Read new_tumbuka_bible MaSalimo 17 Bible Online

MaSalimo 17 - new_tumbuka_bible bible

MaSalimo 17

¹Lurombo lwa Davide. Mwe FUMU, pulikani apo nkhuromba weruzgi winu wakunyoroka, tegherezgani ku kulira kwane. Pulikizgani khutu ku lurombo lwane, kufuma ku mlomo wambula upusikizgi.

²Dumulani ndimwe kuti ine ndilije mrandu, maso ghinu ghawone icho nchiweme.

³Usange mungasanda mtima wane, panji kundichezgera na usiku, ndipo usange mungandiyezga, imwe kuti musangengemo uheni mwa ine chara. Mlomo wane kuti ukuyowoya viheni chara.

⁴Kwakuyana na ivyo ŵanthu ŵakuchita, ine ndasungilira mazgu ghinu, ndarondezga nthowa za ŵa nkhaza chara.

⁵Mendero ghane ghakuskepererana na nthowa zinu, malundi ghane kuti ghateremuka chara.

⁶Mwe Chiuta, nkhuromba kwa imwe, chifukwa mukundizgora. Tegherezgani khutu linu kwa ine, pulikani mazgu ghane.

⁷Rongorani chisungusungu chinu mwakuzizwiska, imwe mukuponoska na woko linu la maryero, awo ŵakubisama mwa imwe ku ŵarwani ŵawo.

⁸Mundisungilire nga nkhamboni ka jiso linu. Mundibise mu mufwiri wa mapapindo ghinu,

⁹ku ŵaheni awo ŵakundiskogha, ku ŵarwani ŵane ŵakofya awo ŵakundizingirizga.

¹⁰Mitima yawo yilije chitima, ndipo ŵakuyowoya mwakujikuzga.

¹¹Ŵandirondezga, sono ŵandizingirizga, maso ghawo ghadodoliska pa ine kuti ŵandiwiskire pasi.

¹²Ŵali nga ndi nkharamu iyo yapukwa kutwazura, nga ndi nkharamu yichoko iyo yakhazga waka.

¹³Wukani, Mwe FUMU! Limbanani nawo na kuŵatonda. Mundithaske na lupanga lwinu, kufuma ku ŵanthu ŵaheni.

¹⁴Mundithaske na woko linu, Mwe FUMU ku ŵanthu ŵa ntheura, awo umoyo wawo ngwa kutemwa vya pano pasi. Muŵakhutiske na viphyo ivyo muli kuŵasungira. Ŵana ŵawo ŵaŵe navyo vya kuzara, iwo nawo ŵasidirekoso ŵana ŵawo.

¹⁵Kweni ine mu urunji wane, ndizamkuwona chisko chinu. Para ndamkuwuka, ndizamkukhorwa, pakuwona kaŵiro kinu.