Read new_tumbuka_bible MaSalimo 18 Bible Online

MaSalimo 18 - new_tumbuka_bible bible

MaSalimo 18

¹Kwa uyo wakwimbiska sumu. Salimo la Davide, muteŵeti wa FUMU. Wakimbira FUMU pa zuŵa ilo yikamuthaskira ku ŵarwani ŵakhe wose ndiposo na kwa Sauli. Mwe FUMU, ine nkhumutemwani. Imwe ndimwe nkhongono yane.

²FUMU ndiyo jarawe lane, linga lane na muthaski wane. Chiuta wane ndiyo jarawe lane, mwa mweneuyo nkhubisamamo. Ndiyo nguru yane na lusengwe lwa chiponosko chane, ndiyo linga lane lakukhora.

³Ine nkhuchema kwa FUMU, yeneiyo yikwenera kurumbika, ndiyo yikundiponoska ku ŵarwani ŵane.

⁴Vikondo vya nyifwa vikandizingirizga, mwezga wa pharaniko ukandigundizga.

⁵Vikondo vya ku malo gha ŵakufwa vikandikora malundi, misampha ya nyifwa yikandijandizga.

⁶Mu kukweŵeka kwane, nkhachema kwa FUMU, kwa Chiuta wane nkhalira kuti wandovwire. Wali mu nyumba yakhe, wakapulika mazgu ghane, kulira kwane kukapulikikwa kwa iyo.

⁷Penepapo charu chikasunkhunyika na kundindima. Malufura gha mapiri nagho ghakasunkhunyika na kundindima chifukwa FUMU yikakaripa.

⁸Josi likafuma mu mphuno zakhe, moto wakumyangura ukafuma mu mlomo wakhe, makara ghakulilima ghakakhonyoka kwa iyo.

⁹Wakakerula mtambo na kukhilira pasi, mdima ukuru ukaŵa kusi ku malundi ghakhe.

¹⁰Wakagara pa mukerubi na kuwuruka, wakenda luŵiro na mphepo.

¹¹Wakazgora mdima kuŵa chidiko chakhe zingirizge, maŵingu gha bii gha vura, kuŵa hema lakhe.

¹²Kuŵala uko kukaŵa panthazi pakhe, matalala na makara gha moto ghakafuma, ghakaporota mu maŵingu ghakhe.

¹³FUMU yikadudumira kuchanya. Chiuta Chikurukuru wakayowoya mazgu ghakhe, mukati mu matalala na makara gha moto.

¹⁴Wakaponya mivwi kuŵambininiska ŵarwani, wakamwetuska ŵaleza na kuŵayungwiska.

¹⁵Penepapo pasi pa nyanja pakawoneka, malufura gha charu ghakawonekera, para imwe, Mwe FUMU, mukaŵachenya mwa ukari, para mukathuta muvuchi wa mu mphuno zinu.

¹⁶FUMU yikanyoroska woko lakhe kuchanya na kundikora, yikandizuwura mu maji ghanandi.

¹⁷Yikandithaska ku ŵarwani ŵane ŵankhongono, ŵeneawo ŵakanditinkhanga, pakuti ŵakaŵa ŵankhongono chomene kuruska ine.

¹⁸Wakandizira pa nyengo ya visuzgo vyane, kweni FUMU yikaŵa nchirikizgo yane.

¹⁹Yikanditorera ku malo ghasani, yikandithaska chifukwa yikakondwera mwa ine.

²⁰FUMU yikandipa njombe, pakuti ndine wambula kalema, yikandilipira kwakuyana na milimo yane yiweme.

²¹Ine ndasungilira nthowa za FUMU, ndilije kuchitapo chiheni, pakuzgokako kwa Chiuta wane.

²²Maweruzgo ghakhe ghose ndaghasungilira, nkhapatukako ku vilayizgo vyakhe chara

²³Nkhaŵa wambula kafukwa panthazi pakhe, nkhajikora kuti ndireke kwananga.

²⁴Ntheura FUMU yandipa njombe, kwakuyana na urunji wane, nga ndi umo yikuwonera kuti ndili wambula kalema.

²⁵Awo mbakugomezgeka kwa imwe, namwe mukujirongora kuŵa wakugomezgeka, Awo mbambula kalema, namwe mukujirongora kuŵa ŵambula kalema.

