Read new_tumbuka_bible MaSalimo 16 Bible Online

MaSalimo 16 - new_tumbuka_bible bible

MaSalimo 16

¹Salimo la Davide la mtundu wa Mikitamu. Mundisungilire, Mwe Chiuta, pakuti mwa imwe ndimo nkhubisamamo.

²Ine nkhuti kwa FUMU, “Imwe ndimwe FUMU yane. Pa dera pa imwe ndilije chinthu chinyakhe chiweme.”

³Kwakuyana na ŵarunji mu charu, iwo ndiwo mbakuzirwa, ŵeneawo ine nkhucha nawo kwakuruska.

⁴Awo ŵakusankha ŵachiuta ŵanyakhe, ŵakusazgirako visuzgo vyawo. Ine kuti ndiŵenge nawo pa sembe zawo za ndopa chara, nanga nkhuzunura mazina ghawo.

⁵FUMU ndiyo chiharo na nkhombo yane, umoyo wane uli mu mawoko ghinu.

⁶Mphaka za malo ghane zandiŵira mu malo ghaweme. Inya nadi, ndapokera chiharo chiweme.

⁷Ine nditi ndirumbe FUMU iyo yikundirongozga, mtima wane ukundirongozga na mu usiku wuwo.

⁸Nyengo zose nkhughanaghana za FUMU. Pakuti yili ku woko lane la maryero, ine kuti ndisunkhunyiskikenge chara.

⁹Ntheura mtima wane ukukondwa, mzimu wane ukusekerera, thupi lane nalo likukhara mu kufwasa.

¹⁰Pakuti imwe mulije kundireka ku malo gha ŵakufwa, nanga nkhuzomerezga wakupatulika winu kuruta ku dindi.

¹¹Imwe mukundirongora nthowa ya ku umoyo, Panthazi pinu pali chimwemwe chakuzara, ku woko linu la maryero kuli vyakukondweska vya muyirayira.