Read new_tumbuka_bible MaSalimo 20 Bible Online

MaSalimo 20 - new_tumbuka_bible bible

MaSalimo 20

¹Kwa uyo wakwimbiska sumu. Salimo la Davide. FUMU yikuzgore pa zuŵa la visuzgo, zina la Chiuta wa Yakhobe likuvikirire.

²Wakutumizgire wovwiri, kufuma mu malo ghakhe ghakupatulika, wakufighilire kufumira mu Ziyoni.

³Wakumbuke vyakupereka vyako vyose, ndipo wapokerere na kukondwa sembe zako zakocha.

⁴Wakupe ivyo mtima wako ukukhumba, wakovwire kufiska vyose ivyo wanozgera.

⁵Tichemerezge na chimwemwe, chifukwa cha kutonda kwinu. Tikwezge ndembera zithu, pakurumba zina la Chiuta withu. FUMU yikupe vyose ivyo iwe waromba.

⁶Sono nkhumanya kuti FUMU yovwirenge, wakuphakazgika wakhe, yiti yimuzgore kufuma ku malo ghakhe ghakupatulika kuchanya, na nkhongono zakutonda za woko lakhe la maryero.

⁷Ŵanji ŵakugomezga magareta, ŵanyakhe mahachi, kweni ise nkhugomezga zina la FUMU, Chiuta withu.

⁸Iwo ŵati ŵazinduke na kuwa pasi, kweni ise titi tiwuke na kwimilira nganganga.

⁹Mwe FUMU, mumovwire karonga kuti watonde. Mutizgore para tikumurombani.