Read new_tumbuka_bible MaSalimo 22 Bible Online

MaSalimo 22 - new_tumbuka_bible bible

MaSalimo 22

¹Kwa uyo wakwimbiska sumu. Kurondezga kimbiro ka sumu yakuti, “Nyiska ya ku Matandakucha”. Salimo la Davide. Chiuta wane, Chiuta wane, kasi mwandisidirachi? Mwaŵirachi kutali kundovwira ine, na ku mazgu gha kutampha kwane?

²Mwe Chiuta wane, nkhulira na muhanya, kweni imwe mukundizgora chara. Nkhulira na usiku, kweni kuti nkhupumula chara.

³Ndipouli imwe ndimwe ŵatuŵa, mukukhara pa chizumbe chinu, ndipo ŵaIsraele ŵakumupani marumbo.

⁴Ŵasekuru ŵithu wakagomezga mwa imwe. Iwo ŵakagomezga, ndipo imwe mukaŵathaska.

⁵Ŵakalira kwa imwe, ndipo imwe mukaŵathaska. Ŵakagomezga mwa imwe, ndipo kuti ŵakagongoweskeka chara.

⁶Kweni ine ndine mphorozi waka, munthu chara, wakuhoyeka na wakuyuyurika na ŵanthu.

⁷Wose awo ŵakundiwona ŵakundiseka, ŵakundisepetulira milomo na kupukunya mitu yawo.

⁸Iwo ŵakuti, “Wakagomezganga FUMU kuti yimuthaske. Rekani yimuthaske pakuti yikucha nayo.”

⁹Ndipouli imwe ndimwe mukandifumya, mu nthumbo ya amama. Mukandisungilira makora, apo nkhaŵa ndichali konkha.

¹⁰Ine nkhaperekeka kwa imwe, kufuma apo nkhababikira. Imwe mwaŵa Chiuta wane, kufuma apo amama ŵakandibabira.

¹¹Mureke kukhara kutali na ine, pakuti suzgo yili pafupi kundiwira, ndipo wakundovwira palije.

¹²Ŵarwani ŵanandi nga ndi nkhambako, ŵandizingirizga ine, mbankhongono nga ndi nkhambako, za ku Bashani.

¹³Ŵandiyasamulira milomo yawo, nga ndi nkharamu yakutwazura na yakubangura.

¹⁴Nkhongono zane zikupungulirika nga ndi maji, viwangwa vyane vyose vyasoghoyeka. Mtima wane uli nga ndi phula, wasongonoka mu chifuŵa chane.

¹⁵Chigoromiro chane chomira nga ndi dengere, lulimi lwane lwademerera ku chavu chane, imwe mwandigoneka pa fuvu la nyifwa.

¹⁶Inya, ŵankhaza, nga ndi ncheŵe, ŵandizingirizga, chiwuru cha ŵakuchita uheni chandizingirizga. Nga ndi nkharamu ŵadorora mawoko ghane na malundi ghane.

¹⁷Viwangwa vyane vyose vikupendeka, ŵarwani ŵakundidodoliska na kundihoya.

¹⁸Ŵakugaŵana vyakuvwara vyane, na kuchita mphenduzgo na malaya ghane.

¹⁹Kweni imwe, Mwe FUMU, mungaŵanga kutali na ine chara, imwe ndimwe nkhongono zane, mwize luŵiro kuti mundovwire.

²⁰Muthaske umoyo wane ku lupanga, mundithaske ku nkhongono za ncheŵe.

²¹Mundiponoske ku mlomo wa nkharamu, muponoske umoyo wane, wakusuzgika ku masengwe gha zinjati.

²²Nditi ndithuwuske zina linu ku ŵabali ŵane, nditi ndimurumbani mukati mu mpingo wa ŵanthu.

²³Imwe mukopa FUMU, muyirumbe! Mose mwa ŵa mphapu ya Yakhobe muyichindike! Mose mwa mphapu ya Israele, mopenge iyo!

²⁴Chifukwa yilije kuyuyura panji kuseruskika, na visuzgo vya munthu wakusuzgika. Yilije kubisa chisko chakhe kwa iyo, kweni yikumupulika para wakulira kwa iyo.

²⁵Imwe mukundikhuŵirizga, kuti ndimurumbaninge mu mpingo ukuru. Nditi ndifiske mapangano ghane, panthazi pa awo ŵakumopani imwe.

²⁶Ŵakusuzgika ŵati ŵarye na kukhuta, awo ŵakupenja FUMU ŵati ŵayirumbe, mitima yinu yiŵe ya umoyo kwa muyirayira.

²⁷Ŵanthu ŵa ku mphererekezgo zose za charu, ŵati ŵakumbuke na kuzgokera kwa FUMU. Mbumba za mafuko ghose, zisope panthazi pinu.

²⁸Pakuti mazaza gha ufumu nga FUMU, ndipo iyo ndiyo yikuwusa ŵanthu ŵa mafuko ghose.

²⁹Inya, ŵanthu wose ŵakujikuzga ŵati ŵayilambire, ŵati ŵasindame panthazi pakhe. Ŵati ŵayisindamire wose awo ŵakunjira mu dindi, ndiposo na wose awo ŵalije kumanya kuwuma pa iwo ŵekha.

³⁰Ŵa mphapu yakhe ŵati ŵamuteŵetere, ŵa muwiro uwo ukwiza ŵizamkuphara vya Fumu.

³¹Ŵati ŵapharazge za uthaski wakhe, ku ŵanthu awo ŵachali ŵandababike, pakuyowoya kuti, FUMU ndiyo yithaska ŵanthu ŵakhe.