Read new_tumbuka_bible MaSalimo 21 Bible Online

MaSalimo 21 - new_tumbuka_bible bible

MaSalimo 21

¹Kwa uyo wakwimbiska sumu. Salimo la Davide. Mwe FUMU, mu nkhongono zinu, ndimo karonga wakusekerera. Wakukondwa chomene, chifukwa mwamovwira kuti watonde.

²Mwamupa icho mtima wakhe ukakhumbanga, mulije kumukanira ivyo iyo wakaromba.

³Pakuti mukwiza kwa iyo, na vitumbiko viweme chomene, mukumuvwarika mphumphu ya golide lakwengeka makora, pa mutu pakhe.

⁴Iyo wakamurombani umoyo, imwe mukamupa, umoyo wa mazuŵa ghanandi kwa muyirayira,

⁵Na wovwiri winu uchindami wakhe ngukuru. Mwamupa nchindi na ufumunkhuru.

⁶Nadi, mwamupa vitumbiko vikuru kwa muyirayira, mwamukondweska na chimwemwe cha uŵapo winu.

⁷Pakuti karonga wakugomezga FUMU, iyo kuti wasunkhunyiskikenge chara, chifukwa cha chisungusungu cha Chiuta Chikurukuru.

⁸Nkhongono yinu yiti yifike ku ŵarwani ŵakhe wose, woko linu la maryero lifike, ku wose awo ŵakumutinkha.

⁹Para imwe mwamkwiza, mwizamkuŵaŵika mu ng'anjo ya moto. Mu ukari wakhe, FUMU yizamkuŵamara petu, ndipo moto wizamkuŵamyangura.

¹⁰Imwe muti mumare ŵa mphapu yawo pa charu cha pasi, ndiposo na ŵana ŵawo mukati mu ŵanthu.

¹¹Usange ŵakunozgera kumuchitira uheni, panji kupangana kwimikana nayo, iwo ŵati ŵatondekenge.

¹²Iyo wati waŵambininiske, pakudininika mivwi pa visko vyawo.

¹³Mwe FUMU, mutumphuskike chifukwa cha nkhongono zinu. Ise timbenge na kurumba mazaza ghinu.