²⁶Kwa awo mbatuŵa mu mtima, mukujirongora kuŵa ŵaweme mu mtima, kweni kwa awo mbakubendera mu mtima, imwe mukujirongora kuŵa ŵakunyanyara nawo.

²⁷Imwe mukuthaska awo ŵakujiyuyura, kweni mukuŵakhizgira pasi awo ŵakujikuzga.

²⁸Nadi FUMU, imwe ndimwe mukukozga nyali yane, FUMU Chiuta wane, ndimwe mukuŵala para ndili mu mdima.

²⁹Na wovwiri winu, ndingathereska mpingo wa ŵasilikari. Na wovwiri wa Chiuta wane, ndingamanya kuŵenuka linga.

³⁰Chiuta withu uyu, nthowa zakhe nzakufikapo. Mazgu gha FUMU ngakuneneska. Iyo ndiyo nguru yakuvikirira wose awo ŵakubisama mwa iyo.

³¹Pakuti Chiuta munyakhe palije, kweni imwe FUMU pera. Jarawe linyakhe lakubisamamo palije, kweni imwe Chiuta withu pera.

³²Chiuta ndiyo wakundipa nkhongono, ndiyo wakuwuskamo urwani mu nthowa zane.

³³Wakukhozga malundi ghane nga nga nyiska, wakundisungilira makora mu malo ghakukwera.

³⁴Wakusambizga mawoko ghane karwero ka nkhondo, mwakuti ghakumanya kugoŵa uta wa mkuŵa.

³⁵Mwe FUMU, mukundipa nguru ya chiponosko, woko linu la maryero likundikolerera, wovwiri winu wandikwezga.

³⁶Mukukuzga nthowa zane zakwendamo, malundi ghane kuti ghakuteremuka chara.

³⁷Nkhaŵachimbilira ŵarwani ŵane na kuŵasanga, kuti nkhawerera chara mpaka nkhaŵamara petu.

³⁸Nkhaŵatimba na kuŵawiskira pasi, mwakuti ŵakatondeka na kuwuka wuwo, nkhaŵakandirizgira pasi na malundi ghane.

³⁹Imwe mukandipa nkhongono zakurwera nkhondo, ŵarwani ŵane mukaŵathereskera pasi pa malundi ghane.

⁴⁰Ndimwe mukandichimbizgira ŵarwani ŵane, awo ŵakanditinkha nkhaŵamara petu.

⁴¹Ŵakalirira wovwiri, kweni pakaŵavye wakuŵaponoska, ŵakalirira kwa FUMU, kweni yikaŵazgora chara.

⁴²Nkhaŵathibura nga ndi fuvu lakuwuruka na mphepo, nkhaŵataya nga ndi mathipa gha mu msewu.

⁴³Mukundithaska ku ŵanthu awo ŵakulimbana nane, mukandizgora kuti ndiwuse mafuko, ŵanthu awo nkhaŵamanya chara ŵakanditeŵetera.

⁴⁴Ŵakati ŵapulika vya ine, ŵakandipulikira, ŵanthu kufuma ku vyaru vinyakhe ŵakiza kandilambira.

⁴⁵Iwo ŵakathiska lusoko, ŵakiza ŵakumbwambwantha, kufumira ku malinga ghawo.

⁴⁶FUMU nja moyo, ndiyo Jarawe lane lakutumbikika, wathuwuskike Chiuta, Muponoski wane.

⁴⁷Chiuta ndiyo wakandovwira kuwezgera nduzga, wakuthereska mafuko kuti ŵaŵe pasi pane.

⁴⁸Iyo ndiyo wakandithaska ku ŵarwani ŵane. Inya mukandikwezga kuŵa pachanya pa ŵarwani ŵane, mukandithaska ku ŵanthu ŵakuchita vivulupi.

⁴⁹Pa chifukwa ichi ndimuchindikani imwe, Mwe FUMU, mukati mu ŵamitundu, nadi, ndiyimbe sumu zakuchindika zina linu.

⁵⁰Chiuta ndiyo wakumupa karonga kuvivya kukuru, wakurongora chisungusungu ku wakuphakazgika wakhe, kwa Davide na ku mphapu yakhe kwa muyirayira.