose,

⁸imwe moto na matalala, imwe chiwuvi na jumi, imwe mphepo ya chimphupuru, mwaŵeneimwe mukufiska languro lakhe!

⁹Imwe mapiri na tumapiri tose, imwe makuni gha vipambi na imwe milanje yose!

¹⁰Imwe vikoko na vyakuŵeta vyose, imwe mukukhwaŵa pasi, na imwe viyuni vyakuwuruka!

¹¹Imwe ŵakaronga ŵa charu na ŵamitundu wose, nduna na wose awo ŵakuwusa mu charu!

¹²Imwe ŵanyamata pamoza na ŵasungwana, imwe mwa ŵachekuru na ŵana!

¹³Wose ŵarumbe zina la FUMU, pakuti zina lakhe pera ndilo ndakuchindikika. Uchindami wakhe ukuruska charu, na kuchanya wuwo.

¹⁴FUMU yatumphuska nkhongono, chifukwa cha ŵanthu ŵakhe, na marumbo pa ŵakupatulika ŵakhe ŵaIsraele, ŵeneawo mbanthu ŵakhe ŵakutemweka. Rumbani FUMU!